¹ Natumula mu mwoyo gwange nti Kale, nakukema n'ebinyumu; kale bba n'eisanyu: era, bona, n'ekyo nga niibwo butaliimu. ² Natumwire ku nseko nti Giralukire: no ku binyumu nti Bikola ki? ³ Nasagiire mu mwoyo gwange bwe mba nsanyusya omubiri gwange n'omwenge, omwoyo gwange nga gukaali gunuŋamya n'amagezi, era bwe mba nywezya obusirusiru, ntegeere ebisaanira abaana b'abantu okukola wansi w'eigulu enaku gyonagyona egy'obulamu bwabwe. ⁴ Neekolera emirimu eminene, neezimbira enyumba; neesimbira ensuku egy'emizabbibu; ⁵ neekolera ensuku n'enimiro, ne nsimba omwo emiti egy'ebibala eby'engeri gyonagyona: ⁶ neesimira ebidiba eby'amaizi, okugafukirirya ekibira emisaale mwe gyasimbiibwe: ⁷ nagula abaidu n'abazaana, ne nzaalirwa abaidu mu nyunba yange: era nabbaire n:obugaiga bungi obw'ente n'embuli, okusinga abo bonabona abansookere mu Yerusaalemi: ⁸ era neekuŋaanyirya feeza ne zaabu, n'obugaiga obw'omu buli nsi obwa bakabaka n'obw'omu masaza: neefunira Abasaiza abembi n'abakali abembi, n'ebisanyusa abaana b'abantu, abazaana bangi inu. ⁹ Kale ne mba mukulu, ne neeyongera okusinga bonabona abansookere mu Yerusaalemi: era amagezi gange ne gabba nanze. ¹⁰ Na buli kintu amaiso gange kye geegombanga tinakikobere: tinaziyizire mwoyo gwange obutabona isanyu lyonalyona, kubanga omwoyo gwange gwasanyukire olw'emirimu gyange gyonagyona; era guno niigwo gwabbaire omugabo gwange ogwaviire mu mirimu gyange gyonagyona. ¹¹ Awo Kaisi ne ningirira emirimu gyonagyona emikono gyange gye gyabbaire gikolere n'okutegana kwe nateganire okukola: era, bona, byonbyona butaliimu na kusengererya mpewo, so nga wabula kintu kigasa wansi w'eisana. ¹² Awo ne nkyuka okubona amagezi n'eiralu n'obusirusiru: kubanga omuntu asobola ki airirira kabaka? Asobola ekyo ekyakoleibwe eira. ¹³ Awo ne mbona ng'amagezi gasinga obusirusiru obusa ng'omusana bwe gusinga endikirirya. ¹⁴ Omugezigezi amaiso ge gabba mu mutwe gwe, n'omusirusiru atambulira mu ndikirirya: era naye ne ntegeera nga bonabona ekigambo kimu kibatuukaku. ¹⁵ Awo ne nkoba mu mwoyo gwange nti Ekituuka ku musirusiru era niikyo kirituuka ku nze nzeena; kale musinga mu ki amagezi? Kale ne ntumula mu mwoyo gwange nga n'ekyo butaliimu. ¹⁶ Kubanga n'omugezigezi era nga n'omusirusiru taijukirwa mirembe gyonagyona; kubanga mu biseera ebigenda okwiza byonbyona nga byamalire ira okwerabirwa. Era omugezigezi ng'afa okwekankana n'omusirusiru! ¹⁷ Awo ne nkyawa obulamu; kubanga emirimu egikolebwa wansi w'eisana gyantamire: kubanga byonbyona butaliimu na kusengererya mpewo. ¹⁸ Awo ne nkyawa okutegana kwange kwonakwona kwe nateganire wansi w'eisana: kubanga kiŋwanira okukulekera omusaiza alingiririra. ¹⁹ Era yani amaite oba ng'alibba mugezigezi oba musirusiru, naye alifuga okutegana kwange kwonakwona kwe nateganire, era kwe nayoleseryemu amagezi wansi w'eisana. Era n'ekyo butaliimu. ²⁰ Kyebaviire nkyuka omwoyo gwange ne guwaamu eisuubi ery'okutegana kwonakwona kwe nateganire wansi w'eisana. ²¹ Kubanga wabbairewo omuntu okutegana kwe kulina amagezi n'okumanya n'obukabakaba; naye omuntu atategananga mu ibyo gw'alikulekera okubba omugabo gwe. Era n'ekyo butaliimu na kabbiibi kanene. ²² Kubanga omuntu afuna ki olw'okutegana kwe kwonakwona n'olw'okufuba kw'omwoyo gwe kw'ategana wansi w'eisana? ²³ Kubanga enaku gye gyonagyona bwinike bwereere, n'okufuba kwe kunakuwala; niiwo awo, no mu bwire omwoyo gwe tegubbaaku bwe guwumula. Era n'ekyo butaliimu. ²⁴ Wabula kintu ekigasa omuntu okusinga okulya n'okunywa n'okuliisya emeeme ye ebisa mu kutegana kwe. Era n'ekyo nakiboine nga kiva eri omukono gwa Katonda. ²⁵ Kubanga yani asobola okulya, oba yani asobola okubba n'eisanyu okusinga nze? ²⁶ Kubanga omuntu amusanyusa Katonda gw'awa amagezi n'okumanya n'eisanyu: naye alina ebibbiibi amuwa okutegana, akuŋaanye atuume entuumu, awe oyo asanyusa Katonda. Era n'ekyo butaliimu na kusengererya mpewo.