¹ Omukono gwa Mukama gwabbaire ku nze, n'a ntwala n'a nfulumirya mu mwoyo gwa Mukama, n'a njikya wakati mu kiwonvu; kale nga kiizwire amagumba; ² n'a gambityaku okugeetooloola: kale, bona, nga mangi inu mu kiwonvu mu ibbanga; era, bona, makalu inu. ³ N'ankoba nti mwana w'o muntu, amagumba gano gasobola okubba amalamu? Ni ngiramu nti Ai Mukama Katonda, niiwe omaite. ⁴ N'ankoba ate nti Lagulira ku magumba gano ogakobe nti Ai imwe amagumba amakalu, muwulire ekigambo kya Mukama. ⁵ Ati Mukama Katonda bw'akoba amagumba gano nti bona, ndiyingirya omwoka mu imwe; kale mulibba balamu: ⁶ Era ndibateekaku ebinywa, era ndireeta enyama ku imwe, ni mbabiikaku oluwu, ni mbateekamu omwoka, kale mulimanya nga ninze Mukama. ⁷ Awo ni ndagula nga bwe nalagiirwe: awo bwe nabbaire nga ndagula, ni wabbaawo eidoboozi, era, bona, ekikankano ky'e nsi, amagumba ni geegaita buli igumba n'e igumba liinalyo. ⁸ Awo ni moga, era, bona, nga kuliku ebinywa, omubiri ni gwiza, eidiba ne ligabiikaku waigulu: naye nga mubula mwoka mu igo. ⁹ Awo n'a nkoba nti Lagula empewo, lagula, omwana w'o muntu, okobe empewo nti Ati bw'atumula Mukama Katonda nti iza okuva eri empewo eina, ai omoka, ofuuwe ku bano abaitibwe, babbe abalamu. ¹⁰ Awo ni ndagula nga bwe yandagiire, omwoka ni gubayingira, ni babba balamu, ne beemerera ku bigere byabwe, eigye lingi inu. ¹¹ Awo n'ankoba nti mwana w'o muntu, amagumba gano niiyo nyumba yonayona eya Isiraeri: bona, batumula nti Amagumba gaisu gakalire, n'e isuubi lyaisu ligotere; tumaliibwewo dala. ¹² Kale lagula okobe nti Ati bw'atumula Mukama Katonda nti bona, ndyasamya amagombe ganyu, ni mbaniinisya okuva mu magombe ganyu, ai abantu bange: era ndibayingirya mu nsi ya Isiraeri. ¹³ Kale mulimanya nga ninze Mukama, bwe ndibba nga njasamirye amagombe ganyu, ni mbaniinisya okuva mu magombe ganyu, ai abantu bange. ¹⁴ Era nditeeka omwoyo gwange mu imwe, era mulibba balamu, era ndibateeka mu nsi yanyu imwe: kale mulimanya nga ninze Mukama ntumwire, era n'okutuukirirya ne nkituukirirya, bw'atumula Mukama. ¹⁵ Ekigambo kya Mukama ni kingizira ate nga kitumula ¹⁶ Wena, mwana w'o muntu, irira omwigo gumu, oguwandiikeku nti gwa Yuda, era gwa baana ba Isiraeri bainaye: kaisi oirire omwigo ogundi oguwandiikeku nti Gwa Yusufu, omwigo gwa Efulayimu, era gwe nyumba yonayona eye Isiraeri bainaye: ¹⁷ kale ogyegaitire gyombiri okubba omwigo ogumu, gibbe gumu mu mukono gwo. ¹⁸ Awo abaana b'a bantu bo bwe balitumula naiwe nga bakoba nti Tootunyonyole makulu bwe gali g'oleeta na gino? ¹⁹ n'obakoba nti ati bw'atumula Mukama Katonda nti Bona, ndiririra omwigo gwa Yusufu, oguli mu mukono gwa Efulayimu, n'ebika bya Isiraeri bainaye; era ndibateeka wamu nagwo, wamu n'o mwigo gwa Yuda, ne mbafuula omwigo gumu, kale ne babba gumu mu mukono gwange. ²⁰ N'e miigo gy'o wandiikireku giribba mu mukono gwo mu maiso gaabwe. ²¹ N'obakoba nti Ati bw'atumula Mukama Katonda nti bona, nditoola abaana ba Isiraeri wakati mu mawanga, gye baabire, ni mbakuŋaanirya enjuyi gyonagyona, ni mbaleeta mu nsi yaabwe ibo: ²² kale ndibafuula eigwanga erimu mu nsi ku nsozi gya Isiraeri; era kabaka omumu niiye alibba kabaka waabwe bonabona: so tebalyawulibwa ate okubba obwakabaka bubiri n'akadiidiiri: ²³ so tibalyeyonoona ate n'e bifaananyi byabwe waire n'e bintu byabwe eby'e mizizyo waire n'okusobya kwabwe kwonakwona: naye ndibalokola okuva mu nyumba gyabwe gyonana, mwe bakoleranga ebibbiibi, ni mbalongoosya: kale batyo baabbanga bantu bange, nzena nabbanga Katonda waabwe. ²⁴ N'o mwidu wange Dawudi niiye alibba kabaka waabwe; era bonabona balibba n'o musumba mumu: era n'okutambuba balitambulira mu misango gyange ni bakwata amateeka gange ni bagakola. ²⁵ Era balibba mu nsi gye nawaire Yakobo omwidu wange bazeiza banyu babbe kale balibba omwo, ibo n'abaana baabwe n'abaana b'abaana baabwe emirembe gyonagyona: era Dawudi omwidu wange niiye yabbanga omulangira waabwe emirembe gyonagyona. ²⁶ Era ate ndiragaana nabo endagaanu ey'e mirembe, yabbanga ndagaani eteriwaawo gye bali: era ndibateekawo ni mbairya, era nditeeka awatukuvu wange wakati mu ibo emirembe gyonagyona. ²⁷ Era n'e weema yange yabbanga nabo: nzena naabbanga Katonda waabwe, boona babbanga bantu bange. ²⁸ Kale amawanga galimanya nga ninze Mukama atukwiirye Isiraeri, awatukuvu wange bwe waabbanga wakati mu ibo emirembe gyonagyona.