¹ Oluvannyuma lw'ebyo ekigambo kya Mukama ne kiizira Ibulaamu mu kwolesebwa, nga kitumula nti Totya, Ibulaamu: ninze ngabo yo, n'empeera yo enene einu. ² Ibulaamu n'atumula nti Ai Mukama Katonda, wampa ki, kubanga ntambula nga mbula mwana, naye alirya enyumba yange niiye Damesiko Erieza? ³ Ibulaamu n'atumula nti bona, nze tompaire izaire: era, bona, eyazaaliirwe mu nyumba yange niiye musika wange. ⁴ Era, bona, ekigambo kya Mukama ne kimwizira, nga kitumul nti Omuntu oyo talibba musika wo; naye aliva mu ntumbu gyo iwe niiye alibba omusika wo. ⁵ N'amufulumya ewanza, n'atumula nti Lingirira eigulu atyanu, obale emunyenye, bw'ewasobola okugibala: n'amukoba nti Eizaire lyo bwe liribba lityo. ⁶ N'aikirirya Mukama; n'akumubalira okubba obutuukirivu. ⁷ N'amukoba nti Ninze, Mukama Eyakutiore mu Uli eya Abakaludaaya, okukuwa ensi eno okugisikira. ⁸ N'atumula nti Ai Mukama Katonda, kiki ekyantegeeza nga ndigisikira? ⁹ N'amukoba nti Ontwalire ente enkali eyaakamala emyaka eisatu, n'embuli enkali eyaakamala emyaka eisatu, n'entama ensaiza eyaakamala emyaka eisatu, ne kaamukuukulu, n'eiyemba eitoito. ¹⁰ Ne yeetwalira ebyo byonabyona, n'abyasyaamu wakati, n'ateeka ebitundu bibiri bibiri nga bibonagana: naye ebinyonyi n'atabyaasyaamu. ¹¹ N'amasega ne gagwa ku mirambo, Ibulaamu n'agabbinga. ¹² Awo eisana bwe kyabbaire ligwa, endoolo enyingi ne gigwa ku Ibulaamu; era, bona, entiisya ey'endikirirya ekwaite n'emugwaku. ¹³ N'akoba Ibulaamu nti Tegeerera dala ng'eizaire lyo liribba igeni mu nsi eteri yaabwe, era balibaweereza; era balibabonyezabonyerya emyaka bina; ¹⁴ era n'eigwanga eryo, lye baliweereza, ndirisalira omusango: ne kaisi bavaamu nga balina ebintu bingi. ¹⁵ Naye iwe olyaba awali bazeiza bo n'emirembe; oliziikibwa bw'olimala okuwangaala okusa. ¹⁶ No mu mirembe egy'okuna baliira ate wano: kubanga obutali butuukirivu obw'Omwamoli bukaali kutuukirira. ¹⁷ Awo, eisana bwe lyamalire okugwa, endikirirya nga ekwaite, bona, ekikoomi ekinyooka n'omugada ogwaka ne bibita wakati awali ebitundu ebyo. ¹⁸ Ku lunaku olwo Mukama n'alagaana no Ibulaamu, ng'atumula nti Eizaire lyo ndiwaire ensi eno, okuva ku mwiga ogw'e Misiri okutuuka ku mwiga omunene, omwiga Fulaati: ¹⁹ Omukeeni, n'Omukenizi, n'Omukadumooni, ²⁰ n'Omukiiti, n'Omuperizi, n'Abaleefa, ²¹ n'Omwamoli, n'Omukanani, n'Omugirugaasi, n'Omuyebusi.