¹ Ekigambo kya Mukama kyangiziire ate nga kitumula nti ² Mubbaire mutya n'okugera ni mugerera olugero luno ensi ye Isiraeri nga mutumula nti Baitawabwe baliire eizabbibu eginyuunyuntula n'amainu g'abaana ganyenyeera? ³ Nga bwe ndi omulamu, bw'atumula Mukama Katonda, temulibba ne nsonga ate okugera olugero olwo mu Isiraeri. ⁴ Bona, emeeme gyonagyona gyange; ng'e meeme ya itaaye, n'e meeme y'omwana etyo yange: emeeme ekola ekibbiibi niiyo erifa. ⁵ Naye omuntu bw'abba omutuukirivu n'akola ebyalagiirwe eby'ensonga, ⁶ so nga taliiriire ku nsozi, so nga tayimusirye maiso ge eri ebifaananyi eby'enyumba ya Isiraeri, so nga tayonoonere mukali w'o mwinaye, so nga tasembereire mukali mu biseera eby'okweyawula kwe; ⁷ so nga talyazaamaanyizirye muntu yenayena, naye eyairiryanga omwewoli omusingo gwe, so nga tanyagire muntu yenayena lw'a maani, era eyawanga omuyala emere ye n'abiikanga oyo ali obwereere n'ekivaalo; ⁸ atawolanga lwa magoba, so nga taikiriryanga ebisuukirira byonabyona, eyatoireku omukono gwe ku butali butuukirivu, eyatuukiriryanga omusango ogw'amazima eri omuntu n'o mwinaye, ⁹ eyatambuliranga mu mateeka gange, era eyakwatanga emisango gyange, okukolanga eby'amazima, oyo niiye mutuukirivu talireka kubba mulamu, bw'atumula Mukama Katonda. ¹⁰ Bw'alizaala omwana, omunyagi, ayiwa omusaayi, era akola ku ebyo byonabyona, ¹¹ so atakola ku ebyo byonabyona ebimugwaniire, naye okulya eyaliriire ku nsozi, n'ayonoona mukali w'o mwinaye, ¹² eyalyazaamaanyire omwavu n'eyeetaaga, eyanyagire olw'a maani, so atakolere musingo, era eyayimusirye amaiso ge eri ebifaananyi, eyakolere eby'emizizyo, ¹³ eyawolanga olw'a magoba, era eyaikiriirye ebisuukirira: kale alibba mulamu ono? taliba mulamu: akolere eby'emizizyo bino byonabyona: talireka kufa; omusaayi gwe gulibba ku niiye. ¹⁴ Bona, bw'alizaala omwana, abona ebibbiibi byonabyona ebya itaaye bye yakolere, n'atya n'atakola ebifaanana bityo, ¹⁵ ataliiranga ku nsozi, so atayimusyanga maiso ge eri ebifaananyi eby'enyumba ya Isiraeri, atayonoonanga mukali wa mwinaye, ¹⁶ so atalyazaamaanyanga muntu yenayena, atasingirwanga kintu, so atanyaganga lwa maani, naye eyawanga omuyala emere ye, eyabiikanga oyo ali obwereere n'ekivaalo, ¹⁷ eyatoireku omukono gwe eri omwavu, ataikiriryanga magoba waire ebisuukirira, eyatuukiriryanga emisango gyange, eyatambuliranga mu mateeka gange; oyo talifa lw'o butali butuukirivu bwa itaaye, talireka kubba mulamu. ¹⁸ Itaaye, kubanga yajoogere n'obulalu, n'anyaga mugande we olw'amaani, n'akola ebyo ebitali bisa mu bantu be, bona, alifiira mu butali butuukirivu bwe. ¹⁹ Era naye mutumula nti omwana kiki ekimuloberya okubbaaku obutali butuukirivu bwa itaaye? Omwana bw'abba nga akolere ebyalagiirwe eby'ensonga, era ng'akwaite amateeka gange gonagona, era ng'a gakolere, talireka kubba mulamu. ²⁰ Emeeme eyonoona niiyo erifa: omwana talibaaku butali butuukirivu bwa itaaye, so n'o itaaye talibbaaku butali butuukirivu bw'o mwana we; obutuukirivu obw'o mutuukirivu bulibba ku niiye, n'o bubbiibi obw'o mubbiibi bulibba ku niiye. ²¹ Naye omubbiibi bw'akyukanga okuleka ebibbiibi bye byonabyona bye yakolere n'akwata amateeka gange gonagona, n'akola ebyalagiirwe eby'ensonga, talireka kubba mulamu, talifa. ²² Tiwalibba ku byonoono bye bye yayonoonere ebiriijukirwa ku iye: alibba omulamu mu butuukirivu bwe, bwe yakolere. ²³ Nina eisanyu lye nsanyukira okufa kw'omubbiibi? bw'atumula Mukama Katonda: naye tintaka butaki airewo okuva mu ngira ye abbe omulamu? ²⁴ Naye omutuukirivu bw'akyukanga okuleka obutuukirivu bwe n'akola ebitali by'o butuukirivu n'akola ng'emizizyo gyonagyona bwe giri omuntu omubbiibi gy'akola, alibba mulamu? Tiwalibba ku bikolwa bye eby'o butuukirivu bye yakolere ebiriijukirwa: mu kyonoono kye ky'ayonoonere n'o mu kibbiibi kye ky'akolere, mu ebyo mw'alifiira. ²⁵ Era naye mutumula nti engira ya Mukama teyekankana. Muwulire , ai enyumba ya Isiraeri: engira yange ti niiyo yekankana? amangira ganyu ti niigo gatekankana? ²⁶ Omuntu omutuukirivu bw'akyukanga okuleka obutuukirivu bwe n'akola ebitali byo butuukirivu n'afiira omwo; mu butali butuukirivu bwe bw'akolere mw'alifiira. ²⁷ ate omuntu omubbiibi bw'akyukanga okuleka obubbiibi bwe bw'akolere n'akola ebyo ebyalagiirwe eby'ensonga, aliwonya emeeme ye okufa. ²⁸ Kubanga alowooza n'akyuka okuleka ebyonoono bye byonabyona by'akolere, talireka kubba mulamu, talifa. ²⁹ Era naye enyumba ya Isiraeri batumula nti engira ya Mukama teyekankana. Ai enyumba ya Isiraeri, amangira gange ti ge gekankana? amangira ganyu ti niigo gatekankana? ³⁰ Kyendiva mbasalira omusango, ai enyumba ya Isiraeri, buli muntu ng'amangira ge bwe gali, bw'atumula Mukama Katonda. Mwirewo, mukyuke okuleka ebyonoono byanyu byonabyona; kale obutali butuukirivu buleke okubazikirirya. ³¹ Musuule wala mwena ebyonoono byanyu byonabyona bye mwonoonere; mwekolere omwoyo omuyaka n'omwoyo omuyaka: kubanga kiki ekibatakisya okufa, ai enyumba ya Isiraeri? ³² Kubanga mbula isanyu ly'o kusanyukira lw'o kufa kw'oyo afa, bw'atumula Mukama Katonda: kale mwekyusye muleke okufa.