¹ . Agege me ejiri ka Yesu Kuristo wot ka Rubanga. ² . Bala kame ko wandiko kede iye itabun me inabino be; Nenunu ango acwao ngaor nanago inyima, oyaro iiko yonyayo nin inyim. ³ . Dwan dano moro tie ilelem iwi itela di ewaco be, ikunu yongayo ka Rwot, miunu esokot mere cung di oriere. ⁴ . Yokana oudo tie batiso jo i e itela, di etito ibatisimu me iswilar pi udo isasir me gi kareco. ⁵ . Jo dedede me piny me Yudaya kede me Yerusalem oko oot bute di en eko batiso gi, i etau me Yorodan, di gin kituco gi ka reco gi. ⁶ . Yokana oudo bin ongapo yerme asigira di etweo piere kede iau: di oudo ecamo obonyo kede mo kic. ⁷ . En oudo etito di ewaco be, Tie dano moro kame tie bino icen ngea, en edwong eloa ango likame atwero iuro piny me gonyo kede mo kic. ⁸ . Ango gira ii ateni abatiso u kede pii; do en eyaro batiso u kede Tipo ka cil. ⁹ . Kakame do mogo dedede oko kato kede icengere go, Yesu dido oko wok i Nasaret me Galilaya di Yokana oko batiso en ii Yorodan. ¹⁰ . Awakawaka dido en ewok oko me pii, en eko neno malo di oyabere, di Tipo oko wokun imalo bino ikome. ¹¹ . Di dwan oko wokun imalo di waco be, Yin en woda kame ango amaro, di dokon cunya yom ikomi. ¹² . Cucuto nono di Tipo ka cil kwanye tere iwi itela. ¹³ . Di en eko bedo iwi itela kunono pi cengere ot ongwon, di Sitani tie tame, dokon oudo i eini me itela da tie kanono; do imalaikan oudo tie konye. ¹⁴ 14. Nan do icen ngei rwako Yokana ijera Yesu oko bino i Galilaya, di etito ejiri me Ajakanut ka Rubanga. ¹⁵ . Di ewaco be; kare do otieko romo dokon Ajakanut ka Rubanga otieko bino swilarounu do di ikounu yei ejiri. ¹⁶ . Kakame do en oudo etie oot kede idog nam me Galilaya, en eko neeno Simoni kede omimere Anderea di tie uco bwoni ii nam. Pien gin oudo kibedo jo cik. ¹⁷ . Yesu di oko waco ne gi be; Bia ilubanu di ango ako loko u idokunu jo cik jo. ¹⁸ . Cucuto nono, di gin kiko jalakino bwoini gi, di kiko lube. ¹⁹ . Kakame en enyimyiko kede anonok ikanono, en eko neno Yakobo wot ka Sebedayo kede omimere Yokana kame da dokon oudo tie ii ye di tie temuno bwoini gi. ²⁰ . Cucuto nono di en elwongo gi; di gin ki weko papa gi ii ye kede nga tic kame bin ko pango di gin kiko lube. ²¹ . Gin di kiko donyo ipiny me Kaperenaum; di en eko donyo isinagoga iceng me Sabato kede geno pwony cucuto nono. ²² . Di gin kiko uuro pwony mere. Pien en epwonyo gi bala dano kame oudo tie kede akarinikin, likame bala jo pwony me iswil. ²³ . Dokon kii sinagoga kanono oudo bin tie icuo kame oudo tie kede tipo ka rac: di en eko koko. ²⁴ . Di ewaco be, yin ba, wek wan, nyo en kame wan opore timo niin, yin Yesu me Nasaret? Benyo, yin ibino me dudubo wan do atwau? Ango angeo ngai kame yin ibedo, yin ibedo acel acil ikom Rubanga. ²⁵ . Yesu di ko juke di waco be, napakin di iko wok ikame tenge. ²⁶ . Kakame tipo karac oko yayango en kede, di eko kok kede dwan alongo, eko wok tenge me kome. ²⁷ . Di gin dedede kiko bedo kede ur, pka tuno irom me donyo pepenyun ken-gi ken-gi di ki waco be, kop nyo ine? Pien kede akarinikin, en ecikakino paka tipere ka reco di gin kiko winyo dwane. ²⁸ . Cucuto nono di rwonge mere oko sarakin irijonin ko liko Galilaya dedede. ²⁹ . Ikunono gin kiko wok oko me sinagoga di kiko donyo i ot ka Simoni karacel kede Anderea, Yakobo kede Yokana. ³⁰ . Do toto me dako ka Simoni oudo tie buto pien tuo me musuja omake, di gin kiko waco ne kop kamako tuo nono. ³¹ . En eko bino di eko mako cinge di eko kiarao en malo, cucuto nono di musuja oko weke, di en eko cako konyo gi. ³² . Kakame piny oyuto kede, dido ceng odonyo gin kiko kello ne jo dedede kame bin tuo omako, kede jo dedede kame jwogi odonyo ikom gi. ³³ . Dokon jo dedede me bomba nono okko cokere i diakal kanono. ³⁴ . Di en eko cango toto me jo kame oudo tie kede tuere ka papat, kede dokon riamo jwogi atot atota di likame en eyei negi yamo pien gin oudo ki ngee. ³⁵ . Kakame piny oru kede, di en eko yai i ot di piny pwodi col, di eko donyo kako ling, en eko donyo lego ikunono. ³⁶ . Simoni karacel kede jo kame oudo tie kede oko lube. ³⁷ . Kakame gin kiko ude kede, gin kiko owaco ne be, jo dedede tie moni. ³⁸ . Di en eko waco ne gi be, yaunu ootunu ibomban ki yapi yapi go da tetekeny wek ango atuc ejiri kunono da, pi tien kop nono en ko mio ango abino. ³⁹ . Di en eko tuco ejiri sinagogan gi di enaparo Galilaya dedede, di eriamo jwogi tenge. ⁴⁰ . Adobo moro diko bino bute, di kwae, di yamo be, okwec kame imito, lonya da. ⁴¹ . Di Yesu, oko pong kede kisa icunye, di eko cwano cinge, eko mule, di ewaco ne be, ango amito, aso lonyere. ⁴² . Awakawaka kame en etieko yamo, cucuto nono di dobo rwenyo ikome tenge, di en eko lonyere. ⁴³ . Di en eko corakino en itek, di eko cwane tenge. ⁴⁴ . Di ewaco ne be, Nen be liki yamo ne ngatamoro kop ni Atwal, do ape i ooti inyutere but esaseredot, di iko kwanyo irabu pi lonyere ni bala kame Musa bin ocikakino kede, pi bedo bala caden but gi. ⁴⁵ . Do en eko oot, di eko geno tatamo kope ka dedede obukui, paka tuno irom kame Yesu do likame twero donyo kede ibomba kaka ler, do oudo en do edong do bedo iwi tela, dido jo oko donyo bino bute di wok kii adulion dedede.