¹ Wena, mwana w'o muntu, mulagulireku Googi otumule nti Ati bw'atumula Mukama Katonda nti bona, ndi mulabe wo, ai Googi, omulangira we Loosi, Meseki, ne Tubali: ² era ndikwiryayo, ni nkutwala mu maiso ne nkuniinisya okuva mu njuyi egy'o bukiika obugooda egikomererayo; ne nkutuusya ku nsozi gy'e Isiraeri: ³ era ndikubba omutego gwo ni ngutoola mu mukono gwo omugooda, ni ngwisa obusaale bwo mu mukono gwo omulyo. ⁴ Oligwa ku nsozi gye Isiraeri, iwe n'e igye lyo lyonalyona n'a mawanga agali na iwe: ndikuwaayo eri enyonyi egy'a mairu egy'e ngeri gyonagyona n'eri ensolo egy'o mu nsiko okuliibwa. ⁵ Oligwa ku itale mu ibbanga: kubanga nze nkitumwire, bw'atumula Mukama Katonda. ⁶ Era ndiweererya omusyo ku Magogi, n'o ku abo abatyama ku bizinga nga babulaku kye batya: kale balimanya nga ninze Mukama. ⁷ Era ndimanyisya eriina lyange eitukuvu wakati mu bantu bange Isiraeri; so tindiganya eriina lyange eitukuvu okulivuma ate: kale amawanga galimanya nga ninze Mukama, Omutukuvu mu Isiraeri. ⁸ Bona, kiiza, era kirikolebwa, bw'atumula Mukama Katonda; luno niilwo lunaku lwe natumwireku. ⁹ N'abo abatyama mu bibuga by'e Isiraeri balifuluma, ni babiteekaku omusyo ebyokulwanisya, engabo era n'o bugabo, emitego n'o busaale, n'e miigo egy'o mu mukono n'a masimu, balibibiikiryaku omusyo emyaka musanvu: ¹⁰ n'o kutyaba ne batatyaba enku mu itale so tibaliteka nku gyonagyona mu kibira; kubanga balibiteekaku omusyo ebyokulwanisya: era balinyaga abo abaabanyaganga, era balibatoolaku abo abatoolangaku, bw'a tumula Mukama Katonda. ¹¹ Awo olulituuka ku lunaku olwo ndiwa Googi ekifo eky'okuziikamu mu Isiraeri, ekiwonvu ky'abo ababitiremu ku luuyi olw'e nyanza olw'ebuvaisana: era kiriziyizya abo ababitamu: era baliziika eyo Googi n'o lufulube lwe lwonalwona: kale balikyeta nti Kiwonvu Kamonugoogi. ¹² Era enyumba ya Isiraeri balimala emyezi musanvu nga babaziika, balongoosye ensi. ¹³ Niiwo awo, abantu bonabona ab'omu nsi balibaziika; era kiribba kya watyanu gye bali ku lunaku lwe ndigulumizibwa, bw'atumula Mukama Katonda. ¹⁴ Era balyawulamu abasaiza okubba n'o mulimu ogw'o lutalekula, ababitanga mu nsi okuziika abo abalibitamu, abalisigala ku maiso g'e nsi, okugirongoosya: emyezi musanvu nga giweireku balisagira. ¹⁵ N'a bo ababita mu nsi balibitamu; awo omuntu yenayena bw'e yabonanga eigumba ly'o muntu, kale yasimbangaku akabonero, okutuusya abaziiki lwe baliziika mu kiwonvu Kamonugoogi. ¹⁶ Era walibbaawo ekibuga ekiryetebwa Kamona. Batyo bwe balirongoosya ensi. ¹⁷ Wena, omwana w'o muntu, Ati bw'atumula Mukama Katonda nti tumula n'e nyonyi egy'e ngeri gyonagyona na buli nsolo ey'o mu nsiko nti Mukuŋaane mwize; mukuŋaane enjuyi gyonagyona eri sadaaka yange gye mbaweerayo, sadaaka enene ku nsozi gye Isiraeri, mulye enyama, munywe omusaayi. ¹⁸ Mulirya enyama ey'a b'a maani, ni munywa omusaayi gw'a balangira ab'e nsi, ogw'e ntama enume n'o gw'a baana b'e ntama n'o gw'e mbuli, n'o gw'e nte enume, gyonagyona gye sava egye Basani. ¹⁹ Era mulina amasavu ni mwikuta, ni munywa omusaayi ni mutamiira, ku sadaaka yange gye mbaweereireyo. ²⁰ Era mulikutira mu idiiro lyange embalaasi n'a magaali, abasaiza ab'a maani n'a basaiza bonabona abalwani, bw'atumula Mukama Katonda. ²¹ Era nditeeka ekitiibwa kyange mu mawanga, n'a mawanga gonagona galibona omusango gwange gwe ntuukiriurye, n'o mukono gwange gwe mbatekereku. ²² Kale enyumba ya Isiraeri balimanya nga ninze Mukama Katonda waabwe okuva ku lunaku olwo n'o kweyongerayo. ²³ N'a mawanga galimanya ng'e nyumba ya Isiraeri baabire mu busibe olw'o butali butuukirivu bwabwe; kubanga bansoberye ni mbagisa amaiso gange: kale ni mbawaayo mu mukono gw'a balabe baabwe, ni bagwa bonabona n'e kitala. ²⁴ Ng'o butali bulongoofu bwabwe bwe bwabbaire era ng'okusobya kwabwe bwe kwabbaire, ntyo bwe nabakolere; ne mbagisa amaiso gange. ²⁵ Mukama Katonda kyava atumula Ati nti Atyanu nairyawo obusibe bwa Yakobo, ne nsaasira enyumba yonayona eya Isiraeri; era ndikwatirwa eriina lyange eitukuvu buyaaka. ²⁶ Era balibbaaku ensoni gyabwe n'o kusobya kwabwe kwonakwona kwe bansobya, bwe balityama mu nsi yaabwe nga babulaku kye batya, so nga wabula alibatiisya; ²⁷ bwe ndibba nga mbairiryewo okubatoola mu mawanga, era nga mbakuŋaanyirye okuva mu nsi egy'abalabe baabwe, era nga ntukuzibwa mu ibo mu maiso g'a mawanga mangi. ²⁸ Kale balimanya nga ninze Mukama Katonda waabwe, kubanga nabasiindikire mu busibe mu mawanga, era nga mbakuŋaanyirye mu nsi yaabwe ibo; so tindireka ate n'o mumu ku ibo okubba eyo; ²⁹ so tindibagisa ate maiso gange: kubanga nfukire omwoyo gwange ku nyumba y'e Isiraeri; bw'atumula Mukama Katonda.