¹ Kale, ab'oluganda, ebisigaireyo, tubeegayirira tubabuulirira mu Mukama waisu Yesu, nga bwe mwaweweibwe ife bwe kibagwanira okutambulanga n'okusiimibwanga Katonda, era nga bwe mutambula; okweyongerangaku kabite. ² Kubanga mumaite ebiragiro bwe biri bye twabalagiire ku bwa Mukama waisu Yesu. ³ Kubanga ekyo Katonda ky'ataka, okutukuzibwa kwanyu, okwewalanga obwenzi; ⁴ buli muntu ku imwe okumanyanga okufuga omubiri gwe iye mu butukuvu n'ekitiibwa, ⁵ ti mu muwudu ogw'okwegomba, era ng'amawanga agatamaite Katonda; ⁶ alekenga okuyingirira mugande waire okumusobyaku mu kigambo ekyo: kubanga Mukama waisu awalana eigwanga ery'ebyo byonabyona, era nga bwe twasookere okubabuulira n'okutegezerya dala. ⁷ Kubanga Katonda teyatweteire bugwagwa, wabula mu butukuvu. ⁸ Kale agaana tagaana muntu, wabula Katonda, abawa Omwoyo we Omutukuvu. ⁹ Naye okuwandiikirwa ku by'okutakagana ab'oluganda okwo temukwetaaga: kubanga imwe mwenka mwayigiriziibwe Katonda okutakagananga; ¹⁰ kubanga n'okukola mukola mutyo ab'oluganda bonabona ab'omu Makedoni yonka. Naye tubabuulirira ab'oluganda, okweyongeranga okusukirira; ¹¹ era mwegombe okutengeranga, n'okukolanga ebyanyu imwe, n'okukolanga emirimu n'emikono gyanyu, nga bwe twabalagiire; ¹² kaisi mutambulirenga mu mpisa ensa eri ab'ewanza, nga mubulaku kye mwetaaga. ¹³ Naye tetutaka imwe obutategeera, ab'oluganda, eby'abo abagonere; mulekenga okunakuwala, era ng'abandi ababula eisuubi. ¹⁴ Kubanga bwe twikirirya nga Yesu yafiire n'azuukira, era Katonda alireeta atyo abagonere ku bwa Yesu wamu naye. ¹⁵ Kubanga ekyo kye tubabuulira mu kigambo kya Mukama waisu, nga ife abalamu abaasigairewo okutuusa okwiza kwa Mukama waisu tetulisooka abagonere. ¹⁶ Kubanga Mukama waisu mwene aliika okuva mu igulu n'okutumulira waigulu n'eidoboozi lya malayika omukulu n'eikondeere lya Katonda: n'abo abaafiirire mu Kristo niibo balisooka okuzuukira: ¹⁷ feena abalamu abaasigairewo kaisi ne tutwalibwa wamu nabo mu bireri okusisinkana Mukama waisu mu ibanga: kale tutyo twabbanga ne Mukama waisu enaku gyonagyona. ¹⁸ Kale musanyusaganenga mwenka na mwenka n'ebigambo bino.