¹ Awo olunaku lwa Pentekoote bwe lwatuukire, bonabona babbaire wamu mu kifo kimu. ² Amangu ago okuwuuma ne kubba mu igulu ng'empewo ewuuma n'amaani, ne kwizulya enyumba yonayona mwe babbaire batyaime. ³ Ne kuboneka ku ibo enimi ngy'omusyo nga gyeyawiremu: buli lulimi ne lutyama ku muntu. ⁴ Bonabona ne baizula Omwoyo Omutukuvu, ne batanula okutumula enimi egindi, nga Omwoyo bwe yabawaire okugitumula. ⁵ Wabbairewo mu Yerusaalemi Abayudaaya nga batyaime, abantu abeegenderezia, abaviire mu buli igwanga ly'abantu wansi w'eigulu. ⁶ Okuwuuma okwo bwe kwabbairewo, ekibiina ne kikuŋaana ne kisamaalirira, kubanga bawuliire buli muntu nga batumula mu lulimi lw'ewaabwe, ⁷ Ne bawuniikirira bonabona, ne beewuunya, nga batumula nti bona, bano bonabona abatumula ti Bagaliraaya. ⁸ Era kiki ife buli muntu okuwulira olulimi lw'ewaisu gye twazaaliibwe? ⁹ Abapaazi n'Abameedi, n'Abeeramiti, n'abali mu Mesopotamiya, mu Buyudaaya no Kapadokiya, mu Ponto no mu Asiya, ¹⁰ mu Fulugiya ne mu Panfuliya, mu Misiri no mu nsi egy'e Libuwa egiriraine Kuleene, n'Abarooma abageni, Abayudaaya n'abakyufu, ¹¹ Abakuleete n'Abawalabu, tuwulira bano nga batumula mu nimi gyaisu eby'ekitalo bya Katonda. ¹² Bonabona ne beewuunya ne babuusabuusa ne bakobagana nti Amakulu gaakyo kiki kino? ¹³ Naye abandi ne babasekerera ne bakoba nti Batamiire omwenge omusu. ¹⁴ Naye Peetero bwe yayemereire na badi eikumi n'omumu, n'atumulira waigulu n’abakoba nti Abasaiza Abayudaaya n'abatyama mu Yerusaalemi mwenamwena, mutegeere kino, mutegere amatu ebigambo byange. ¹⁵ Kubanga bano tebatamiire, nga imwe bwe mulowooza; kubanga niiyo esaawa ey'okusatu ey'emisana. ¹⁶ Naye bino niibyo byatumwirwe nabbi Yoweeri nti ¹⁷ Olulituuka mu naku egy'oluvanyuma, bw'atumula Katonda, Ndifuka ku omwoyo gwange ku balina omubiri bonabona: Abataane banyu na bawala banyu baliragula, N'abalenzi banyu balibona okwolesebwa, N'abakaire banyu baliroota ebirooto: ¹⁸ Niiwo awo, ne ku baidu bange n'abazaana bange mu naku gidi Ndibafukira ku Mwoyo gwange, baliragula. ¹⁹ Ndireeta eby'ekitalo mu igulu waigulu N'obubonero mu nsi wansi, Omusaayi n'omusyo n'okunyooka kw'omwoka. ²⁰ Eisana erifuuka endikirirya, N'omwezi okubba omusaayi, Olunaku lwa Mukama Olukulu olulitenderezebwa nga kukaali kwiza. ²¹ Olulituuka buli alisaba eriina lya Mukama alirokoka. ²² Abasaiza Abaisiraeri, muwulire bigambo bino. Yesu Omunazaaleesi, omuntu eyabalagiibwe Katonda mu bigambo eby'amaani n'eby'amagero n'obubonero, Katonda bye yamukolyanga wakati mu imwe, nga imwe bwe mumaite; ²³ oyo bwe yaweweibweyo nga Katonda bwe yasookere okuteesia n'okumanya, mwamutwaire ne mumukomerera n'emikono gy'abantu ababbiibi, ne mumwita. ²⁴ Naye oyo Katonda yamuzuukizirye, bwe yasumulwire okulumwa kw'okufa: kubanga tekwayinzirye kumunywezia. ²⁵ Kubanga Dawudi amutumulaku nti Naboine Mukama enaku gyonagyona mu maiso gange, Kubanga ali ku mukono gwange omuliiro, ndeke okusagaasagana. ²⁶ Omwoyo gwange kyegwaviire gwesiima, olulimi lwange ne lusanyuka; Era n'omubiri gwange gwabbanga mu isuubi: ²⁷ Kubanga tolindeka bulamu bwange mu Magombe, So toliwaayo Mutukuvu wo kuvunda. ²⁸ Wanjengereserye amangira g'obulamu; Olingizulya eisanyu n'amaiso go. ²⁹ Abasaiza ab'oluganda, nsobola okutumulira n'obuvumu mu maiso ganyu ebya bazeiza baisu omukulu Dawudi nti yafiire n'aziikibwa, n'amalaalo ge gali waisu ne atyanu. ³⁰ Kale, bwe yabbaire nabbi, bwe yamanyire nga Katonda yamulayiriire ekirayiro, nti mu baizukulu b'omu ntumbu gye alitwiryaku omuntu ku ntebe ye; ³¹ bwe yaboine olubereberye, n'atumula ku kuzuukira kwa Kristo nga teyalekeibwe mu Magombe so nga n'omubiri gwe tegwavundire. ³² Yesu oyo Katonda yamuzuukizirye, feena niife bajulizi. ³³ Awo bwe yaniinisiibwe ku mukono omuliiro ogwa Katonda, n'aweebwa okusuubizia kw'Omwoyo Omutukuvu eri Itaaye, afukiire kino kye muboine atyanu kye muwuliire. ³⁴ Kubanga Dawudi teyaniinire mu igulu, naye yatumwire mweene nti Mukama yakobere Mukama wange nti Tyama ku mukono gwange muliiro, ³⁵ Okutuusia lwe nditeeka abalabe bo okubba entebe y'ebigere byo. ³⁶ Kale mazima bamanye enyumba yonayona eya Isiraeri nti Katonda yamufwiire Mukama era Kristo, Yesu oyo gwe mwakomereire. ³⁷ Awo bwe bawuliire ebyo emyoyo gyabwe ne gibaluma, ne bakoba Peetero n'abatume abandi nti Abasaiza ab'oluganda, twakola tutya? ³⁸ Peetero n'abakoba nti Mwenenye, mubatizibwe buli muntu mu imwe okuyingira mu liina lya Yesu Kristo okutoolebwaku ebibbiibi byanyu, mwaweebwa ekirabo niigwo Mwoyo Omutukuvu. ³⁹ Kubanga okusuubizibwa kwanyu era kwa baana banyu n'abo bonabona abali ewala, bonabona abalyetebwa Mukama Katonda waisu. ⁴⁰ Era n'abategeeza mu bigambo ebindi bingi n'ababuulirira ng'akoba nti Mulokolebwe mu mirembe gino egyakyamire. ⁴¹ Awo abaikiriirye ekigambo kye ne babatizibwa: ne bongerwaku ku lunaku ludi abantu ng'enkumi isatu. ⁴² Ne babba nga banyiikiriranga okwegeresebwa kw'abatume, no mu kwikirirya ekimu, no mu kumenya emigaati no mu kusaba. ^{44 43} Buli muntu n'atya: eby'amagero bingi n'obubonero ne bikolebwanga abatume. ⁴⁵ eby'obugaiga byabwe n'ebintu bye babbaire nabyo ne babitunda ne bagabiranga bonabona nga buli muntu bwe yabbaire yeetaaga. ⁴⁶ Boona nga banyiikiriranga bulijjo n'omwoyo gumu mu yeekaalu, nga bamenya emigaati mu nyumba eika, ne balyanga emere n'eisanyu n'omwoyo ogubula bukuusa, ⁴⁷ nga batenderezanga Katonda, nga basiimibwanga abantu bonabona. Mukama n'abongerangaku bulijjo abaalokokanga.