¹ Ekigambo kya Mukama ne kingizira ate nga kitumula nti ² Mwana w'o muntu, koba omulangira w’e Tuulo nti ati bw'atumula Mukama Katonda nti Kubanga omwoyo gwo gugulumiziibwe n'o tumula nti ninze katonda, ntyaime ku ntebe ya Katonda wakati mu nyanza: era naye oli muntu buntu so ti Katonda, waire nga wasimbire Omwoyo gwo ng'omwoyo gwa Katonda: ³ bona, olina amagezi okusinga Danyeri; wabula kyama kye basobola okukugisa: ⁴ weefuniire obugaiga olw'a magezi go n'o kutegeera kwo, n'o funa ezaabu n'e feeza mu by'o bugaiga byo! ⁵ oyongeire obugaiga bwo olw'a magezi go amangi n'o lw'o kusuubula kwo, n'o mwoyo gwo gugulumizibwa olw'o bugaiga bwo. ⁶ Mukama Katonda kyava atumula ati nti Kubanga osimbire Omwoyo gwo ng'o mwoyo gwa Katonda; ⁷ bona, kyendiva nkuleetaku banaigwanga, ab'e ntiisya ab'o mu mawanga: kale balisowola ebitala byabwe okulwanisya obusa obw'a magezi go, era balyonoona okumasamasa kwo. ⁸ Balikwikya mu biina; era olifa ng'a ibo bwe bafiire abaitiirwe mu mwoyo gw'e nyanza. ⁹ Olyeyongera ate okukobera mu maiso g'oyo akwita nti ninze Katonda? naye oli muntu buntu so ti Katonda mu mukono gw'oyo akusumita. ¹⁰ Olifa ng'aibo bwe bafiire abatali bakomole n'o mukono gwa banaigwanga: kubanga nze nkitumwire, bw'atumula Mukama Katonda. ¹¹ Era ate ekigambo kya Mukama ne kingizira nga kitumula nti ¹² Mwana w'o muntu, tandika okukungubagira kabaka w'e Tuulo omukobe nti ati bw'atumula Mukama Katonda nti oteeka akabonero ku muwendo, ng'oizwire amagezi, ng'olingiriire obusa. ¹³ Wabbaire mu Adeni olusuku lwa Katonda; buli ibbaale ery'o muwendo omungi lyabbanga ly'o kukubiikaku, sadio, topazi, ne alimasi, berulo, sokamu, ne yasepi, safiro, eibbaale erya nawandagala, ne kabunkulo, n'e zaabu: emirimu egy'ebitaasa byo n'e gy'e ndere gyo gyabbaire mu iwe; gyategekeibwe ku lunaku kwe watonderwe. ¹⁴ Wabbaire kerubi eyafukibwiiku amafuta abiikaku: era ninze nakusimbire n'o kubba n'o bba ku lusozi lwa Katonda olutukuvu; watambwire eruuyi n'e ruuyi wakati mu mabbaale ag'o musyo. ¹⁵ Wabbaire ng'o tuukiriire mu mangira go okuva ku lunaku kwe watonderwe okutuusya obutali butuukirivu lwe bwabonekere mu iwe. ¹⁶ Bakwizwiirye wakati ekyeju olw'olufulube olw'o kusuubula kwo, n'oyonoona: kyenviire nkusuula nga nkutoola ku lusozi lwa Katonda nga nkulanga obwonoonefu; era nkuzikirirya, ai kerubi abiikaku, okuva wakati mu mabbaale ag'o musyo. ¹⁷ Omwoyo gwo gwagulumiziibwe olw'o busa bwo, wakyamirye amagezi go olw'o kumasamasa kwo: nkuswire wansi, nkutaire mu maiso ga bakabaka, bakulingirire. ¹⁸ Wayonoonere ebifo by'o ebitukuvu olw'o lufulube olw'o butali butuukirivu bwo mu kusuubula kwo okutali kwa mazima; kyenviire ntoola omusyo wakati mu iwe, gukwokyerye, era nkufiire ikoke ku itakali mu maiso g'abo bonabona abakulingirira. ¹⁹ Abo bonabona abakumaite mu mawanga balikwewuunya: ofuukire entiisya so toobbengawo ate enaku gyonagyona. ²⁰ Awo ekigambo kya Mukama ne kingizira nga kitumula nti ²¹ Mwana w'o muntu, simba amaiso go okwolekera Sidoni kiragule, ²² otumule nti ati bw'atumula Mukama Katonda nti bona, nze ndi mulabe wo, ai Sidoni; era ndigulumizibwa wakati mu iwe: kale balimanya nga ninze Mukama, bwe ndimala okutuukiririrya mu ikyo emisango, ne ntukuzibwa mu ikyo ²³ Kubanga ndiweererya mu ikyo kawumpuli n'o musaayi mu nguudo gyakyo; n'abaliku ebiwundu baligwa wakati mu ikyo, ekitala nga kikirumba enjuyi gyonagyona; kale balimanya nga ninze Mukama. ²⁴ Kale tewalibbaawo ate omufuwandizi ogusumita eri enyumba ya Isiraeri waire eiwa erinakuwalya ku abo bonabona ababeetooloire, abaabagiriranga ekyeju; kale balimanya nga ninze Mukama Katonda. ²⁵ Ati bw'atumula Mukama Katonda nti Bwe ndibba nga malire okukuŋaanya enyumba ya Isiraeri okubatoola mu mawanga, mwe baasaansaanyiziibwe, ne ntukuzibwa mu ibo mu maiso g'a mawanga, kale balityama mu nsi yaabwe gye nawaire omwidu wange Yakobo. ²⁶ Era balityama omwo mirembe; niiwo awo, balizimba enyumba ne basimba ensuku egy'e mizabbibu, ne batyama mirembe nga babulaku kye batya; bwe ndibba nga malire okutuukirirya emisango ku abo bonabona ababagiriire ekyeju ababeetooloire; kale balimanya nga ninze Mukama Katonda waabwe.