¹ Oluberyeberye Katonda yatondere eigulu n'ensi. ² Ensi yabbaire njereere nga yeetabwiretabwire; n'endikirirya yabbaire kungulu ku buliba: omwoyo gwa Katonda ne gumaamira kungulu ku maizi. ³ Katonda n'atumula nti, Wabbeewo obutangaavu. Ne wabbaawo obutangaavu. ⁴ Katonda n'abona nga kisa: Katonda n'ayawula wakati mu butangaavu n'endikirirya. ⁵ Katonda obutangaavu n'abweta emisana, n'endikirirya n'agyeta obwire. Nebubba eigulo, ne bubba amakeeri, olwo niilwo lunaku olumu. ⁶ Katonda n'atumula nti, Wabbeewo eibbanga wakati mu maizi, lyawulenga amaizi n'amaizi. ⁷ Katonda n'ateekaawo eibbanga n'ayawula amaizi agali wansi w'eibbanga n'amaizi agali waigulu mu ibbanga: kityo bwe kyabbaire. ⁸ Katonda eibbanga n'alyeta eigulu. Ne bubba egulo, ne bubba makeeri, olwo niilwo lunaku olw'okubiri. ⁹ Katonda n'atumula nti, Amaizi agali wansi w'eigulu gakuŋaanire mu kifo kimu, olukalu luboneke: kityo bwe kyabbaire. ¹⁰ Katonda olukalu n'alweta ensi; n'eikuŋaaniro ly'amaizi n'alyeta enyanza: Katonda n'abona nga kisa. ¹¹ Katonda n'atumula nti, ensi emere ebimeera, omwido ogubala ensigo, omusaale gw'ebibala, ogubala ebibala mu ngeri yaagwo, ogulimu ensigo yaagwo, ku nsi: kityo bwe kyabbaire. ¹² Ensi n'emera ebimera, omwido ogubala ensigo mu ngeri yaagwo, n'omusaale ogubala ebibala, ogulimu ensigo yaagwo, mu ngeri yaagwo: Katonda n'akibona nga kisa. ¹³ Ne bubba akawungeezi, ne bubba amakeeri, olwo niilwo olunaku olw'okusatu. ¹⁴ Katonda n'atumula nti, Wabeewo ebyaka mu ibbanga ery'eigulu; byawulenga emisana n'obwire, bibbenga ng'obubonero, n'ebiseera, n'enaku n'emyaka: ¹⁵ Bibenga ng'etabaaza mu ibbanga ery'eigulu byakenga ku nsi: kityo bwe kyabbaire. ¹⁶ Katonda n'akola ebyaka bibiri ebinene; ekyaka ekisinga obunene okufuganga emisana, n'ekyaka ekitono okufuganga obwire: era n'emunyeenye. ¹⁷ Katonda n'abiteeka mu ibbanga ery'eigulu byakenga ku nsi, ¹⁸ bifugenga emisana n'obwire, era byawulenga obutangaavu n'endikirirya: Katonda n'akibona nga kisa. ¹⁹ Ne bubba akawungeezi, ne bubba amakeeri, olwo niilwo lunaku olw'okuna. ²⁰ Katonda n'atumula nti, Amaizi gazaale ebyewalula bingi ebirina obulamu, era n'ebibuuka bibuuke ku nsi mu ibbanga ery'eigulu. ²¹ Katonda n'atonda balukwata abanene, na buli ekirina obulamu ekyewalula, amaizi kye gaazaala mu ngeri gyabyo, na buli ekibuuka ekirina ebyoya mu ngeri yaakyo: Katonda n'akibona nga kisa. ²² Katonda n'abiwa omukisa n'atumula nti, Mweyongere mwale, mwizulye amaizi ag'omu nyanza, era n'ebibuuka byeyongere mu nsi. ²³ Ne bubba akawungeezi, ne bubba amakeeri, olwo niilwo lunaku olw'okutaanu. ²⁴ Katonda n'atumula nti, Ensi ereete ekirina obulamu mu ngeri yaakyo, ente, n'ekyewalula, n'ensolo y'ensi mu ngeri yaayo: kityo bwe kyabbaire. ²⁵ Katonda n'akola ensolo y'ensi mu ngeri yagyo, n'ente mu ngeri yagyo, na buli ekyewalula ku nsi mu ngeri yakyo: Katonda n'akibona nga kisa. ²⁶ Katonda n'atumula nti, Tukole omuntu mu ngeri yaisu, mu kifaananyi kyaisu: bafugenga eby'omu nyanza n'ebibuuka waigulu, n'ente, n'ensi yonayona, na buli ekyewalula ku nsi. ²⁷ Katonda n'atonda omuntu mu ngeri ye, mu ngeri ya Katonda mwe yamutondeire; omusaiza n'omukali bwe yabatondere. ²⁸ Katonda n'abawa omukisa, Katonda n'abakoba nti, Mweyongerenga, mwalenga, mwizulye ensi, mugirye: mufugenga eby'omu nyanza, n'ebibuuka waigulu, na buli ekirina obulamu ekitambula ku nsi. ²⁹ Katonda n'atumula nti, Bona, mbawaire omwido gwonagwona ogubala ensigo, oguli ku nsi yonayona, na buli musaale ogulimu, ekibala ky'omusaale ogubala ensigo eri imwe; gwabbanga mere. ³⁰ n'eri buli ensolo ey'oku nsi, na buli ekibuuka waigulu, na buli ekyewalula ku nsi, ekirimu omwoka omulamu, ngiwaire omwido gwonagwona omubisi okubbanga emere: kityo bwe kyabbaire. ³¹ Katonda n'abona buli ky'akolere; era, bona, nga kisa. Ne bubba akawungeezi ne bubba amakeeri, olwo niilwo lunaku olw'omukaaga.