¹ Mu mwaka ogw'abiri n'e itaanu ogw'okusibibwa kwaisu omwaka nga gwakaiza gutandike ku lunaku olw'e ikumi olw'o mwezi mu mwaka ogw'e ikumi n'e ina ekibuga nga kimalire okumenyebwa, ku lunaku olwo omukono gwa Mukama ne gubba ku nze, n'a ntwalayo. ² N'antwala mu nsi ye Isiraeri mu kwolesebwa kwa Katonda, n'anjikya ku lusozi oluwanvu einu, okwabbaire ng'embala y'e kibuga ku bukiika obulyo. ³ N'antwalayo, kale, bona, nga waliwo omusaiza; enfaanana ye ng'enfaanana ey'e kikomo, ng'alina omuguwa ogw'e nkosi mu mukono gwe n'o lugada olupima; n'ayemerera mu mulyango. ⁴ Omusaiza oyo n'ankoba nti mwana w'o muntu linga n'a maiso go, owulire n'amatu go, oteeke omwoyo gwo ku byonabyona bye naakulagire; kubanga kyoviire oleetebwa wano kaisi mbikulage: byonabyona bye wabona obikoberenga enyumba ya Isiraeri. ⁵ Awo, bona, ekisenge ewanza w'e nyumba okwetooloola, n'o mu mukono gw'o musaiza nga mulimu olugada olugera, obuwanvu bwalwo emikono mukaaga, buli mukono mukono oluta: awo n'agera obugazi bw'e nyumba, olugada lumu; n'o bugulumivu olugada lumu: ⁶ Awo n'a iza eri omulyango ogulingirira ebuvaisana, n'a niina ku madaala gaagwo; n'agera awemererwa ow'o mulyango, obugazi bwawo olugada lumu: n'awemerewa awandi, obugazi bwawo olugada lumu. ⁷ Na buli nyumba obuwanvu bwayo olugada lumu n'o bugazi bwayo olugada lumu; ne wakati w'amayu emikono itaanu; n'a wayingirirwa aw'o mulyango awali ekisasi eky'oku mulyango okwolekera enyumba, waaliwo olugada lumu. ⁸ Era n'agera n'e kisasi eky'o ku mulyango okwolekera enyumba, olugada lumu. ⁹ Awo n'agera ekisasi eky'oku mulyango, emikono munaana; n'e mifuubeeto gyamu, emikono ibiri; n'e kisasi eky'oku mulyango kyayolekeire enyumba. ¹⁰ N'a mayu ag'oku mulyango ebuvaisana gabbaire asatu eruuyi n'a satu eruuyi; ago gonsatu g'e kigera kimu n'e mifuubeeto gyabbaire ekigera kimu eruuyi n'e ruuyi ¹¹ Era n'agera awayingirirwa mu mulyango obugazi bwawo, emikono ikumi; n'o buwanvu bw'o mulyango emikono ikumi n'e isatu; ¹² n'eibbanga eryabbaire mu maiso g'a mayu, omukono gumu eruuyi, n'e ibbanga omukono gumu eruuyi; n'a mayu emikono mukaaga eruuyi n'e mikono mukaaga eruuyi. ¹³ N'agera omulyango okuva ku nyumba waigulu okutuuka ku nyumba ginaaye waigulu, obugazi emikono abiri na itaanu; olwigi nga lwolekera olwigi. ¹⁴ Era n'akola n'emifuubeeto, emikono enkaaga; n'o luya lwatuukire ku mufuubeeto, omulyango nga gwetooloola. ¹⁵ N'okuva ku bweni bw'o mulyango awayingirirwa okutuuka ku bweni obw'ekisasi eky'o munda eky'o ku mulyango gyabbaire emikono ataanu. ¹⁶ Era amayu gabbaireku ebituli ebyazibiibwe, n'e mifuubeeto gyago egyabbire munda w'o mulyango enjuyi gyonagyona, era n'ebizizi bityo byabbaireku ebituli: era munda mwabbairemu ebituli okwetooloola: na ku buli mufuubeeto kwabbaireku enkindu. ¹⁷ Awo n'a ntwala mu luya olw'e wanza, era, bona, nga waaliwo ebisenge n'a mabbaale amaalirire, ebyakoleirwe oluya okwetooloola: ebisenge abiri byabbaire ku mabbaale ago amaalirire. ¹⁸ N'amabbaale amaalirire gaali ku mbali kw'e miryango, okwekankana n'o buwanvu obw'e miryango, niigo mabbaale amaalirire age wansi. ¹⁹ Awo n'agera obugazi okuva ku bweni obw'o mulyango ogwa wansi okutuuka ku bweni obw'o luya olw'o munda ewanza, emikono kikumi, ebuvaisana n'o bukiika obugooda: ²⁰ N'o mulyango ogw'o luya olw'e wanza ogulingirira obukiika obugooda n'agera obuwanvu bwagwo n'o bugazi bwagwo: ²¹ N'a mayu gaaku gabbaire asatu eruuyi n'a satu eruuyi; n'emifuubeeto gyaku n'ebizizi byaku byabbaire ng'ekigera eky'o mulyango ogw'o luberyeberye: obuwanvu bwagwo emikono ataanu, n'o bugazi emikono abiri na itaano. ²² N'e bituli byagwo n'e bizizi byagwo n'e nkindu gyagwo, byabbaire ng'ekigera eky'o mulyango ogulingirira ebuvaisana; era bagunirangamu ku madaala musanvu; n'ebizizi byagwo byabbaire mu maiso gaago. ²³ Era oluya olw'o munda lwabbaireku omulyango ogwolekera omulyango ogundi, obukiika obugooda era n'e buvaisana; n'agera okuva ku mulyango okutuuka ku mulyango emikono kikumi. ²⁴ Awo n'a ntwala obukiika obulyo, kale, bona, omulyango obukiika obulyo: n'agera emifuubeeto gyagwo n'e bizizi byagwo ng'ebigera ebyo bwe biri. ²⁵ Era kwabbaireku amadirisa ku igwo n'o ku bizizi byagwo enjuyi gyonagyona ebifaanana amadirisa ago: obuwanvu emikono ataanu, n'o bugazi emikono abiri na itaanu. ²⁶ Era wabbairewo amadaala musanvu kwe baniiniranga, n'e bizizi byagwo byabbaire mu maiso gaagwo: era gwabbaireku enkindu, olumu eruuyi n'olumu eruuyi ku mifuubeeto gyagwo. ²⁷ Era oluya olw'o munda lwabbaire n'o mulyango ogwolekera obukiika obulyo: n'agera okuva ku mulyango okutuuka ku mulyango okwolekera obukiika obulyo emikono kikumi. ²⁸ Awo n'a ntwala mu luya olw'o munda oluliraine omulyango ogw'obukiika obulyo ng'e bigera ebyo bwe byabbaire; ²⁹ n'a mayu gaaku n'e mifuubeeto gyagwo n'e bizizi byagwo ng'e bigera ebyo bwe byabbaire: era gwabbaireku ebituli era n'e bizizi byagwo enjuyi gyonagyona byabbaireku ebituli: obuwanvu bwagwo emikono ataanu n'o bugazi bwagwo emikono abiri na itaano. ³⁰ Era wabbairewo ebizizi enjuyi gyonagyona obuwanvu bwabyo emikono abiri na itaanu n'o bugazi bwabyo emikono itaanu. ³¹ N'e bizizi byagwo byayolekeire oluya olw'e wanza; n'e mifuubeeto gyagwo gyabbaire enkindu; n'awaniinirirwa wabbairewo amadaala munaana. ³² N'a ntwala mu luya olw'o munda okwolekera obuvaisana: n'agera omulyango ng'ebigera ebyo bwe byabbaire; ³³ n'amayu gaaku n'emifuubeeto gyagwo n'ebizizi byagwo ng'e bigera ebyo bwe byabbaire: era gwabbaireku ebituli, n'e bizizi byagwo enjuyi gyonagoyna byabbaire ku ebituli: obuwanvu bwagwo emikono ataanu n'obugazi bwagwo emikono abiri na itaanu. ³⁴ N'e bizizi byagwo byayolekeire oluya olw'ewanza; n'e mifuubeeto gyagwo gyabbaireku enkindu, eruuyi n'e ruuyi: n'a waniinirirwa wabbairewo amadaala munaana. ³⁵ N'a ntwala ku mulyango ogw'o bukiika obugooda: n'agugera ng'e bigera ebyo bwe byabbaire; ³⁶ amayu gaaku n'e mifuubeeto gyagwo n'e bizizi byagwo; era gwabbaireku amadirisa enjuyi gyonagyona: obuwanvu bwagwo emikono ataanu n'o bugazi bwagwo emikono abiri na itaanu. ³⁷ N'e mifuubeeto gyagwo gyayolekeire oluya olw'e wanza; era emifubeeto gyagwo gyabbaireku enkindu eruuyi n'e ruuyi: n'awaniinirirwa wabbairewo amadaala munaana. ³⁸ Era n'e nyumba n'o lwigi lwayo yabbaire eriraine ku mifuubeeto ku miryango; eyo gye banabiryanga ekiweebwayo ekyokyebwa. ³⁹ N'o mu kisasi eky'o ku mulyango mwabbairemu emeenza ibiri eruuyi n'e meenza ibiri eruuyi okwitirangaku ekiweebwayo ekyokyebwa n'e kiweebwayo olw'e kibbiibi n'e kiweebwayo olw'o musango. ⁴⁰ Era ku luuyi ewanza ng'o niina awayingirirwa mu mulyango okwolekera obukiika obugooda yabbaireyo emeenza ibiri: n'o ku luuyi olw'o kubiri, niilwo lw'e kisasi eky'o ku mulyango, yabbaireyo emeenza ibiri. ⁴¹ Wabbairewo emeenza ina eruuyi n'e meenza ina eruuyi okuliraana omulyango; emeenza munaana kwe baitiranga sadaaka. ⁴² Era wabbairewo emeenza ina egy'e kiweebwayo ekyokyebwa, egy'a mabbaale amateme, obuwanvu bwagyo omukono ekitundu, n'o bugazi bwagyo omukono ekitundu, n'o bugulumivu bwagyo omukono gumu: kwe baateekanga ebintu bye bateekanga ekiweebwayo ebyokyebwa ne sadaaka: ⁴³ N'e bikwaso, obuwanvu bwabyo lugalo, byasibiibwe munda enjuyi gyonagyona; n'o ku meenza kwabbaireku enyama ey'e kitone. ⁴⁴ Era ewanza w'o luya olw'omunda wabbairewo enyumba egy'a bembi mu luya olw'o munda olwabbaire ku mbali g'o mulyango ogw'obukiika obugooda: era gyalingiriire obukiika obulyo: nga waaliwo imu ku mbali kw'o mulyango ogw'e buvaisana elingirira obukiika obugooda. ⁴⁵ Awo n'ankoba nti Enyumba eno eringirira obukiika obulyo ya bakabona abakuumi b’e nyumba gye balagiirwe. ⁴⁶ N'e nyumba eringirira obukiika obugooda ya bakabona abakuumi b'ekyoto kye balagiirwe: abo niibo bataane ba Zadoki, niibo b'oku bataane ba Leevi abasemberera Mukama okumuweererya. ⁴⁷ N'agera oluya, obuwanvu bwalwo emikono kikumi n'o bugazi bwalwo emikono kikumi okwekankana; n'e kyoto kyabbaire mu maiso g'e nyumba. ⁴⁸ Awo n'antwala ku kisasi eky'e nyumba, n'agera buli mufuubeeto ogw'e kisasi emikono itaanu eruuyi n'e mikono itaanu eruuyi: n'o bugazi obw'omulyango bwabbaire emikono isatu eruuyi n'e mikono isatu eruuyi. ⁴⁹ Obuwanvu bw'e kisasi bwabbaire emikono abiri n'obugazi emikono ikumi na gumu: ng'ogera awali amadaala ge baniinirangaku omwo: era wabbairewo empango egiriraine emifubeeto, imu eruuyi n'e imu eruuyi.