¹ Ekitabo eky'oluberyeberye nakikolere, munnange Teefiro, ekya byonabyona Yesu bye yasookere okukola n'okwegeresya, ² okutuusia ku lunaku ludi bwe yamalire okulagira ku bw'Omwoyo Omutukuvu abatume be yalondere n'atwalibwa mu igulu. ³ Bwe yamalire okubonyaabonyezebwa ne yeeraga mu ibo nga mulamu, mu bubonero bungi, ng'ababonekera eibbanga ly'ennaku ana, ng'atumula eby'obwakabaka bwa Katonda. ⁴ Awo bwe yakuŋaanire nabo n'abalagira baleke okuva mu Yerusaalemi, naye balindirire okusuubizia kwa Itawaisu kwe baawuliire gy'ali: ⁵ kubanga Yokaana yabatizire n'amaizi; naye imwe mulibatizibwa n'Omwoyo Omutukuvu mu naku ti nyingi ⁶ Awo bwe baakuŋaanire ne bamubuulya nga bakoba nti Mukama waisu, mu biseera bino mw'ewairiryawo obwakabaka eri Isiraeri? ⁷ N'abakoba nti Ti kwanyu okumanya entuuko waire ebiseera, Itawaisu bye yateekere mu buyinza bwe iye. ⁸ Naye muliweebwa amaani, Omwoyo Omutukuvu bw'alimala okwiza ku imwe, mweena mwabbanga bajulizi bange mu Yerusaalemi no mu Buyudaaya bwonabwona no mu Samaliya, n'okutuusia ku nkomerero y'ensi. ⁹ Bwe yamalire okutumula ebyo, nga bamulingilira, n'asitulibwa, ekireri ne kimutoola mu maiso gaabwe. ¹⁰ Bwe babbaire beekalirizia amaiso mu igulu bw'ayaba, bina, abantu babiri ne bayemerera kumpi nabo nga bavaire engoye egitukula; ¹¹ abatumwire nti Abantu b’e Galiraaya kiki ekibemereirye nga mukingilira mu igulu? Oyo Yesu abatooleibweku okutwalibwa mu igulu aliiza atyo nga bwe mumuboine ng'ayaba mu igulu. ¹² Ne baira e Yerusaalemi okuva ku lusozi olwetebwa olwa Zeyituuni, oluli okumpi ne Yerusaalemi ng'olugendo olw'oku sabbiiti. ¹³ Awo bwe bayingiire ne baniina mu kisenge ekya waigulu, we batyamanga; Peetero no Yokaana n Yakobo no Andereya, Firipo no Tomasi, Batolomaayo no Matayo, Yakobo omwana wa Alufaayo, no Simooni Zerote, no Yuda omwana wa Yakobo. ¹⁴ Abo bonabona babbaire nga banyiikira n'omwoyo gumu mu kusaba, wamu n'abakali no Malyamu Maye wa Yesu, no bagande. ¹⁵ Mu naku egyo Peetero n'ayemerera wakati mu b'oluganda n’atumula (ekibiina ky'abantu abaakuŋaana babbaire nga kikumi mu abiri) nti ¹⁶ Abasaiza ab'oluganda, kyagwaniire ekyawandiikibwa kituukiririzibwe, Omwoyo Omutukuvu kye yatumwire eira mu munwa gwa Dawudi, ku Yuda, eyabbaire omusaale waabwe abakwateYesu; ¹⁷ kubanga yabaliirwe wamu naife, n'aweebwa omugabo gw'okuweereza kuno. ¹⁸ (Oyo n'agula enimiro n'empeera ey'obubbiibi bwe; n'agwa nga yeefundikire, n'ayabikamu wakati, ebyenda byonabyona ne biyiika. ¹⁹ Ne kitegeerekeka eri abo bonabona ababbaire mu Yerusaalemi: enimiro eyo mu lulimi lwabwe n'okwetebwa n'eyetebwa Akerudama, niiye enimiro ey'omusaayi.) ²⁰ Kubanga kyawandiikibwe mu kitabo kya Zabbuli nti Ekibanja kye kizike, So kireke okubbangamu omuntu: era nti Obukulu bwe buweebwe ogondi ²¹ Kale kigwanire mu bantu ababitanga naife mu biseera byonabyona bwe yayingiranga n'avanga gye tuli Mukama waisu Yesu ²² okuva ku kubatiza kwa Yokaana okutuusia ku lunaku lwe yatutooleiku, omumu ku abo abbe omujulirwa w'okuzuukira kwe awamu naife. ²³ Ne balonda babiri, Yusufu ayetebwa Balusaba, n'atuumibwa ate eriina Yusito, ne Matiya. ²⁴ Ne basaba, ne bakoba nti Iwe, Mukama waisu, amaite emyoyo gy'abantu bonabona, lagaku mumu gw'olondere ku bano bombiri, ²⁵ aweebwe ekifo ky'okuweereza okwo n'obutume, Yuda bwe yasubirwe ayabe mu kifo kye iye. ²⁶ Ne babakubbira obululu; akalulu ne kagwa ku Matiya; n’abalirwa wamu n'abatume eikumi n'omumu.