¹ . Didokon en eko donyo ii Kaperanaum Ingei cengere mogo, di kop oko ngiere be en owudo etie iyot. ² . Awakawaka jo atot oko cokere karacel pakatuno kede kakame ogamo gi iye oko doko li Atwal paka iton iye ekeko di en eko tito kop butgi. ³ . Digin kiko bino bute diki kelo dano kame tuo oneko kome di icuo ongwon en owudo tinge. ⁴ . Dokon kakame gin owudo likame kitwero tuno kede engete pi alule mejo, gin kiko yabo wiyot malo itu kame en owudo ecungo iye dido kakame gin kitieko ture kede gin kiko cuano dano kame tuo oneko kome nono kede kabuto mere piny. ⁵ . Kakame Yesu oko neno kede yei gi en eko yamo ne ngatuo be “wudo bal ni otieko sasaro in” ⁶ . Do jomogo ikom jo awandik owudo tie bedo kuno gin kiko penyere iicungi be. ⁷ . Pinyo bo omio icuo ni yamo acae amano? Ngai en kame twero sasaro bal apat kede Rubanga kenekene? ⁸ . Awakawaka kakame Yesu ongieo kede icunye be gin kitie pepenyun amanokii dieregi kengi en eko waco negi be pinyo bo en ko mio wun ipepenyunu gigi kii cunyu. ⁹ . Oneko kome be Balni otieko sasaro arabo waco nebe yai, diikokwanyo kabutoni di iko ot? ¹⁰ . Do me wek wun ingiewunu be wot adano tie kede akamikin ipiny me timo kisa ikom bal, en eko yamo but dano kame tuo oneko kome be. ¹¹ . Ango awaconi be yai kwany kabutoni di iniko oot ii odi. ¹² . Awakawaka en eko yai eko kwanyo kabuto mere di eko oot kii nyimgi pakana mino gin dedede dong kede wur didokon kimio Rubanga deyo, di gin kiyamo be “wan geno likame oneno gimor acal kaman! ¹³ . Dokon en eko oot inget nam di alule mejo oko cokerere bute di en eko pwonyogi. ¹⁴ . Dido en etie beo en eko neno lebi wot Alipasi kanyilo risit me esolo en eko waco yaidi en eko lube. ¹⁵ . Dido oko timere amane be di Yesu obedo piny pi cam iyode jo rar esolo atot, kede jo dubo da oko bedo karacel kede Yesu kede josiao mege pien owudo gin kitot digin kiko lube. ¹⁶ . Dokon kakame jo iwandik kede Iparisayon oneno en di ecamo kede jo rar esolo kede jo dubo, gin kiko yamo ne josiao mege be, etie benyo omio en ecamo kede emato kede jo rar esolo kede jo dubo? ¹⁷ . Kame Yesu owinyo kede gino en eko yamone gibe jogo kame tie kiber likame mito dactale do jokame tuo: Ango abino likame pilwongo jokopore do pi lwongo jodubo iiswilar. ¹⁸ . Dokon owudo josiao ka Yokana kede me Iparisayon owudo onao kanyo kec: dido gin kiko bino kiko yamo nebe, pinyo bo omio josiao a Yokana kede me Iparisayon kanyo kec, do megin likame kanya kec? ¹⁹ . Di Yesu oko waco negi be, “Benyo idue me ngat ka gwoko eteran kanyo kec di eteran tie kedegi? Likame kiyara bino kanyo kec pi kare dedede kame eteran tie kede gi. ²⁰ . Cengere bino tuno kame otieko cengere bino tuno kame otieko tero eteran tenge ibutgi dido gin kiko bino kanyo kec iiceng nogo. ²¹ . Likame tie ngatamoro kame dapao iduku me egwe anyen ikom egwe oti iwudo be iduku anyen kame odapono bino mano kabedo me acon di eko nyilo iye epone arac adikinicel. ²² . Dokonda likame tie dano kame keto bwini kanyen ii icupan me bwini oti, iwudo be bwin anyen oyaro belo ecupan oti dibwini oyaro bino bwote piny di icupan kobino ngingidun. Do bwini anyen miero keti iicupan anyen. ²³ . Dido ekotime, be en ekoot di ebeo iipoto me bel iceng me sabato; di josiao mege oko cako dodoto wi bel digin kiooto. ²⁴ . Di Iparisayon oko waco ne en be, Neni pinyo komiogin kitimo gikame iswil likame oyei iceng mesabato? ²⁵ . Di en eko waco negi be Benyo wun likame isomunu gikame Daudi bin otimo, kame en owudo etie kede rem, di en owudo kec oneke, en kede jo kame owudo tie kede? ²⁶ . Epone kame en eoto kede iot ka Rubanga icengere Abiata esaseredot kamalo iswil likame oyei pi camo do ebedo me esaseredotin kenekene, di en eko mino da but jokame owudo tie kede en? ²⁷ . Dido en eko yamo negi be, ceng me sabato owudo bin otimo pi dano do likame dano otimo pi ceng me sabato. ²⁸ Pimano wot kadano obedo Rwot da me sabato.