¹ Awo wabbairewo omusaiza ow'e Lamasaimuzofimu, eky'o mu nsi ey'e nsozi eya Efulayimu, eriina lye Erukaana, mutaane wa Yerokamu, mutaane wa Eriku, mutaane wa Toku, mutaane wa Zufu, Omwefulayimu: ² era yabbaire n'a bakali babiri; omumu eriina lye nga niiye Kaana, n'o gondi eriina lye nga niiye Penina: era Penina yabbaire n'a baana, naye Kaana tiyabbaire n'a baana. ³ Awo omusaiza oyo yavanga mu kyalo kye buli mwaka n'a niina okusinza n'o kuweerayo mu Siiro sadaaka eri Mukama ow'e igye. N'a bataane ba Eri bombiri, Kofuni n'o Finekaasi, bakabona eri Mukama, babbaire eyo. ⁴ Awo olunaku bwe lwatuukire Erukaana kwe yaweereireyo sadaaka, n'awa emigabo Penina mukali we n'a bataane be na bawala be: ⁵ naye n'awa Kaana emigabo ibiri: kubanga yamutakire Kaana, naye Mukama yabbaire aigaire ekida kye. ⁶ Mwalikwa we n'a musunguwalya inu okumweraliikirirya, kubanga Mukama yabbaire agaire ekida kye. ⁷ Awo musaiza we bwe yakolanga atyo buli mwaka, iye bwe yaniinanga okwaba mu nyumba ya Mukama, n'a musunguwalya atyo; kyeyaviire akunga amaliga n'agaana okulya. ⁸ Awo Erukaana musaiza we n'a mukoba nti Kaana, okungira ki? kiki ekikulobera okulya? n'o mwoyo gwo kiki ekigweraliikirirya? nze tinsinga abaana eikumi gy'oli obusa? ⁹ Awo Kaana n'a golokoka nga bamalire okulya mu Siiro, era nga bamalire okunywa. Awo Eri kabona yabbaire ng'atyaime ku ntebe ye awaali omufuubeeto ogw'o mu yeekaalu ya Mukama. ¹⁰ N'o mwoyo gwe gwabbaire nga gumuluma, n'asaba Mukama, n'akunga inu amaliga. ¹¹ Ne yeeyama obweyamu n'atumula nti "Ai Mukama ow'e igye, bw'olibba ng'oniingiriire enaku omuzaana wo gy'aboine, n'o njijukira n'oteerabira muzaana wo, naye n'owa omuzaana wo omwana ow'o bwisuka, awo ndimuwa Mukama enaku gyonagyona egy'o bulamu bwe, so n'a kamwanu tekalibita ku mutwe gwe". ¹² Awo olwatuukire, bwe yeeyongeire okusaba mu maiso ga Mukama, Eri ni yekaanya omunwa gwe. ¹³ Era Kaana yatumwire mu mwoyo gwe; emumwa gwe gwatoobeire, naye eidoboozi lye tiryawulikikire. Eri kyeyaviire alowooza nti atamiire. ¹⁴ Eri n'amukoba nti olituukya waina okutamiiranga? wetooleku omwenge gwo. ¹⁵ Kaana n'a iramu n'atumula nti Bbe, mukama wange, nze ndi mukali alina omwoyo ogunakuwaire: tinyire mwenge waire ekitamiirya, naye nfukire ebiri mu meeme yange mu maiso ga Mukama. ¹⁶ Toyeta muzaana wo muwala wa Beriali: kubanga mu kwemulugunya kwange okusukiriire n'o mu kunyiiga kwange mwe nyemere okutumula okutuusya atyanu. ¹⁷ Awo Eri n'a iramu n’atumula nti yaba mirembe: era Katonda wa Isiraeri akuwe ebyo by'o musabire. ¹⁸ N'atumula nti omuzaana wo abone ekisa mu maiso go. Awo omukali ni yeirirayo, n'alya, amaiso ge ne gatatokooterera lwo kubiri. ¹⁹ Awo ni bagolokoka Amakeeri mu makeeri, ni basinza mu maiso ga Mukama ni bairayo eika, ne batuuka mu nyumba yaabwe mu Laama: Erukaana n'a manya Kaana mukali we; Mukama n'a mwijukira. ²⁰ Awo olwatuukire ebiseera bwe byatuukire Kaana n'abba ekida nazaala omwana w'o bwisuka; n'a mutuuma eriina lye Samwiri, nti Kubanga namusabire eri Mukama. ²¹ Omusaiza Erukaana n'e nyumba ye yonayona ni baniina okuwaayo sadaaka eya buli mwaka eri Mukama n'o bweyamu bwe. ²² Naye Kaana n'ataniina; kubanga Yakobere ibaye nti tinjaba kuniinayo okutuusya omwana lw'aliva ku mabeere, kaisi ni mutwala aboneke mu maiso ga Mukama, abbenga eyo enaku gyonagyona. ²³ Erukaana ibaye n'amukoba nti kola nga bw'osiima; bba awo okutuusya lw'olimala okumutoola ku mabeere; kyooka Mukama anywezye ekigambo kye. Awo omukali n'abba awo n'ayonkya omwana okutuusya lwe yamutoire ku mabeere. ²⁴ Awo bwe yamalire okumutoola ku mabeere, n'a mutwala n'ayaba naye n'a niina, ng'alina ente isatu, ne efa imu ey'o bwita, n'e kideku eky'omwenge, n'a mutwala mu nyumba ya Mukama mu Siiro: era omwana yabbaire mutomuto. ²⁵ Ne baita ente ne baleetera Eri omwana. ²⁶ N'amukoba nti Ai mukama wange, nga bw'oli omulamu, mukama wange, nze ndi mukali oyo eyayemereire w'oli wano, nga nsaba Mukama. ²⁷ Omwana ono gwe nasabire; era Mukama yampaire ebyo bye namusabire; ²⁸ nzena kyenviire muwaayo eri Mukama; ng'akaali mulamu aweweibweyo eri Mukama. iye n'asinziza Mukama eyo.