¹ . Yabere ka Yesu Kristo kame Rubanga omio bute pi nyuto ne jo tie mege jamini kame pore timere owakawaka en ecwao kede malaika di eko yabo but ngatic mere Yokana. ² . Ngat kocungo mujura me kop ka Rubanga kede mujura ka Yesu Kristo kede ikom jamini dedede kame en eneno. ³ . Tie kede winyo ngat kame somo kede jo kame winyo kop me imurai ni kede jo kame gwoko giame owandiko iye pien kare odoko iyapi iyapi. ⁴ . but kanisan kanyare kame tie Esia man kop koyai abut Yokana kisa kede mulem bed but en ngat kame tie, ngat kogeo bedo tie sek, kede but ngat koyaro bino kede but cwenyere kanyare kame tie inyim kom me ajakanut mere. ⁵ . Kede kibut Yesu Kristo ngat kobedo mujura kame genere en ngat kobedo atin kao kibut jo koto kede ngadwong me abakai me wilobo kede kibut en ngat komaro wa di eko lwoko dub wa kede remo mere kikome. ⁶ . Di eko mino wa obedo abakai kede isaseredotin kibut Rubanga papa mere deyo bed but en kede epug nakanaka Amen. ⁷ . Neni en etie bino kede idoun di wang dedede ko nene di jo kame riki cobe kede abila dedede kame tie iwilobo ko bino koko pire en kamanono Amen. ⁸ . Ango Alpha kede Omega agege kede ajikini Rwot won twer dedede ngat kame nan tie ngat kogeo bedo tie sek kede ngat koyaro bino en owaco. ⁹ . Ango Yokana kame obedo omin wu kede kobedo ngaupau kede i ajakanut kede idiri ka Yesu Kristo ngat kobedo icula me patimo pi kop ka Rubanga kede ijura ka Yesu Kristo. ¹⁰ . Iceng ka Rwot di ango oudo atie icuny di ako winyo dwan adwong kicen ngea kame cal bala me agwara. ¹¹ . Di ewaco be ango Alpha kede Omega agege kede ajikini kede gikame in ineno wandiko en itbu di iko cwane buut kanisan kanyare kame tie Esia, Epeso, Simuna kede Pagamo kede Tuatira kede Saradis, Piladelpia kede Leodikia. ¹² . Di ango ako lokere neno dwan kame tie yamo keda. Kakame alokere kede ako neno gi cibo italan kanyare kame kotimo kede saabu. ¹³ . Di idiere diere me gi cibo italan kanyare tie iye dano kame cal bala wot ka dano di engapo ekansp kabor paka itiene piny di etweo kore kede rakoba kame kotimo kede saabu. ¹⁴ . Wie kede yer me wie oudo tar bala epamba, di etar bala akako di wange cal bala itonge me mac. ¹⁵ . Di tiene cal bala lilim kame kojililo bala kowango kede mac me otem di dwane mor bala pii atot. ¹⁶ . Di etie kede acerin kanyare icinge me tetecam di pala epima kame kopeno di but tuni tuni oko wok kidoge di nyime rieny bala ceng kame rieny kede teko. ¹⁷ . Kakame ako nene kede ako poto piny itiene bala dano oto. Di en eko keto cingo me tetecam ikoma di eko waco na be kur ilwori ango en agege kede ajikini. ¹⁸ . Neni ango ngat kakuo kame bin oto doko ango atie kede agony me kabedo me jo oto kede me to ango abedo nakanaka Amen. ¹⁹ . Wandiko jamini kame ineno kede jamini kame tie kede jamini koyaro timere kicen. ²⁰ . Mung me acerin kanyare kame in ineno icinga me tetucam kede gi cibo italan kanyare kame kotimo kede saabu Acerin kanyare obedo imalaikan me kanisa kanyare kde gicibo italan kanyare kame in ineno obedo kanisan kanyare.