¹ Naye eby'entuuko n'ebiseera, ab'oluganda, temwetaaga kubiwandikirwa. ² Kubanga mwenka mumanyiire kimu ng'olunaku lwa Mukama waisu lwiza ng'omwibbi obwire, lutyo. ³ Bwe balibba nga batumula nti Mirembe, wabula kabbiibi, okuzikirizia okw'amangu kaisi ne kubaizira, ng'okulumwa bwe kwizira omukali ali Ekida; so tebaliwona n'akatono (n'akadidiiri). ⁴ Naye imwe, ab'oluganda, temuli mu ndikirirya, olunaku ludi okubagwikirirya ng'omwibbi: ⁵ kubanga imwe mwena muli baana bo kutangaala, era muli baana bo musana: tetuli bo bwire waire ab'endikiriria; ⁶ kale tulekenga okugona ng'abaandi, naye tumogenga tulekenga okutamiira. ⁷ Kubanga abagona, bagona bwire; n'abatamiira, batamiira bwire. ⁸ Naye ife, kubanga tuli bo musana, tulekenga okutamiira, nga tuvaire eky'omu kifubba eky'okwikirirya n'okutaka, n'enkoofiira, eisuubi ly'obulokozi. ⁹ Kubanga ife Katonda teyatuteekeirewo busungu, wabula okuweebwa obulokozi ku bwa Mukama waisu Yesu Kristo, ¹⁰ eyatufiriire ife, bwe tumoga oba bwe tugona kaisi tubbe abalamu wamu naye. ¹¹ Kale musanyusaganenga, era muzimbaganenga buli muntu mwinaye, era nga bwe mukola. ¹² Naye tubeegayirira, ab'oluganda, okumanyanga abafuba okukola emirimu mu imwe, ababafuga mu Mukama waisu, abababuulirira; ¹³ n'okuteekangamu ekitiibwa einu dala mu kutaka olw'omulimu gwabwe. Mubbenga n'emirembe mu imwe. ¹⁴ Era tubabuulirira, ab'oluganda, munenyenga abatatambula okusa, mugumyenga abalina omwoyo omunafu, muyambenga ababula maani, muguminkirizenga eri bonabona. ¹⁵ v15 Mubone omuntu yenayena alekenga okuwalana ekibbiibi olw'ekibbiibi; naye enaku gy'onagyona musengereryenga ekisa mwenka na mwenka n'eri bonabona. ¹⁶ Musanyukenga enaku gy'onagyona; ¹⁷ musabenga obutayosya; ¹⁸ mwebalyenga mu kigambo kyonakyona: kubanga ekyo Katonda ky'abatakirya mu Kristo Yesu gye muli. ¹⁹ Temuziyizianga Mwoyo; ²⁰ temunyoomanga bunabbi; ²¹ mugezyengaku ku bigambo byonabyona; munywezeryenga dala ekisa; ²² mwewalenga buli ngeri yo bubbiibi. ²³ Era Katonda ow'emirembe mwene abatukulirye dala; era omwoyo gwanyu n'obulamu n'omubiri byonabyona awamu bikuumibwenga awabula kunenyezebwa mu kwiza kwa Mukama waisu Yesu Kristo. ²⁴ Abeeta mwesigwa, n'okukola niiye alikola ²⁵ Ab'oluganda, mutusabirenga. ²⁶ Musugirye ab'oluganda bonabona n'okunywegera okutukuvu. ²⁷ Mbalayiria Mukama waisu okusomera ebbaluwa eno ab'oluganda bonabona. ²⁸ Ekisa kya Mukama waisu Yesu Kristo kibbenga wamu naimwe.