¹ Awo olwatuukire mu mwaka ogw'e ikumi n'eibiri, mu mwezi ogw'e ikumi n'eibiri ku lunaku olw'o mwezi olw'o luberyeberye ekigambo kya Mukama ne kingizira nga kitumula nti ² Mwana w'o muntu, tandika okukungubagira Falaawo kabaka w'e Misiri omukobe nti Wafaananyizibwe empologoma entonto ey'o mu mawanga: era naye oli ng'ogusota oguli mu nyanza; n'o waguza wamu n'emiiga gyo, n'o tabangula amaizi n'ebigere byo, n'o yonoona emiiga gyago: ³ Ati bw'atumula Mukama Katonda nti Ndikusuulaku obutiimba gwange n'e kibiina eky'a mawanga amangi; era balikuvuba n'obutiimba bwange. ⁴ Era ndikuleka ku lukalu ne nkusuula ku itale ewanza, ni nkutoolesyaaku enyonyi gyonagyona egy'omu ibbanga, wena ndikwikutya ensolo egy'o mu nsi gyonagyona bwe gyekankana. ⁵ Era nditeeka omubiri gwo ku nsozi ni ngizulya ebiwonvu obugulumivu bwo. ⁶ Era ndifukirira ensi gy'o gweramu n'o musaayi gwo, okutuuka no ku nsozi; n'e nsalosalo girikwizula: ⁷ Awo bwe ndikumalawo, ndibiika ku igulu ne nfuula emunyeenye gyamu okubbaaki endikirirya; era ndibiika ekireri ku isana, so n'o mwezi tigulireeta kwaka kwagwo. ⁸ Etabaaza gonagyona egy'o mu igulu egyakaayakana ndigireetaku endikirirya waigulu wo, ni nteeka endikirirya ku nsi yo, bw'atumula Mukama Katonda. ⁹ Era ndyeraliikirirya emyoyo gy'a mawanga amangi, bwe ndituusya okuzikirira kwo mu mawanga, mu nsi gy'otomanyanga. ¹⁰ Niiwo awo, ndikusamaaliririrya amawanga mangi, na bakabaka baabwe balitya inu dala ku lulwo, bwe ndigalula ekitala kyange mu maiso gaabwe; era balitengera buli kaseera, buli muntu ng'atengerera obulamu bwe iye, ku lunaku olw'okugwa kwo. ¹¹ Kubanga ati bw'atumula Mukama Katonda nti ekitala kya kabaka w'e Babulooni kirituuka ku iwe. ¹² Ndigwisya olufulube lwo n'ebitala eby'a b'a maani; bonabona be ntiisya bo mu mawanga: era balinyaga amalala ge Misiri, n'olufulube lwayo lwonalwona lulizikirizibwa. ¹³ Ndizikirirya ensolo gyayo gyonagyona okuva awali amaizi amangi; so n'ekigere ky'abantu tekirigatabangula ate, so n'ebinuulo eby'e nsolo tebirigatabangula. ¹⁴ Kale kaisi ni ntangaalirya amaizi gaabwe, ni nkulukutya emiiiga gyabwe ng'a mafuta, bw'a tumula Mukama Katonda. ¹⁵ Bwe ndirekesyaawo ensi y'e Misiri ni ngizikya, ensi ebulamu ebyo bye yaizulanga, bwe ndisumita abo bonabona abalimu, kale Kaisi ni bamanya nga ninze Mukama. ¹⁶ Kuno niikwo kukungubaga kwe balikungubaga; abawala ab'a mawanga balikungubaga batyo: balikungubagira Misiri n'o lufulube lwamu lwonalwona batyo, bw'atumula Mukama Katonda. ¹⁷ Era olwatuukire mu mwaka ogw'e ikumi n'eibiri ku lunaku olw'omwezi olw'e ikumi n'e itaanu ekigambo kya Mukama ni kingizira nga kitumula nti ¹⁸ Mwana w'o muntu, kubbira ebiwoobe olufulube lw'e Misiri, obasuule wansi, iye n'abawala ab'amawanga agaayatiikiriire, mu njuyi egy'e nsi egye wansi, wamu n'abo abaika mu bwina. ¹⁹ Osinga yani obusa? serengeta oteekebwe wamu n'a batali bakomole: ²⁰ Baligwa wakati mu abo abaitibwa n'e kitala: aweweibweyo eri ekitala: mutoolewo n'olufulube lwe lwonalwona. ²¹ Ab'a maani ab'o buyinza balitumula naye nga beema wakati, mu magombe wamu n'abo abamuyamba: baserengetere, bagalamiire, basirikire, abatali bakomole abaitibwa n'e kitala. ²² Asuli ali eyo n'ekibiina kye kyonakyona; amalaalo ge gamwetooloire: bonabona baitiibwe, bagwire n'e kitala: ²³ amalaalo gaabwe gateekeibwe mu njuyi egy'ebiina egikomererayo, n'ekibiina kye kyetooloire amagombe ge: bonabona baitiibwe bagwire n'e kitala, abaaleetanga entiisya mu nsi ey'a balamu. ²⁴ Eriyo Eramu n'olufulube lwe lwonalwona nga beetooloire amagombe ge: bonabona baitiibwe, bagwire n'e kitala, abaitire nga ti bakomole mu njuyi egy'ensi egya wansi, abaaleetanga entiisya yaabwe mu nsi ey'abalamu, ni babbaaku ensoni gyabwe wamu n'abo abaika mu biina. ²⁵ Bamusimbiire ekitanda wakati mu abo abaitiibwe wamu n'o lufulube lwe lwonalwona amagombe ge gamwetooloire: bantu ti bakomole, abaitiibwe n'e kitala kubanga entiisya yaabwe yaleetebwa nga mu nsi ey'abalamu, ne babbaaku ensoni gyabwe wamu n'abo abaika mu biina: ateekeibwe wakati mu abo abaitiibwe. ²⁶ Eriyo Meseki; Tubali, n'o lufulube lwe lwonalwona amagombe ge gamwetooloire: bonabonna abatali bakomole, abaitiibwe n'e kitala; kubanga baaleetanga entiisya yaabwe mu nsi ey'a balamu. ²⁷ So tebaligalamira wamu n'a b'a maani abagwire ku batali bakomole, abaitire mu magombe nga balina eby'o kulwanisya byabwe n'e bitala byabwe nga biteekeibwe ku mitwe gyabwe, n'o butali butuukirivu bwabwe buli ku magumba gaabwe; kubanga baabbanga ntiisya eri ab'a maani mu nsi ey'a balamu. ²⁸ Naye olimenyekera wakati mu batali bakomole, era oligalamira wamu n'abo abaitiibwe n'e kitala. ²⁹ Eriyo Edomu, bakabaka be n'a bakungu be, abateekeibwe mu maani gaabwe awamu n'abo abaitiibwe n'e kitala: baligalamira n'a batali bakomole n'abo abaika mu biina. ³⁰ Eriyo abalangira ab'o bukiika obugooda, bonabona, n'Abasidoni bonabona, abaikire n'abo abaitiibwe; waire nga baleetere entiisya olw'a maanyi gaabwe, bakwatiibwe ensoni; era bagalamiire nga ti bakomole wamu n'abo abaitiibwe n'ekitala, ne babbaaku ensoni gyabwe wamu n'abo abaika mu biina. ³¹ Falaawo alibabona, n'asanyusibwa olw'o lufulube lwe lwonalwona: Falaawo n'eigye lye lyonalyona abaitiibwe n'e kitala, bw'a tumula Mukama Katonda. ³² Kubanga nteekere entiisya ye mu nsi ey'abalamu: era aliteekebwa wakati mu batali bakomole wamu n'abo abaitiibwe n'e kitala, iye Falaawo n'o lufulube lwe lwonalwona, bw'atumula Mukama Katonda.