¹ Dawudi n'atumula nti wakaali waliwo asigairewo ku nyumba ya Sawulo, mukole eby'e kisa ku lwa Yonasaani? ² Awo wabbairewo ku nyumba ya Sawulo omwidu eriina lye Ziba, ni bamweta eri Dawudi; kabaka n'a mukoba nti Iwe Ziba? N'a tumula nti Omwidu wo niiye oyo. ³ Kabaka n'a tumula nti tiwakaali waliwo w'e nyumba ya Sawulo mukole eby'e kisa kya Katonda? Ziba n'a koba kabaka nti wakaali waliwo omwana wa Yonasaani, eyalemaire ebigere. ⁴ Kabaka n'a mukoba nti ali waina? Ziba n'a koba kabaka nti bona, ali mu nyumba ya Makiri Mutaane wa Amiyeri mu Lodebali. ⁵ Awo kabaka Dawudi n'atuma n'a mutoola mu nyumba ya Makiri Mutaane wa Amiyeri mu Lodebali. ⁶ Awo Mefibosesi mutaane wa Yonasaani mutaane wa Sawulo n'aiza eri Dawudi n'a vuunama amaiso ge ni yeeyanzya. Dawudi n'atumula nti Mefibosesi. N'airamu nti bona omwidu wo. ⁷ Dawudi n'a mukoba nti totya: kubanga tinaleke kukukola bye kisa ku lwa Yonasaani itaawo, era ndikwirirya ebyalo byonabyona ebya Sawulo zeizawo; era walyanga emere ku meenza yange enaku gyonagyona. ⁸ Ni yeeyanzya n'a tumula nti omwidu wo niiye ani iwe okumulingirira embwa enfu nga nze bwe ndi? ⁹ Awo kabaka n'a yeta Ziba, omwidu wa Sawulo, n'a mukoba nti byonabyona ebyabanga ebya Sawulo n'e by'e nyumba ye yonayona mbiwaire omwana wa mukama wo. ¹⁰ Wena wamulimiranga etakali, iwe n'a bataane bo n'a baidu bo; era wayingiryanga ebibala omwana wa mukama wo abbenga ne byeyalyanga: naye Mefibosesi omwana wa mukama wo yaalyanga emere enaku gyonagyona ku meenza yange. Era Ziba yabbaire n'a baana ikumi n'a bataanu n'a baidu abiri. ¹¹ Awo Ziba n'akoba kabaka nti Mukama wange kabaka nga bw'alagiire omwidu we, atyo omwidu wo bweyakolanga. Mefibosesi, bwe yatumwire kabaka, yalyanga ku meenza yange ng'o mumu ku baana ba kabaka. ¹² Era Mefibosesi yabbaire omwana omutomuto omwisuka, eriina lye Miika. Ne bonabona Ababbaire mu nyumba ya Ziba babbaire baidu ba Mefibosesi. ¹³ Awo Mefibosesi n'abba mu Yerusaalemi: kubanga yalyanga buliigyo ku meenza ya kabaka; era yalemaire ebigere bye byombiri.