¹ Ne biwa okukola eigulu n'ensi n'eigye lyabyo lyonalyonna. ² Katonda n'amalira ku lunaku olw'omusanvu mu mirimu gye gye yakolere; n'awumulira ku lunaku olw'omusanvu mu mirimu gye gyonagyona gye yakolere. ³ Katonda n'awa omukisa olunaku olw'omusanvu n'alutukuza: kubanga olwo lwe yawumuliiremu mu mirimu gye gyonagyona Katonda gye yatondere gye yakolere. ⁴ Lityo eizaire ery'eigulu n'ensi bwe lyatondeibwe, ku lunaku Mukama Katonda lwe yakoleireku ensi n'eigulu. ⁵ Na buli musaale ogw'omu nsiko nga gukaali kubbaawo mu nsi, na buli mwido ogw'omu nsiko nga gukaali kumera: kubanga Mukama Katonda yabbaire nga akaali kutonyesya maizi ku nsi, nga wabula muntu alima ensi; ⁶ naye olufu ne luniina okuva mu nsi, ne lutonya amaizi ku nsi yonayona. ⁷ Mukama Katonda n'abbumba omuntu, n'enfuufu y'ensi, n'amufuuwamu mu nyindo omwoka ogw'obulamu; omuntu n'afuuka omwoka omulamu. ⁸ Mukama Katonda n'asimba olusuku mu Aden ku luuyi olw'ebuvaisana; n'ateeka omwo omuntu gwe yabbumbire. ⁹ Mukama Katonda n'amerya mu nsi buli musaale ogusanyusa amaiso omusa okulya; n'omusaale ogw'obulamu wakati mu lusuku, n'omusaale ogw'okumanya obusa n'obubbiibi. ¹⁰ Omwiga ne gusibuka mu Adeni okufukiriranga amaizi mu lusuku; ne gwawukanamu ne gufuuka emitwe ina. ¹¹ Ogw'oluberyeberye eriina lyagwo Pisoni; ogwo niigwo gwetooloola ensi yonayona eya Kavina, erimu zaabu; ¹² ne zaabu ey'omu nsi edi nsa: mulimu bedola n'amabbaale sokamu. ¹³ N'eriina ly'omwiga ogw'okubiri Gikoni: ogwo niigwo gwetooloola ensi yonayona eya Kuusi. ¹⁴ N'eriina ly'omwiga ogw'okusatu Kidekeri: ogwo niigwo gubita ku mbali kw'e Bwasuli. N'omwiga ogw'okuna Fulaati. ¹⁵ Mukama Katonda n'atwala omuntu, n'amuteeka mu lusuku Adeni alulimenga alukuumenga. ¹⁶ Mukama Katonda n'alagira omuntu n'amukoba nti Buli musaale ogw'omu lusuku olyangaku nga bw'ewatakanga: ¹⁷ naye omusaale ogw'okumanya obusa n'obubbiibi togulyangaku: kubanga olunaku lw'oligulyaku tolirema kufa. ¹⁸ Mukama Katonda n'atumula nti Ti kisa omuntu okubbanga yenka; n'amukolera omubeezi amusaanira. ¹⁹ Mukama Katonda n'akola n'eitakali buli nsolo ey'omu nsiko, na buli ekibuuka waigulu; n'abireetera omuntu, okubona bw'ayabyeta: n'omuntu buli lye yayetere ekitonde kyonakyona ekiramu eryo niilyo eriina lyakyo. ²⁰ Omuntu n'abituuma amaina buli nsolo n'ekibuuka waigulu na buli nsolo ey'omu nsiko; naye omuntu nga akaali kubonamubeezi amusaanira. ²¹ Mukama Katonda n'aleetera omuntu endoolo nyingi, na gona; n'amutoolamu olumpete lumu, n'airyawo enyama mu kifo kyalwo. ²² Mukama Katonda n'azimba olumpete, lw'atoire mu muntu, okubba Omukali, n'amuleeta eri omuntu. ²³ Omuntu n'atumula nti Ono niiryo eigumba eriviire mu magumba gange, ye nyama eviire mu nyama yange: naye yayetebwanga mukali, kubanga atoleibwe mu musaiza. ²⁴ Omusaiza ky'ayavanga aleka kitaaye no maye, ne yeetaba no mukali we: boona babbanga omubiri gumu. ²⁵ Bombiri babbaire bwereere, omusaiza no mukali we, so tebaakwatiibwe nsoni.