¹ Ebigambo eby'Omubuulizi, mutaane wa Dawudi, kabaka mu Yerusaalemi. ² Obutaliimu obusinga obutaliimu bwonabwona, bw'atumula Omubuulizi; obutaliimu obusinga obutaliimu bwonabwona, byonabyona butaliimu. ³ Magoba ki omuntu gatoola mu mulimu gwe gwonagwona gw'akola wansi w'eisana? ⁴ Emirembe egindi gyaba, na mirembe egindi giiza; ensi n'e bindi awo enaku gyonagyona. ⁵ Era n'eisana rivaayo, eisana n'erigwa, ni ryanguwa okwaba mu kifo kyalyo gy'eriva. ⁶ Empewo eyaba eri obukiika obulyo, n'ekyukira obukiika obugooda; ekyukakyuka buli kaseera mu kutambula kwayo, empewo n'eira ate mu kwetooloola kwayo. ⁷ Emiiga gyonagyona gyaba mu nyanza, naye enyanza teizula; mu kifo emiiga gye gyaba eyo gye gyaba ate. ⁸ Ebintu byonabyona bizwire obuyondi; omuntu tayinza kubutumula: eriiso ti riikuta kubona, so n'ekitu ti kiikuta okuwulira. ⁹ Ekyabbairewo niikyo kyabangawo; n'ekyo ekyakolebwanga niikyo kyakolebwanga: so wabula kintu kiiza wansi w'eisana. ¹⁰ Waliwo ekintu abantu kye batumulaku nti bona, kino kiyaka? kyamalire okubbaawo mu mirembe egyatusookere. ¹¹ Wabula kwijukira mirembe egy'eira; so ti walibba kwijukira mirembe gy'o luvaanyuma egyaba okwiza mu abo abaliirawo. ¹² Nze Omubuulizi nabbaire kabaka wa Isiraeri mu Yerusaalemi. ¹³ Awo ni nteekayo omwoyo gwange okusagira n'okukeneenya olw'amagezi byonabyona ebikolebwa wansi w'eigulu: niibwo bubalagali obungi Katonda bwe yawaire abaana b'a bantu okubaluma. ¹⁴ Naboine emirimu gyonagyona egikolebwa wansi w'eisana; era, bona, byonabyona butaliimu na kusengeerya mpewo. ¹⁵ Ekikyamire ti kisobola kuluŋamizibwa: n'ekyo ekitatuuka ti kibalika. ¹⁶ Nateeserye n'o myoyo gwange nze nga ntumula nti bona, neefuniire amagezi mangi okusinga bonabona abansookere mu Yerusaalemi: niiwo awo, omwoyo gwange gwaboine inu amagezi n'okumanya. ¹⁷ Ni ntekayo omwoyo gwange okumanya amagezi n'o kumanya eiralu n'o busirusiru: naboine nga n'ekyo niikwi kusengererya empewo. ¹⁸ Kubanga mu magezi amangi mulimu obwinike bungi: n'oyo atula okumanya atumula okubona enaku.