¹ Naye ku ebyo bye mwampandiikiire; kisa omusaiza obutakwatanga ku mukali. ² Naye, olw'obwenzi, buli musaiza abbenga no mukali we iye, na buli mukali abbenga no musaiza we iye. ³ Omusaiza asasulenga omukali we ekyo ekimugwanira: era n'omukali asasulenga atyo omusaiza. ⁴ Omukali tafuga omubiri gwe iye, wabula musaiza we: era n'omusaiza atyo tafuga omubiri gwe iye, wabula omukali we. ⁵ Temwimaŋananga, wabula koizi nga mulagaine ekiseera, kaisi mubbenga n'eibbanga ery'okusabiramu, ate kaisi mubbenga wamu, Setaani alekenga okubakema olw'obuteeziyizia bwanyu. ⁶ Naye ebyo mbitumula nga ngikirirya bwikiriri, so tinteeka iteeka. ⁷ Naye nanditakire abantu bonabona okubbanga nga nze. Naye buli muntu alina ekirabo kye iye, ekiva eri Katonda, ogondi ati, n'ogondi ati. ⁸ Naye abatafumbirwagananga na banamwandu mbakoba nti Kisa ibo okubbanga nga nze. ⁹ Naye oba nga tebasobola kweziyizia, bafumbiraganenga: kubanga niikyo ekisa okufumbirwagananga okusinga okwakanga. ¹⁰ Naye abaamalire okufuumbirwagana mbalagira, so ti ninze wabula Mukama waisu, omukali obutanobanga ku musaiza we ¹¹ (naye okunoba bw'anobanga, abbeerenga awo obutafumbirwanga, oba atabaganenga no musaiza we); era n'omusaiza obutalekangayo mukali we. ¹² Naye abandi mbakoba nze, ti Mukama waisu: ow'oluganda yenayena bw'abbanga n'omukali ataikirirya, omukali bw'atabagananga naye okubba naye, tamulekangayo. ¹³ N'omukali bw'abbanga n'omusaiza ataikirirya; yeena bw'atabagananga naye okubba naye, tanobanga ku musaiza we. ¹⁴ Kubanga omusaiza ataikirirya atukuzibwa na mukali, n'omukali ataikirirya atukuzibwa na w'oluganda: singa tekiri kityo, abaana banyu tebandibbaire balongoofu; naye atyanu batukuvu. ¹⁵ Naye ataikirirya bw'ayawukananga, ayawukane: ow'oluganda omusaiza oba omukali tali mu bwidu mu bigambo ebiri bityo: naye Katonda yatweteire mirembe. ¹⁶ Kubanga, iwe omukali; omaite otya nga tolirokola musaiza wo? oba, iwe omusaiza, omaite otya nga tolirokola mukali wo? ¹⁷ Kino kyonka, buli muntu nga Mukama waisu bwe yamugabiire, buli muntu nga Katonda bwe yamwetere, atambulenga atyo. Era bwe ndagira ntyo mu kanisa gyonagyona. ¹⁸ Omuntu yenayena yayeteibwe nga mukomole? teyetoolangaku bukomole bwe. Omuntu yenayena yayeteibwe nga ti mukomole? Takomolebwanga. ¹⁹ Okukomolwa ti kintu n'obutakomolwa ti kintu wabula okukwatanga ebiragiro bya Katonda. ²⁰ Buli muntu abbenga mu kwetebwa kwe yayeteirwemu. ²¹ Wayeteibwe ng'oli mwidu? tokaali weralkiiriranga: naye okuyinza bw'osobolanga okuweebwa eidembe, wakiri bbanga nalyo. ²² Kubanga mu Mukama waisu eyayeteibwe nga mwidu, awebwa Mukama waisu eidembe: atyo eyayeteibwe nga w'eidembe niiye mwidu wa Kristo. ²³ Mwaguliibwe na muwendo; temufuukanga baidu ba bantu. ²⁴ Ab'oluganda, okwetebwa buli muntu niikwo kwe yayeteirwemu, abbenga mu okwo wamu ne Katanda. ²⁵ Naye ku by'obutafumbiraganwa mbula kiragiro kya Mukama waisu: naye mbakoba nze ng'omuntu Mukama waisu gwe yasaasiire okubbanga omwesigwa. ²⁶ Kale ndowooza kino okubba ekisa olw'okubonaabona okwa atyanu, nga kisa omuntu okubba nga bw'ali. ²⁷ Wasibiibwe n'omukali? tosagiranga kusumululwa. Wasumululwa ku mukali? tosagiranga mukali. ²⁸ Naye okukwa bw'okwanga, nga toyonoonere; n'omuwala bw'afumbirwanga, nga tayonoonere. Naye abali batyo babbanga n'okubonaabona mu mubiri: nzena mbasaasira. ²⁹ Naye kino kye ntumula, ab'oluganda, nti Ebiseera biyimpawaire, Okutandiika atyanu abalina abakali babbe ng'ababula: ³⁰ era n'abo abakunga babbe ng'abatakunga; n’abo abasanyuka babbe ng'abatasanyuka; n'abo abagula babbe ng'ababula; ³¹ n'abo abakolya eby'omu nsi babbe ng'abatabikolya bubbiibi: kubanga engeri ey'omu nsi muno ewaawo. ³² Naye ntaka imwe obuteeraliikiriranga. Atali mufumbo yeeraliikirira bya Mukama waisu, bw'ayasanyusianga Mukama waisu: ³³ naye omufumbo yeeraliikirira byo mu nsi, bweyasanyusanga mukali we. ³⁴ Era waliwo enjawulo ku mufumbo n'omuwala. Atafumbirwa yeeraliikirira bya Mukama waisu, abbenga mutukuvu omubiri n'omwoyo: naye afumbirwa yeeraliikirira byo mu nsi, bweyasanyusanga musaiza we. ³⁵ Ntumwire ekyo olw'okubagasa imwe beene; ti lwokubba nga kyambika, wabula olw'obusa era kaisi muweerezenga Mukama waisu obutategananga. ³⁶ Naye omuntu bw'alowoozanga nga takola kusa muwala we, oba nga abitiriire obukulu, era oba nga kigwana okubba kityo, akolenga nga bw'ataka; tayonoona; bafumbirwagane. ³⁷ Naye oyo aguma mu mu mwoyo gwe, nga takakibwa, naye ng'asobola okutuukirirya bw'ataka iye, era nga yamaliriire kino mu mwoyo gwe okukuumanga omuwala we, alikola kusa. ³⁸ Kale afumbirya omuwala we akola kusa; era n'oyo atalifumbilya iye alisinga okukola okusa. ³⁹ Omukali asibibwa musaiza we ng'akaali mulamu; naye omusaiza we bw'abba ng'agonere, nga wo bwereere afumbirwenga gw'ataka; kyoka mu Mukama waisu. ⁴⁰ Naye abba musanyufu okusigala nga bw'ali nga nze bwe ndowooza: era ndowooza nga nzeena nina Omwoyo gwa Katonda