¹ Gin iko ngolo loka nam tung ca, i piny me Gerasenes. ² Ikare kame en etieko wok kede i oko me yee, cucuto nono en eko riamo kede i cuo oko wok i wi atesin kame oudo tie kede tipo arac. ³ I cuo noni oudo maro bedo i wi atesin, doko oudo likame tie ngata moro kame twero twene akadi kede irikoi. ⁴ Pien oudo osingo twene kede lilim kede irikoi, do oudo ecocoto gi acocot, di etuturo lilim atutur i adulio, likame oudo tie ngata moro kame twero dare i paco. ⁵ Da iwor kede iceng en oudo ebedo i wi mori kede i wi atesin di ekok, doko di engongolo kome kede kide. ⁶ Do kakame eneno kede Yesu i kakabor, en eko ringo bute di eko mine wor, ⁷ di ekok kede dwan amalo, be “Yesu, Wot ka Rubanga Ngamalo Twal! Nyo kame in imito timo nango? Akwai i nying Rubanga, kur icana.” ⁸ Pien Yesu oudo owaco ne be, “In tipo arac, wok tenge kikom icuo no!” ⁹ Di Yesu oko penye be, “Nyingi ngai?” En eko dwoko di ewaco be, “Ango nyinga obedo Ekodet; pien wan otot.” ¹⁰ En eko donyo bako doge kitek but Yesu be kur eriam gi tenge ki piny nono. ¹¹ Esipan me ipegei oudo tie kuno i bad moru di kitie cam. ¹² Di tipo areco nogo oko donyo bako dog gi but Yesu di kiwaco be, “Cwai wan i kom ipegei ka, wek ooti odony i kom gi.” ¹³ Di do Yesu oko yei ne gi, di tipere kareco oko wok tenge kikom icuo nono kiko donyo i kom ipegei, di esipan dedede oko lor piny donyo i inam; wel me ipegei dedede kame oudo tie kuno oudo romo tutumia are, di gin kiko mwony i pii. ¹⁴ Jo kame oudo kwao ipegei nogo oko ringo di kiko tatamo ne jo kame oudo tie i bomba kede i calo gikotimere; di do jo oko bino neno gikame oudo otimere. ¹⁵ Di do gin kituno but Yesu, kiko udo lo kame oudo jwogi opong i kome nono di bedo kuno, di engapo igoen, di wie odoko ber; lworo oko mako gi. ¹⁶ Jo kame oudo tie neno gini oko tatamo ne jo apat epone kame kocango kede icuo kame jwogi oudo tie ne nono, kede gikotimere ne ipegei da. ¹⁷ Di do gin kiko donyo ngangao Yesu pi yai tenge ki adul gi. ¹⁸ Kakame Yesu oudo tie donyo kede ii yee, icuo kame oudo jwogi omako nono oko kwane be eyei ne eda upere kede. ¹⁹ Do Yesu likame oko yei ne, en eko waco ne be, “Dok paco but jowoti, di iko tatamo ne gi giadwong kame Rwot otimo ni, kede epone kame kisa omake kede i komi.” " ²⁰ Di do en oko yai ot Dekapoli, di eko cako tatamo ne jo giadwong kame Yesu otimo ne; di jo dedede oko uro gikotimere. ²¹ Kakame Yesu bobo ongolo kede nam tetuca kede yee, ekodet me jo oko cokere oluke i dog nam kuno. ²² Neni, icuo kame oudo obedo ngatel me sinagoga, kame nyinge Yairo oko bino, kakame eneno kede Yesu, en eko riebere piny itiene, ²³ Di eko donyo bako ne doge itek di ewaco be, “Nyara atidi mere tuwo itek mito to: okwe akwai, bia idokakino cingi ikome me wek ecang di eko kuo” ²⁴ Di Yesu oko upere kede en, ekodet me jo atot oko lube di kidire ikome ibad dedede. ²⁵ Di dako moro kame oudo tie kede tuwo me oonyo remo ikome pi mwakini tomon kiwie are. ²⁶ Di ebedo neno can twatwal i cing imuroko, doko oudo etio kede gi dedede kame oudo etie kede pi udo amuket; do likame gimoro aber oko neno, do tuwo oudo mede ameda doko rac. ²⁷ Kakame en ewinyo kede kop ikom Yesu, en eko bino eko ride icen ngei Yesu, eko mulo egoe ka Yesu. ²⁸ Pien en oudo eyamo be, “Ka koto amulo egoe mere kenekene da, abino udo cango. ²⁹ Cucuto nono oony me remo mere oko cungo; di do en eko winyo ikome kene be oudo do ecango i tuwo ocane no. ³⁰ Di cucuto Yesu oko ngeno ikome be twer oudo oyai ki kome, en eko lokere di eko penyo be, “Ngai komulo egoe na? ³¹ Di josiao oko waco ne be, In ineno kite kame jo tie dire kede i komi, di pwodi in itie waco be, “Ngai komula? ³² Do en eko donyo ngongolo jo pi neno ngat koudo otimo ginono, ³³ Do dako nono pi lworo kede mwel kom, kite kame oudo engeo kede gi otimere ne, eko bino riebere piny inyim Yesu, di eko tatamo ne gi dedede me ateni otimere ikome. ³⁴ Di en eko waco ne be, “Nyara, yei ni ocangi; ot kede mulem di iko cango Atwal ican ni no. ³⁵ Di Yesu pwodi tie yamo kope gi, jo mogo oko bino ipaco ka ngatel me sinagoga, di kiko waco ne be, “Nyari otieko to, pinyo komio bobo itie meede lolo Apwony?” ³⁶ Do kakame Yesu owinyo kede kope nogo, en eko waco ne ngatel me sinagoga be, “Kur ibed kede lworo, do kenekene bed kede yei” ³⁷ Yesu likame oko yei ne ngatamoro upere kede, kwanyo Petero, Yakobo kede omimere Yokana. ³⁸ Kakame en etuno kede i paco ka ngatel me sinagoga, eko neno cwer cuny kede koko atek kame oudo tie; ³⁹ Di do en eko donyo i yi ot, en eko waco ne gi be, “Pinyo komio wun itienu ilelem kede koko kitek? Atin ni likame oto, do enino anina.” ⁴⁰ Gin kiko bedo kede acae di kinyero. Do kakame en eko mino gin dedede donyo kede ooko, en eko kwanyo papa kede toto me atin kede jo kame en oudo eupere kede, kiko donyo i agola kakame oudo kopielo kom nyako iye. ⁴¹ En eko mako cing nyako di eko waco ne be, “Talita cumi; kame ogonyo be, “Atin nyako, awaco ni be, yai malo,” ⁴² Esawa nono, nyako noni oko yai malo di en eko cako ot: oudo en etie nyako me mwakini tomon kiwie are. Jo oko bedo kede ur adwong kakame gini otimere kede. ⁴³ En eko ciko gi kitek be kur kimi ngatamoro ngei kop noni; di do en eko waco ne gi be poore mine gimoro ecami.