¹ Awo olwatuukire oluvanyuma lw'ebyo kabaka w'a baana ba Amoni n'afa, Kanuni mutaane we n'afuga mu kifo kye. ² Dawudi n'atumula nti Nakola Kanuni mutaane wa Nakasi eby'e kisa, nga itaaye bwe yankolere eby'ekisa. Awo Dawudi n'atuma abaidu be okumukubbagizya olwa itaaye. Abaidu ba Dawudi ni batuuka mu nsi ey'a baana ba Amoni. ³ Naye abakulu b'a baana ba Amoni ni bakoba Kanuni mukama waabwe nti Olowooza nga Dawudi amuteekamu ekitiibwa itaawo n'a kutumira ab'o kukukubbagizya? Dawudi takutumiire baidu be okukebera ekibuga n'o kukikeeta n'o kukimenya? ⁴ Awo Kanuni n'atwala abaidu ba Dawudi n'abamwaku ekitundu ky'e birevu byabwe n'a basalira ebivaalo byabwe wakati, okukoma ku matako gaabwe, n'a basindika. ⁵ Awo bwe bakikobeire Dawudi, n'atuma okubasisinkana; kubanga abasaiza abo ni bakwatibwa inu ensoni. Kabaka n'atumula nti mubbe e Yeriko ebirevu byanyu bimale okukula, kaisi mwirewo. ⁶ Awo abaana ba Amoni bwe baboine Dawudi ng'a batamiire, abaana ba Amoni ni batuma ne bagulirira Abasuuli ab'e Besulekobu, n'Abasuuli ab'e Zoba, abaatambula n'e bigere emitwalo ibiri, n'o kabaka w'e Maaka ng'alina abasaiza lukumi, n'abasaiza ab'e Tobu abasaiza mutwaalo gumu mu nkumi ibiri. ⁷ Awo Dawudi bwe yakiwuliire, n'atuma Yowaabu n'e igye lyonalyona ery'a basaiza ab'a maani. ⁸ Awo abaana ba Amoni ni bafuluma ne basimba enyiriri awayingirirwa mu mulyango: n'Abasuuli ab'e Zoba n'ab'e Lekobu n'abasaiza ab'e Tobu n'e Maaka babbaire bonka ku itale. ⁹ Awo Yowaabu bwe yaboine olutalo nga luli mu maiso ge n'e nyuma we, n'ayawulamu abasaiza bonabona aba Isiraeri abalonde ni basimba enyiriri okwolekera Abasuuli: ¹⁰ abantu bonabona abandi n'abakwatisya mu mukono gwa Abisaayi mugande we, ni basimba enyiriri okwolekera abaana ba Amoni. ¹¹ N'atumula nti Abasuuli bwe banema, kale iwe wambeera: naye abaana ba Amoni bwe bakulema, kale naiza ni nkuyamba. ¹² Iramu amaani twerage obusaiza olw'a bantu baisu n'o lw'e bibuga bya Katonda waisu: era Mukama akole nga bw'a siima. ¹³ Awo Yowaabu n'a bantu ababbaire naye ni basembera ku lutalo okulwana n'A basuuli: ni bairuka mu maiso ge. ¹⁴ Awo abaana ba Amoni bwe baboine Abasuuli nga bairukire, era boona ni bairuka mu maiso ga Abisaayi, ni bayingira mu kibuga. Awo Yowaabu kaisi n'ava ku baana ba Amoni n'airayo n'a iza e Yerusaalemi. ¹⁵ Awo Abasuuli bwe baboine nga babbingiibwe mu maiso ga Isiraeri, ni bakuŋaana. ¹⁶ Awo Kadadezeri n'a tuma n'atoolayo Abasuuli ababbaire emitala w'Omwiga: ne baiza e Keramu, Sobaki omukulu w'e igye lya Kadadezeri ng'abatangiire. ¹⁷ Ne bakobera Dawudi; n'akuŋaanya Isiraeri yenayena, n'asomoka Yoludaani n'aiza e Keramu. Abasuuli ne basimba enyiriri okwolekera Dawudi ni balwana naye. ¹⁸ Abasuuli ne bairuka mu maiso ga Isiraeri; Dawudi n'aita ku Basuuli abasaiza ab'o mu magaali lusanvu, n'a beebagala embalaasi emitwalo ina, n'asumita Sobaki omukulu w'e igye lyabwe n'afiira eyo. ¹⁹ Awo bakabaka bonabona ababbaire abaidu ba Kadadezeri bwe baboine nga babbingiibwe mu maiso ga Isiraeri, ne batabagana n'e Isiraeri, ni babaweererya. Awo Abasuuli ne batya okweyongera ate okuyamba abaana ba Amoni.