¹ Awo mu mirembe gya Amulaferi kabaka w'e Sinali, Aliyoki, kabaka w'e Erasali, Kedolawomeeri, kabaka w'e Eramu, n'egya Tidali, kabaka w'e Goyiyimu, ² ne balwana no Bbeera, kabaka w'e Sodoma, no Bbiruusa, kabaka w'e Gomola, Sinaabu, kabaka w'e Aduma, no Semebeeri, kabaka w'e Zeboyiyimu, no kabaka w'e Bera (niiyo Zowaali). ³ Abo bonabona ne beegaitira mu kiwonvu Sidimu (eyo niiyo nyanza ey'omunyu): ⁴ Ne baweerereza Kedolawomeeri emyaka ikumi n'aibiri, ne mu mwaka ogw'eikumi n'eisatu ne bajeema. ⁵ Ne mu mwaka ogw'eikumi n'eina Kedolawomeeri n'aiza, no bakabaka ababbaire awamu naye, ne bakubbira Abaleefa mu Asuterosikalumayimu, n'Abazuuzi mu Kaamu, n'Abemi mu Savekiriyasayimu, ⁶ n'Abakooli ku lusozi lwabwe Seyiri, ne bababbinga okutuusya Erupalaani ekiri okumpi n'eidungu. ⁷ Ne bairayo ne batuuka e Nuumisupaati (niiyo Kadesi), ne bakubba ensi yonayona eya Abameleki, era n'eya Abamoli, abaatyaime mu Kazazonutamali. ⁸ Ne watabaala kabaka w'e Sodoma, no kabaka w'e Gomola, no kabaka w'e Aduma, no kabaka w'e Zeboyiyimu, no kabaka w'e Bera (niiyo Zowaali); ne bategeka olutalo okulwanira nabo mu kiwonvu Sidimu; ⁹ okulwana no Kedolawomeeri, kabaka w'e Eramu, ne Tidali, kabaka w'e Goyiyimu, no Amulafeeri, kabaka w'e Sinali, no Aliyooki kabaka w'e Erasali: bakabaka abana nga balwana n'abataanu. ¹⁰ Era ekiwonvu Sidimu kyabbaire kizwiire obwina obw'ebitosi; no bakabaka w’e Sodoma ne Gomola ne bairuka, ne bagwa omwo, n'abo abaasigairewo ne bairukira ku lusozi. ¹¹ Ne banyaga abintu byonabyona eby'omu Sodoma ne Gomola, n'ebyokulya byabwe byonabyona, ne beyabira. ¹² Ne banyaga Luuti, omwana wa mugande wa Ibulaamu, eyatyamanga mu Sodoma, n'ebintu bye, ne baaba. ¹³ Ne waia omumu eyawonerewo, n'akobera Ibulaamu Omwebbulaniya: oyo yatyamanga awali emivule gya Mamule Omwamoli, mugande wa Esukoli, era mugande wa Aneri; boona babbaire nga balagaine no Ibulaamu. ¹⁴ Ibulaamu bwe yawuliire nga baanyagire mugande we, n'ayaba ne basaiza be abayegereseibwe okulwana, abaazaaliirwe mu nyumba ye, ebikumi bisatu na ikumi na munaana, ne babasengererya okutuusya ku Daani. ¹⁵ Ne baawukanamu okubalumba obwire, iye n'abaidu be, ne babakubba, ne babasengererya okutuusya ku Koba, ekiri ku mukono omugooda ogw'e Damasiko. ¹⁶ N'airyawo ebintu byonabyona, era n'airyawo no mugande we Luuti, n'ebintu bye, era n'abakali, n'abantu. ¹⁷ No kabaka w'e Sodoma n'afuluma okumusisinkana, bwe yamalire okwira ng'aitire Kedolawomeeri no bakabaka ababbaire naye, mu kiwonvu Save (niikyo kiwonvu kya kabaka). ¹⁸ Ne Merukizeddeeki kabaka w'e Saalemi n'aleta emmere n'omwenge: era niiye yabbaire kabona wa Katonda ali waigulu einu. ¹⁹ N'amusabira omukisa, n'atumula nti Ibulaamu aweebwe omukisa, Katonda ali waigulu einu, mwene igulu n'ensi: ²⁰ era Katonda ali waigulu einu atenderezebwe akugabiire abalabe bo mu mukono gwo. N'amuwa ekitundu eky'eikumi ekya byonabyona. ²¹ Kabaka w'e Sodoma n'akoba Ibulaamu nti Mpa nze abantu, ebintu obyetwalire iwe. ²² Ibulaamu n'akoba kabaka w'e Sodoma nti Nyimusirye omukono gwange eri Mukama Katonda ali waigulu einu, mwene igulu n'ensi, ²³ nga ndayira nti tinditwala kaguwa waire akakoba k'engaito waire akantu konakona k'olina, oleke okutumula nti Mugaagawairye Ibulaamu: ²⁴ wabula ebyo abavubuka bye baliire, n'omugabo gw'abasaiza abaaba nanze; Aneri, Esukoli; no Mamule abo batwale omugabo gwabwe.