¹ . Dido Yesu opony kede Tipo ka cil eko dwogo ki Yorodan, di tipo oko tele ot iwi itela? ² . Etieko ceng ot ongwon di oudo jwogi tie tame. Do i ceng go en likame eko camo gimoro. Kakame ceng go eko tiek kede, kec oko neke. ³ . Dido jwogi oko yamo ne be, kame in ibedo wot ka Rubanga cikakino kidi ni me wek edok kwon. ⁴ . Yesu oko dwoko ne be, owindiko be, Dano likame oyaro kuo kede kwon kenekene do kwanyo kede buli kop Rubanga. ⁵ . Dokon jwogi oko tere malo iwi moru kabor, eko nyuto ne ajakanuto me piny dedede ikare acecek. ⁶ . Jwogi oko waco ne be, twer me gigi dedede ango ayaro miini, kede deyo gi, pien bin ko keto gi icinga; ango da atwero keto gi icing ngat kame ango amito. ⁷ . Aso pimano, kame in ibino worango, gin dedede ki yaro bedo megi. ⁸ . Yesu oko dwoko ne di waco be; dwog cen ngea yin Sitani. Pien kowandiko be Yin ibino woro Rwot Rubanga ni, da di en kenekene kame iko tic ne. ⁹ . Dokon en eko kele i Yerusalem di eko kete iwi obibiru me wi tempulo, di eko waco ne be, kame di in bedo wot ka Rubanga jal komi piny ikano. ¹⁰ . Pien owandiko be, en eyaro cikakino imalaikan piri di gin kiko gwoki. ¹¹ . Di gin kiko tingi icing gi, me wek kur iret tieni ikom engaru iye sawa moro kenekene. ¹² . Di Yesu oko dwokone be, ko waco be, un liki tamo Rwot Rubanga wu. ¹³ . kakame jwogi otieko kede atama dedede, eko yai ki bute tenge pi kare moro. ¹⁴ . Di Yesu oko dwogo i Galilaya di etie ii twer me Tipo kacil di rwonge mere oko sarakin ipiny dedede koluko gi. ¹⁵ . En eko pwony i ka cokeren di jo dedede oudo keto deyo ikome. ¹⁶ . Di eko bino Nasaret kakame bin en edongo ki ye, bala kame oudo obedo kede epone mere, en eko ot kacokere iceng me Sabato, di eko cungo malo pi isoma. ¹⁷ . Ikunono di oko mine itabu me enabi Isaya, kakame en eyabo kede itabu, en eko udo dul kame owandiko be, ¹⁸ . "Tipo ka Rwot tie ikoma, piento en ewira pi tuce ejiri but jo can, en eora pi cango jo ame cuny gi otur, pi tuco alako but jo kame otero bedo ipasoi kede dwoko ne imudu ka wangi,pi kelo mulem but jo kame owandikino. ¹⁹ . Pi tito mwaka kame Rwot oyei kede. ²⁰ . Dido en eko cego itabu di eko dwoko ne ngatic di eko bedo piny. Di jo dedede me kacokere oko keto wangi ikome. ²¹ . En eko geno yamo ne gi be, ceng atini, en kame gi awandik ni ocobere kede iyit wu" ²² . Di jo dedede oko moko mujura ikome, di ki surao kope me kisa kame oudo wokun ki doge "Di kiwaco be benyo man liko obedo wot ka Yosepu?" ²³ . Di dokon en eko waco ne gi be, iye ateni wun iyaro nu yamo agole in buta. Emuron, cangere keni gikame wan owinyo be in itimo Kaperenaum timgi ipiny wu kane da. ²⁴ . En eko dokon waco be ateteni ayamo ne wu likame tie enabi moro kame oyei kede ki piny gi. ²⁵ . Do ango ayamo neu ateni be, oudo bin apuserun tot i Israel ikare ke Elia kakame malo oudo ocegere kede pi mwakini adek kede dwete kany ka pe, di kec kadwong oko poto ipiny no dedede. ²⁶ . Do likame oko cwano Eliya but moro kikom gi, kwanyo kocwae iseepta ibomba kadwong me Sidon but dako kobedo apuserut. ²⁷ . Dokon bin oudo jodobini tot i Israel ikare ke enabi Erisa, do likame tie acel moro kikom gi oko lonyere kwanyo na aman me Siria. ²⁸ . Jo dedede kame oudo tie ikacokere oko pony kede lilo kakame kiwinyo kede kope gi. ²⁹ . Di kiko yai malo di kiko pumaro en oko me bomba di kiko tere malo me emukura kame kogero iye bomba gi, me wek remuro en di eko poto adiri. ³⁰ . Do en eko beo idiere gi di eko ot mere. ³¹ . Eko bino piny ikaperenaum ibomba me Galilaya, di eko pwonyo gi icengere me Sabato. ³² . Gin kiko bedo kede ur ikom pwony mere pien kop mere oudo tie kede twer. ³³ . Doko ika cokere oudo bin tie icuo moro kame oudo tie kede tipo me jwogi karac, en eko geno keko kede dwan amalo. ³⁴ . Di ewaco be, wek wan ken wa, nyo do ber en kame wan opore timo kede in Yesu me Nasaret? Benyo, in do ibino pi dudubo wani? Ango angeo ngai en kame in ibedo in ibedo ngat acil acel me ka Rubanga ka malo. ³⁵ . Di Yesu oko juke, di waco ne be; napakin, di iko wok oko ikome. Aso kakame do jwogi oko uce kede piny idiere me jo, eko wokun oko ikome, di likame eko musungo en. ³⁶ . Dido gin dedede kiko bedo kede ur di ki yamo ken gi ken gi be, kop me epone mene ine pien kede akarinikin kede twer, en ecikakino tipo kareco di gin kiko wok oko. ³⁷ . Di rwonge mere oko srakin kadedede me piny nono. ³⁸ . En eko do yai ika cokere, eko donyo i ot ka Simoni toto me dako ka Simoni oudo musuja atek omako di gin kiko kwane pire. ³⁹ . En eko cungo kawiye, di eko juko musuja, di musuja oko weke awaka awaka di eko yai cake konyo gi. ⁴⁰ . Nan do kakame do ceng tie donyo kede, jo dedede kame oudo tie kede jo tuo me iponeso ka papat, oko kelo gi bute, di en eko ke eto cinge ikom buli dano, di eko cango gi. ⁴¹ . Jwogini diko wokun ikom jo atot kede koko di kowaco be, "in en kame Kristo wot ka Rubanga. En eko juuko gi di likame eyei ne gi yamo pien gin oudo ki ngeo be en ebedo Kristo. ⁴² . Kakame do piny otuno kede iceng en eko yai di eko ot i tela, dido jo oko donyo mone, dikiko bino bute, kiko genege be kur eyai tenge kibutgi. ⁴³ . Dido eko wano negi be, ang apoore tito ajakanut ka Rubanga ibomba ace da, pi tic nono en komio ko cwa. ⁴⁴ . Dido en eko tuco jiri ika cokeren me Galilaya.