¹ Can but jogo kame iiko gikarac, di kiko timo gi karac iwi kabuto gi!. Di do odiko odoko ler kiko timo gi, piento tie itwer me cing gi. ² Doko gin kimuanao poti, di kiko mano tetek kiton ude, kiko tero, kitero dano kirac, kede paco mere, dano kiton jame mege. ³ Pi mano Rwot owaco bee, neni, akadi miere gi ango atie iiko negi gi karac, kame likame kiyaro kwanyo nguti tenge iye, ara bo oot kede ewaka. Piento kare ni rac. ⁴ Ikare no dano moro bino yamo agole ikomu di kiko wero wer me koko me itutur, di ki waco bee, wan do oyako wa; eloko iner me jo na; ekwanyo kibuta benyo! eloko tenge epopoko poti wa. ⁵ Pimano iyaro dong abongo dano kame bino rieno tol me poko lobo ii ekodet ka Rwot. ⁶ Kur imurao nu, gin ki yamo amano but jo kame murao; likame kiyaro murao ne gi, me kur lewic mak gi. ⁷ O un jo kame olwongo kede nying paco ka Yakobo, Cuny ka Rubanga tie ka adiding? tice mege ige? likame kop na timo gi ka ber but dano atimo gi katie atir? ⁸ Doko geno sek, jo na oyai malo bala nyakwor; igonyunu Ekansun kede igoen i kom gi, di gin kibeo abea iyo, di ki palaro bala ii moro li. ⁹ Mon me jo na, itiekunu riamo tenge me ude gi ka beco; doko ikwanyunu deyo na ikom idwe gi atwal, ¹⁰ Yaunu, i kounu kobo tenge; piento kan likame ka wei uu; piento emunaun, eyaro neko uu, kede amuducar atek. ¹¹ Kame dano moro oto i cuny kede angalo, di engalo bee, ango amurao ne uu kongo kede kongo akec; en kame eyaro bedo enabi ka jo gi. ¹² Iye ateni mere, ayaro coko uu, O Yakobo, un dedede; ayaro coko donge donge me jo Isirairi; oyaro coko gi karacel bala oromini me Bosora, bala oromini kame tie idier awi gi; ki yaro celakino pi neno jo katot. ¹³ Jo ka tuturo otieko bino negi; ki tuturo, ki donyo kiye erute, kiko wok oko kiye; Abaka gi telo yoo nyim gi, Rwot di tie atel wii gi.