¹ Awo ekigambo kya Mukama ne kingizira nga kitumula nti ² Mwana w'o muntu, tumula n'a baana b'a bantu bo obakobe nti Bwe ndeetanga ekitala ku nsi, abantu ab'o mu nsi bwe batoolanga omusaiza wakati mu ibo ne bamuteekawo okubba omukuumi waabwe: ³ bw'abona ekitala nga kiiza ku nsi, oba nga afuuwa eikondeere n'alabula abantu; ⁴ kale buli awulira okuvuga kw'e ikondeere n'atalabuka, ekitala bwe kiiza ne kimutoolawo, kale omusaayi gwe gwabbanga ku mutwe gwe iye. ⁵ Awuliira okuvuga kw'e ikondeere n'atalabuka; omusaayi gwe gwabbanga ku niiye: naye singa alabukire yandiwonyerye emeeme ye. ⁶ Naye omukuumi bw'abonanga ekitala nga kiiza, n'atafuuwa ikondeere, abantu ni batalabulwa, ekitala ni kiiza, ni kitoola mu ibo omuntu yenayena; kale ng'atooleibwewo mu butali butuukirivu bwe, naye omusaayi gwe ndiguvunaana mu mukono gw'o mukuumi. ⁷ Wena otyo, omwana w'o muntu, nkuteekerewo okubba omukuumi eri enyumba ya Isiraeri; kale, owuliranga ekigambo eri omunwa gwange, obawenga okulabula okuva gye ndi: ⁸ Bwe nkobanga omubbiibbi nti Ai omubbiibi, tolireka kufa, n'otatumula kulabula omubbiibi okuva mu ngira ye; omuntu oyo omubbiibi alifiira mu butali butuukirivu bwe, naye omusaayi gwe ndiguvunaana mu mukono gwo. ⁹ Era naye bw'olabulanga omubbiibi engira ye okukyuka okugivaamu, n'atakyuka okuva mu ngira ye; alifiira mu butali butuukirivu bwe, naye iwe ng'o wonyerye emeeme yo. ¹⁰ Wena, omwana w'o muntu, koba enyumba ya Isiraeri nti mutumula muti nti okusobya kwaisu n'o kwonoona kwaisu kuli ku niife, era tuyongoberera mu ikwo; kale twandibbaire tutya abalamu? ¹¹ Bakobe nti nga bwe ndi omulamu, bw'a tumula Mukama Katonda, mbula isanyu lye nsanyukira okufa kw'o mubbiibi: wabula omubbiibi akyuke ave mu ngira ye abbe omulamu: mukyuke, mukyuke okuva mu mangira ganyu amabbiibi; kubanga mutakira ki okufa, ai enyumba ya Isiraeri? ¹² Wena, omwana w'o muntu, koba abaana b'abantu bo nti obutuukirivu obw'o mutuukirivu tibulimuwonyerya ku lunaku olw'okusobya kwe; n'o bubbiibi obw'o mubbiibi tibulimugwisya ku lunaku lw'a kyuka okuleka obubbiibi bwe: so n'oyo alina obutuukirivu talisobola kubba mulamu olw'obwo ku lunaku lw'ayonoona. ¹³ Bwe nkoba omutuukirivu nga talireka kubba mulamu; bw'eyesiganga obutuukirivu bwe, n'akola obutali butuukirivu, tiwalibba ku bikolwa bye eby'o butuukirivu ebirijukirwa; naye mu butali butuukirivu bwe bw'akolere omwo mw'alifiira. ¹⁴ Ate bwe nkoba omubbiibi nti tolireka kufa; bweyakyukanga okuleka okwonoona kwe n'akola ebyo ebyalagiirwe eby'ensonga; ¹⁵ omubbiibi bw'airyangayo omusingo, n'airyawo ekyo kye yanyagire, n'atambulira mu mateeka ag'obulamu, nga abulaku butali, butuukirivu bw'akola; talireka kubba mulamu, talifa. ¹⁶ Tiwalibba ku bibbiibi bye bye yakolere ebiriijukirwa eri iye: akolere ebyo ebyalagiirwa eby'e nsonga; talireka kubba mulamu. ¹⁷ Era naye abaana b'a bantu bo batumula nti Engira ya Mukama tiyekankana: naye ibo engira yabwe niiyo etiyekankana. ¹⁸ Omutuukirivu bw'a kyukanga okuleka obutuukirivu bwe n'akola obutali butuukirivu, n'okufa alifiira omwo. ¹⁹ Era omubbiibi bw'a kyukanga okuleka obubbiibi bwe n'akola ebyo ebyalagiirwe eby'e nsonga, alibba mulamu olw'ebyo. ²⁰ Era naye mutumula nti engira ya Mukama teyekankana. Ai enyumba ya Isiraeri, ndibasalira omusango buli muntu ng'a mangira ge bwe gali. ²¹ Awo olwatuukire mu mwaka ogw'eikumi n'eibiri ogw'o kusibibwa kwaisu, mu mwezi ogw'e ikumi ku lunaku olw'omwezi olw'okutaanu omumu eyabbaire awonere mu Yerusaalemi n'aiza gye ndi ng'a tumula nti Ekibuga kikubbiibwe. ²² Awo omukono gwa Mukama gwabbaire nga gubbaire ku ninze akawungeezi, iye awonere nga kaali kwiza; era yabbaire ayasamirye omunwa gwange okutuusya lwe yaizire gye ndi amakeeri; omunwa gwange ni gwasama, ni ntabba kasiru ate. ²³ Awo ekigambo kya Mukama ne kinvizira nga kitumula nti ²⁴ Mwana w'o muntu, abo abali mu bifo ebyo ebyazikire eby'o mu nsi ye Isiraeri batumula nti Ibulayimu yabbaire mumu, naye n'asikira ensi: naye ife tuli bangi; ensi etuweweibwe okubba obusika. ²⁵ Kale obakobe nti Ati bw'a tumula Mukama Katonda nti mulya ekirimu omusaayi, ne muyimusya amaiso ganyu eri ebifaananyi byanyu ni muyiwa omusaayi, era mulirya ensi? ²⁶ Mwema ku kitala kyanyu, mukola eby'e mizizyo, ni mwonoona buli muntu mukali wa mwinaye: era mulirya ensi? ²⁷ Oti bw'obba obakoba nti ati bw'a tumula Mukama Katonda nti nga bwe ndi omulamu, mazima abo abali mu bifo ebyazikire baligwa n'e kitala, n'oyo ali mu itale ewanza ndimuwaayo eri ensolo okuliibwa, n'abo abali mu bigo n'o mu mpuku balifa kawumpuli. ²⁸ Era ndifuula ensi okubba amatongo n'e kyewuunyo, n'amalala ag'o buyima bwayo galikoma; n'e nsozi gya Isiraeri girigisibwawo, omuntu yenayena aleke okubitamu. ²⁹ Kale Kaisi ni bamanya nga ninze Mukama, bwe ndibba nga nfiire ensi okubba amatongo n'e kyewuunyo olw'emizizyo gyabwe gyonagyona gye bakolere. ³⁰ Wena, omwana w'o muntu, abaana b'a bantu ibo bakutumulaku awali ebisaakaate n'o mu miryango egy'e nyumba, ni bakobagana, buli muntu ng'a koba mugande we nti mwize, mbeegayiriire, muwulire ekigambo ekiviire eri Mukama. ³¹ Ni baiza gy'oli ng'abantu bwe baizire, ne batyama mu maiso go ng'a bantu bange ni bawulira ebigambo byange naye ni batabikola: kubanga boolesya okutaka kungi n'o munwa gwabwe, naye omwoyo gwabwe gusengererya amagoba gaabwe. ³² Era, bona, oli gye bali ng'o lwembo olusa einu olw'omuntu alina eidoboozi erisanyusya einu, era amaani okukubba obusa enanga: kubanga bawulira ebigambo byo, naye ni batabikola. ³³ Awo ebyo bwe birituukirira (bona, biiza), kale kaisi ni bamanya nga nabbi abbaire mu ibo.