¹ Pimano, kakame Rwot ongeo kede be Iparisayon oudo owinyo be Yesu oloko kede e batiso Josiao atot kakame kalamo Yokana ² bed bala Yesu en kikome oudo likame batiso, do Josiao mege oudo batiso ³ Eko yai i Yudea di eko bobo dok Galilaya ⁴ Do oudo epoore beno Samaria ⁵ En do eko bino i bomba me Samaria kame olwongo be Sikar, inget poto kame oudo Yakobo omio wode anyinge Yosepu ⁶ Nan kulo ka Yakobo oudo tie Kanono, pimano kite kame oudo Yesu ool kede ot Sapali mere eko bedo inget kulo di oudo eromo esawa Kanyape ⁷ Dako me Samaria oko bino twomo pii, Yesu oko waco ne be "mia pii amati" ⁸ Pi oudo Josiao mege oto i bomba wilo cam ⁹ Dido dako me Samaria oko waco ne be "epone mene kame in, lo obedo nga Yudaya penyo kede pii ibut ango dako me Samaria?" Piento Jo Yudaya likame ribere kede Jo Samaria ¹⁰ Yesu odwoko di eyamo ne be, koto di ingeo giamia ka Rubanga, kede ngat kame tie waco ni be imie pii emati, koto oudo ipenye di koto eko mini pi me kuo ¹¹ Dako ni oko waco ne be, adwong in likame itie kede gii twomo pii, do bobo kulo tut. in do iudo pii me kuo no ituai? ¹² In iparo be i dwong kalamo papa wan Yakobo, omio wan kulo ni, di eda ikome emato pii noni karacel kede idwe mege kede leini mege da ¹³ Yesu odwoko di ewaco ne be, "orio bobo oyaro neko ngat amato pii ni" ¹⁴ Do ngat kame mato pii kame ango ayaro mio lika bino winyo orio, do pii kame ango amio bino doko kulo me pii kame wok di donyo ikuo me kare kalikame Jik ¹⁵ Dako ni oko yamo ne be "Adwong mia pii noni, wek orio kur bobo neka, di kur dokon ako bino kan twomo pii" ¹⁶ Yesu oko waco ne be, "oti ilwong cwari, di ikounu bino kan". ¹⁷ Dako ni oko dwoko di ewaco be, "ango likame atie kede icuo" Yesu oko waco ne be "in i yamo i ber be, "ango likame atie kede icuo" ¹⁸ Piento in itieko bedo kede cuo kany, do mano kame nan i bedo kede da likame obedo cwari. in i waco kop me ateni ¹⁹ Dako ni oko waco ne be, "adwong, atamo be in i bedo enabi. ²⁰ Jo apapi wan oudo woro Rubanga iwi moru ni, do wun i Yudayan iyamunu be Yerusalem en kame kabedo tie iye kame jo pore woro iye Rubanga ²¹ Yesu oko waco ne be, "dako, yei kop na, kare tie bino kame in likame i bino kede woro Papa iwi Moru ni, arabo i Yerusalem. ²² wun i worunu gikame likame ingeunu, do wan ongeo gikame wan oworo piento alako tie me i Yudayan ²³ Do kare tie bino, dokon en ine, kame jowor me ateni bino woro kede Papa i cuny kede ateni; piento Papa tie mono jo acal kaman pi wore ²⁴ Rubanga obedo Tipo, aso Jo kame wore miero wore i cuny kede ateni ²⁵ Dako ni oko waco ne be, "ango angeo be ngalak tie bino (kame olwongo be Kristo). kame en ebino eyaro mino wa niang kope dedede." ²⁶ Yesu oko waco ne be, "ango en ine, ngat kame in itie yamo kede en bino." ²⁷ Esawa nono dido Josiao mege dwogo. di iko wuro piento iude di etie yamo kede dako; do likame tie ngat oko penyere be, "itie mono nyo?" arabo "pinyo omio itie yamo kede?" ²⁸ Dako ni do oko weko agulu mere, di eko dok ibomba, di ewaco ne jo ²⁹ "Bia inenunu icuo owaco na jame kame lem ango atimo dedede. Mam man en Kristo ³⁰ Dido gin iko yai ibomba di kiko bino bute ³¹ Do esawa nono Josiao mege oudo tie kwane di kiyamo be, "Rabi cami." ³² Do en eko waco negi be, "ango atie kede cam me acama kame wun likame ingeunu." ³³ Pimano Josiao oko donyo yamo ken gi be, "mam ngatamoro oudo okelo ne cam?" ³⁴ Yesu oko waco negi be, "cam nango en timo mit mere, en ngat ko ora, kede tieko tic mere. ³⁵ Do mam wun iwacunu be, "dwete ongwon pwodi odong dido kare me kac tuno? Nenunu, awaco newu tingunu wang wu malo di ikonu neno poti, piento itieko doko tar mito akaa! ³⁶ Do en nga kac oudo cul mere, di eko coko anyakini me kuo me kare dedede, pi wek ngat kame cuo kede ngat kame kao leli karacel. ³⁷ Pimano ni, kop kame awaco tie ateni, "ngat acel cuo do ngat apat kao." ³⁸ Ango aoro wu kano gikame wun likame iketunu teko wu iye. Jo apat oketo teko gi iye, do wun idonyunu iyi teko gin. ³⁹ Dido Jo Samaria atot me bomba no oko yei en pi kop kame dako ni ojurao, "En eko yamo di dedede kame riki atimo." ⁴⁰ Kakame do Jo Samaria obino kede bute, kiko Kwane be edong bedo kede gi di eko bedo kuno tieko ceng are. ⁴¹ Di jo ace atot oko yei pi kop mere ikome. ⁴² Dido kiko yamo ne dako ni, "Nan do wan oyei, likame pi kop kame in iyamo, pi wada ikom wa otieko winye dokon da wan ongeo be loni ateteni en Kristo, ngalak piny. ⁴³ Nan ingei ceng are en eko yai ikano di eko ot Galilaya ⁴⁴ Piento Yesu kikome oudo otuco be enabi likame udo wor i tur gi ⁴⁵ Kakame do ebino kede Galilaya, Jo Galilaya oko game, pien oudo kineno gi dedede kame en etimo i Yerusalem i ebaga: pien oudo gi da i oto i ebaga. ⁴⁶ Yesu bobo oko dwogo i adul me kana me Galilaya kame oudo eloko kede pii doko bwini. Do oudo tie ngadwong moro oudo wode tuo i Kaperanaum ⁴⁷ Kakame ewinyo kede be Yesu oudo oyai i Yudea do ebino Galilaya, eko ot bute di eko kwane bino cango wode, "Pien oudo eyapuno to. ⁴⁸ Do Yesu oko waco ne be, "wun do ka likame inenunu anyut kede giaura, likame do ibinunu yei ⁴⁹ Ngadwong ni oko yamo ne be, "Adwong bia ba di pwodi woda likame oto." ⁵⁰ Yesu oko yamo ne be, "Doki do: wodi oyaro kuo." Icuo ni do oko yei kop kame Yesu oyamo ne, do eko dok. ⁵¹ Kakame do etie dwogo kede, jo tic mege oko riamo kede di kiko waco ne be, "wodi kuo!" ⁵² Di eko penyo gi esawa adi kame en ecango kede. Gin kiko waco ne be, "musuja oweke nyoro esawa kanyaare." ⁵³ Papa mere do oko ngeno be oudo i esawa nono en kame Yesu oyamo ne kede be, "Wode kuo." Dido en kikome eko yei, kede dyakal mere da dedede. ⁵⁴ Manoni bobo obedo anyut me are kame Yesu otimo kakame eyai kede i Yudea donyo Galilaya