¹ Awo Peetero no Yokaana ne baniina mu yeekaalu mu saawa ey'okusabiramu, esaawa ey'omwenda. ² Waaliwo omuntu omuleme okuva mu kida kwa maye yabbaire asituliibwe, gwe baateekanga bulijo ku lwigi lwa yeekaalu olwayetebwanga Olusa, okusabanga efeeza abayingiranga mu yeekaalu. ³ Oyo bwe yaboine Peetero no Yokaana nga baaba okuyingira mu yeekaalu n'asaba okuweebwa efeeza. ⁴ Peetero awamu no Yokaana ne bamwekalirizia amaiso, Peetero n'akoba nti Tulingirire. ⁵ N'abawulira, ng'alowooza nti bamuwa ekintu. ⁶ Naye Peetero n'akoba nti Efeeza ne zaabu mbibula; naye kye ndina kye nkuwa: mu liina lya Yesu Kristo Omunazaaleesi, tambula. ⁷ N'amukwata ku mukono omuliiro n'amuyimusia. Amangu ago ebigere bye n'obukongovule ne bifuna amaani: ⁸ n'agolokoka mangu n'ayemerera n'atambula, n'ayingira nabo mu yeekaalu ng'atambula ng'abuuka ng'atendereza Katonda. ⁹ Abantu bonabona ne bamubona ng'atambula ng'atendereza Katonda, ¹⁰ ne bamutegeera nga niiye oyo eyatyamanga ku lwigi Olusa olwa yeekaalu okusabirizianga efeeza, ne bawuniikirira inu n'okwewuunya olw'ekyo ekimukoleibwe. ¹¹ Bwe yabbaire ng'akaali yekwaite Peetero no Yokaana, ekibiina kyonakyona ne bairuka gye baali ne bakuÅ‹aanira mu kisasi ekiyitibwa ekya Sulemaani nga beewuunya inu. ¹² Awo Peetero bwe yaboine n'airamu ekibiina nti Abasaiza Abaisiraeri, kiki ekibeewuunyisia bino? Mutwekaliririzia ki amaiso ng'amaani gaisu ife oba kutya kwaisu Katonda niibyo ebimutambwirye oyo? ¹³ Katonda wa Ibulayimu era owa Isaaka era owa Yakobo, Katonda wa bazeiza baisu, yagulumizirye Omulenzi we Yesu, gwe mwawaireyo ne mumwegaanira mu maiso ga Piraato, bwe yamaliriire okumwita. ¹⁴ Naye imwe ne mwegaana Omutukuvu era Omutuukirivu, ne mutaka okuweebwa omwiti, ¹⁵ ne mwita Omukulu w'obulamu; oyo Katonda yamuzuukizirye mu bafu: niife bajulizi baakyo. ¹⁶ Era olw'okwikirirya eriina lye oyo gwe mubona gwe mumaite eriina lye limuwaire amaani, n'okwikirirya okuli mu oyo kumuwaire obulamu buno obutuukiriire mu maiso ganyu mwenamwena. ¹⁷ Kale atyanu, ab'oluganda, maite nga mwakolere nga temumaite, nga n'abakulu banyu. ¹⁸ Naye Katonda bye yabuuliire eira mu munwa gwa banabbi bonabona nga Kristo we alibonyaabonyezebwa, yabituukiriirye atyo. ¹⁹ Kale mwenenye, mukyuke, ebibbiibi byanyu bisangulibwe, ebiseera eby'okuwumuzibwa mu maiso ga Mukama bituukire; ²⁰ yeena atume Kristo eyabaawuliirwe eira, niiye Yesu, ²¹ eyagwanyiziibwe okutwalibwa mu igulu okutuusya mu biseera eby'okulongoosezaamu Byonabyona, Katonda bye yatumuliranga mu munwa gwa banabbi be abatukuvu ababbairewo okuva ku lubereberye. ²² Musa yakobere nti Mukama Katonda alibemerererya nabbi aliva mu bagade banyu nga nze; oyo mumuwuliranga Byonabyona by'alibakoba. ²³ Olulituuka buli mwoyo ogutawulira nabbi oli gulizikirizibwa mu igwanga. ²⁴ Niiwo awo na banabbi bonabona n'abo okuva ku Samwiri n'abo abaamwiririra, bonabona abatumulanga, babuuliranga eby'enaku gino. ²⁵ Imwe muli baana ba banabbi, era ab'endagaano Katonda gye yalagaanire na bazeiza banyu, ng'akoba Ibulayimu nti No mu izaire lyo ebika byonabyona eby'ensi mwe biriweerwa omukisa. ²⁶ Okusooka gye muli Katonda, bwe yamalire okuzuukizia Omulenzi we n'amutuma gye muli abawe omukisa, ng'akyusia buli muntu mu bibbiibi byanyu.