¹ Omuntu yenayena ku imwe bw'abba n'ekigambo ku mwinaye, alingiliire okuwozerya ensonga abatali batuukirivu, so ti eri abatukuvu? ² Oba temumaite ng'abatukuvu niibo balisalira ensi omusango? era oba ng'ensi imwe muligisalira omusango, temusaanira kusala nsonga entono (endidiiri) einu. ³ Temumaite nga tulisalira bamalayika omusango? tulireka tutya okusala emisango egy'omu bulamu buno? ⁴ Kale bwe mubba n'okusala emisango egy'omu bulamu buno, abanyoomebwa mu kanisa abo niibo ba muteekawo? ⁵ Ntumwire kubakwatisya nsoni. Kiri kityo nti mu imwe temusobola kusuuka muntu mugezi, ayinza okusalira bagande ensonga, ⁶ naye ow'oluganda awozie n'ow'oluganda, era ne mu maiso gaabo abatali baikirirya? ⁷ Naye era mutyo mumalire okubaaku akabbiibi, kubanga mulina emisango mwenka na mwenka. Lwaki obutamala gakolwanga bubbiibi? lwaki obutamala galyazaamaanyizibwanga? ⁸ Naye imwe abeene mukola bubbiibi, mulyazaamaanya, era n'ab'oluganda. ⁹ Oba Temumaite ng'abatali batuukirivu tebalisikira obwakabaka bwa Katonda? Temubbeyebwanga: waire abakaba, waire abasinza ebifaananyi, waire abenzi, waire abafuuka abakali, waire abalya ebisiyaga, ¹⁰ waire ababbiibi, waire abeegomba, waire abatamiivu, waire abavumi, waire abanyagi, tebalisikira obwakabaka bwa Katonda. ¹¹ Era abamu ku imwe Mwabbaire ng'abo: naye mwanaziibwe, naye mwatukuziibwe, naye mwaweweibwe obutuukirivu olw'eriina lya Mukama waisu Yesu Kristo, n'olw'Omwoyo gwa Katonda waisu. ¹² Byonabyona bisa gye ndi; naye byonabyona tebinsaanira. Byonabyona bisa gye ndi; naye nze tinjaba kufugibwanga kyonakyona. ¹³ Eby'okulya bye kida, n'ekida kye byo kulya: naye Katonda alibitoolawo byombiri. Naye omubiri ti gwa bwenzi, naye gwa Mukama waisu; no Mukama waisu avunaana omubiri: ¹⁴ era Katonda yazuukizirye Mukama waisu, era feena alituzuukizia olw'amaani ge. ¹⁵ Temumaite ng'emibiri gyanyu niibyo ebitundu bya Kristo? kale nkwateenga ebitundutund bya Kristo mbifuule bitundutundu by'omwenzi? Kitalo. ¹⁶ Oba Temumaite ng'eyeegaita n'omwenzi niigwo mubiri gumu? kubanga atumula nti Bombiri babbanga omubiri gumu. ¹⁷ Naye eyeegaita no Mukama waisu niigwo mwoyo gumu. ¹⁸ Mwewalenga obwenzi. Buli kibbiibi kyonakyona omuntu ky'akola kiri kungulu ku mubiri; naye ayenda akola ekibbiibi ku mubiri gwe iye: ¹⁹ Oba Temumaite ng'omubiri gwanyu niiyo yeekaalu y'Omwoyo Omutukuvu ali mu imwe, gwe mulina eyaviire eri Katonda? mweena temuli ku bwanyu; ²⁰ kubanga mwaguliibwe na muwendo: kale mugulumizienga Katonda mu mubiri gwanyu.