¹ Awo ekigambo kya Mukama ne kingizira nga kitumula nti ² Omwana w'omuntu, simba amaiso go okwolekera e Yerusaalemi, otonyesye ekigambo kyo okwolekera ebifo ebitukuvu, olagulire ku nsi ye Isiraeri; ³ okobe ensi ye Isiraeri nti Ati bw'atumula Mukama nti bona, ndi mulabe wo, era ndisowola ekitala kyange ne nkitoola mu kiraato kyakyo, ni nkumaliramu dala omutuukirivu n'o mubbiibi. ⁴ Kale kubanga ndikumaliramu dala omutuukirivu n'o mubbiibi, ekitala kyange kyekiriva kifuluma mu kiraato kyakyo okutabaala bonabona abalina omubiri, okuva obukiika obulyo okutuuka obukiika obugooda: ⁵ kale bonabona abalina omubiri balimanya nga ninze Mukama nsowoire ekitala kyange ne nkitoola mu kiraato kyakyo; tekiriira ate lw'o kubiri. ⁶ Kale teeka ebiikowe, iwe mwana w'omuntu; amabega go nga gakusonjokere era ng'oliku obwinike bw'oliweera ebiikowe otyo ibo nga babona. ⁷ Kale olwatuuka bwe bakukobba nti lwaki iwe okuteeka ebiikowe? n'otumula nti Olw'ebigambo ebiwuliirwe, kubanga biiza: na buli mwoyo gulisaanuuka, n'emikono gyonagyona giriyongobera, na buli mwoyo gulizirika, n'amakumbo gonagona galibba manafu ng'amaizi: Bona, biiza, era birikolebwa, bw'atumula Mukama Katonda. ⁸ Awo ekigambo kya Mukama ne kingizira nga kitumula nti ⁹ Mwana w'o muntu, lagula otumule nti ati bw'atumula Mukama nti tumula nti ekitala, ekitala kiwagairwe era kizigwirwe: ¹⁰ kiwagairwe kiite ekiwendo; kizigwiirwe kibbe ng'enjota: kale twasanyuka? omwigo ogw'omwana we gunyooma buli musaale. ¹¹ Era kiweweibweyo okuzigulwa, kaisi kikwatibwe: ekitala kiwagairwe, niiwo awo, kizigwirwe, okukiwaayo mu mukono gw'o mwiti. ¹² Kunga era wowogana, omwana w'omuntu: kubanga kiri ku bantu bange, kiri ku bakungu bonabona aba Isiraeri: baweweibweyo eri ekitala wamu n'abantu bange: kale kubba ku kisambi kyo. ¹³ Kubanga waliwo okusala omusango; era kiriba kitya omwigo gwona ogugaya bwe gulibba nga tigukaali guliwo? bw'atumula Mukama Katonda. ¹⁴ Kale iwe, mwana w'o muntu, lagula okubbe mu ngalo; ekitala kyongerwe omulundi ogw'o kusatu, ekitala eky'abasumitiibwe okufa: niikyo kitala ky'omukulu, asumitiibwe okufa, ekiyingira mu bisenge byabwe. ¹⁵ Nteekere omumwa gw'ekitala ku miryango gyabwe gyonagyona, omumwoyo gwabwe gusaanuuke n'okwesiitala kwabwe kwongerwe inu: ee! kifuukire ng'enjota, kisongoirwe olw'okwita. ¹⁶ Weekuŋaanye, tambulira ku mulyo; tala, tambulira ku mugooda; yonnayona amaiso go gye goolekeire. ¹⁷ Era ndikubba mu ngalo, ni ngikutya ekiruyi kyange: nze Mukama nkitumwire. ¹⁸ 18 Ekigambo kya Mukama ne kingizira ate nga kitumula nti ¹⁹ Era, omwana w'o muntu, weeteekerewo amangira mabiri ekitala kya kabaka w'e Babulooni mwe kyafuluma; ago gombiri galiva mu nsi imu: obone ekifo, okirambire engira eira mu kibuga we sibuka. ²⁰ Oteekewo engira ekitala mwe kyafuluma okutuuka e Labba eky'a baana ba Amoni n'okutuuka eri Yuda mu Yerusaalemi ekiriku enkomera. ²¹ Kubanga kabaka w'e Babulooni yayemereire mu masaŋangira, amangira gombiri we gasibuka; okulagulwa: yazungiryezungirye obusaale, ne yeebuulya ku baterafi, n'akebera eini. ²² Mu mukono gwe omulyo nga mulimu obulaguli obw'e Yerusaalemi, okusimba ebitomera, okwasamira omunwa okwita, okuyimusya eidoboozi n'okutumulira waigulu, okusimba ebitomera ku miryango, okutuuma ebifunvu, okuzimba ebigo. ²³ Era bulibba gye bali ng'obulaguli obubulamu mu maiso gaabwe ababalayiriire ebirayiro: naye aijukirya obutali butuukirivu, kaisi bakwatibwe. ²⁴ Mukama Katonda kyava atumula ati nti Kubanga mwijukiirye obutali butuukirivu bwanyu, kubanga okusobya kwanyu kubikwirweku, ebibbiibi byanyu n'okuboneka ne biboneka mu bikolwa byanyu byonabyona; kubanga mwijukiirwe, mulikwatibwa n'o mukono. ²⁵ Wena, ai iwe omubbiibi asumitiibwe okufa, omukulu wa Isiraeri, aiziriirwe olunaku lwo, mu biseera eby'obutali butuukirivu obw'enkomerero; ²⁶ ati bw'atumula Mukama Katonda nti Toolawo enkofiira otikuleku engule: ekyo tikiribba ate kityo: gulumizya ebiikaikaine, oikaikanye ebigulumiziibwe. ²⁷ Ndikifuundika, ndikifuundika, ndikifuundika: so n'ekyo tikiribba ate, okutuusya mwene wakyo lw'aliiza, era ndikimuwa. ²⁸ Weena, omwana w'omuntu, lagula otumule nti ati bw'a tumula Mukama Katonda eby'a baana ba Amoni n'e by'o kuvuma kwabwe; otumule nti ekitala, ekitala kisowoirwe, kiziguliirwe ekiwendo, okukiriisya, kibbe ng'enjota: ²⁹ nga bwe bakubonera ebyayangire, nga bwe baakulagula eby'obubbeeyi, okukuteeka ku makoti g'ababbiibi abasumitiibwe okufa abaiziirwe olunaku lwabwe, mu biseera eby'obutali butuukirivu obw'enkomerero. ³⁰ Kiizire mu kiraato kyakyo. Mu kifo mwe watondeirwe, mu nsi mwe wazaaliirwe, mwe ndikusalirira omusango. ³¹ Era ndikufukiraku dala okunyiiga kwange; ndikufuuwaku omusyo ogw'obusungu bwange: era ndikuwaayo mu mukono gw'abantu abali ng'ensolo ab'amagezi okuzikirirya. ³² Olibba nku gy'o musyo; omusaayi gwo gulibba wakati mu nsi; toliijukirwa ate: kubanga ninze Mukama nkitumwire.