¹ I agege, kop oudo tie, kop oudo tie kede Rubanga, doko kop oudo en Rubanga. ² En oudo etie kede Rubanga cako ki agege. ³ Jame dedede oudo ko cweo beo ki buten, dokon da di kede en di oudo abongo en lika tie gimoro kame ocweere ⁴ Kuo oudo tie i en, doko kuo nono en kame oudo obedo lero me jo. ⁵ Lero nono rieny i colo, do likame colo oko bwone ⁶ Riki tie icuo moro kame nyinge Yokana, kame Rubanga ocwao. ⁷ En oudo ebino pi bedo i jura pi jurao lero nono, tetekeny jo dedede yei pi kop mere. ⁸ En likame oudo ebedo lero nono, do en bin oudo kocwae pi mino ijura i kom lero nono. ⁹ Mano oudo en lero me ateni, kame mio lero kacaro jo dedede, kame tie bino iwi piny ¹⁰ En oudo etie i piny, doko en kame ecweo piny, do piny likame oko ngene. ¹¹ En oudo ebino but jo mege ikome kome, do jo mege ikokome likame oko game ¹² Do jo dedede kame bin oko game, en bin emio gi twer me doko idwe ka Rubanga, i ton jo kame bin oyei nyinge. ¹³ Kalikame onywalo kede remo, doko likame pi mit me kom arabo mit ka dano, do pi mit ka Rubanga. ¹⁴ Kop oko doko dano, di eko bedo idiere wa, wan oneno deyo mere, deyo ka wod acel kenekene kame owok kibut Papa. ¹⁵ Yokana bin omio ijura ikome di elelemo be, man en ngat kame bin ango awaco kop ikome be, "ngat kame tie bino icen ngea pire dwong loa, pien oudo en etie sek di pwodi ango ali." ¹⁶ Ki ipong mere wan dedede otieko oudo kisa iwi kisa. ¹⁷ Pien bin ko mio iswil di beo kibut Musa, do kisa kede ateni bin obino di beo kibut Yesu Kristo. ¹⁸ Likame tie dano kame otieko neno Rubanga esawa moro kenekene do kwanyo wod ka Rubanga acel kenekene, kame tie ikor Papa en ngat omie engere. ¹⁹ Man en kop me ijura kame Yokana bin omio ikare kame i Yudayan ocwao kede Josaseredoti kede jolebi ki Yerusalem pi penye be, "in en ngai?" ²⁰ En likame eko dagi dwoko ne gi kop, en eko tuco di likame dagi, di etuco be, "Ango likame Kristo." ²¹ Gin kiko penye be, in do ngai? Benyo in en Elia? "en eko dwoko be, nyo do you ber? "li", kiko bobo penye be, "in do enabi?" en eko dwoko be, "li" ²² Gin kiko penye be, "in do ngai, niang wa me wek oud kop kame otwero dwoko ne jo kame ocwao wa? kop nyo kame mako in kame in iromo waco?" ²³ En eko waco be, "Ango en dwan dano kame lelemo itim be, Rieunu yongayo ka Rwot, "Bala kame bin enabi isaya owaco." ²⁴ Iparisayon en kame oudo bin ooro gi. ²⁵ Gin kiko penye be, "Do pinyo komio in i batiso jo ka in likame ibedo Kristo, amoto Elia, arabo enabi?" ²⁶ Yokana oko dwoko ne gi be, "Ango a batiso kede pii, do tie ngat kame ocungo idiere wu kame wun likame ingeunu. ²⁷ En ngat kame tie bino icen ngea, emitere lono kiyima ango likame apoore pi gonyo ausi me amuka mere. ²⁸ Gigi otimere ibetabara iloka tetuca me Yorodan, kakame Yokana oudo bin tie batiso iye jo. ²⁹ I ceng kame lubo Yokana oko neno Yesu di tie bino bute, di en eko waco be, "nenunu, katin romo ka Rubanga kame kwanyo gika reco me piny lung!" ³⁰ Man en ngat kame bin ango awaco kop ikome be, "ingei bino na tie dano kame tie bino icen ngea, en ogeo bedo tie di pwodi ango ali" ³¹ Ango oudo likame ange do en epoore neeno but jo me Isiraeli. Pimano en oko mio ango abino di a batiso kede pii. ³² Yokana di ko mino i jura di waco be, "ango aneno Tipo kacil di bino piny i malo bala awele di eko dong ikome. ³³ Ango da kikoma oudo likame angee, do ngat kame oora pi batiso jo kede pii oko waco na be, "ngat kame ineno Tipo kacil obino piny di oko dong ikome, manono en ngat kame batiso jo kede Tipo kacil. ³⁴ Ango a neno di ako jurao be man en wot ka Rubanga." ³⁵ I ceng alubo, Yokana oudo bobo tie cungo kede jo are ikom Josiao mege. ³⁶ En eko neno Yesu di tie ot, di eko waco be Dido en oudo etie ngico Yesu di tie ot, eko waco be, "Nenunu Katin romo ka Rubanga!" ³⁷ Josiao are nogo bin owinyo di en ewaco kop noni, gi ko lubo Yesu. ³⁸ Yesu oko lokere di eko neno gi di kitie lube, en eko penyo gi be, "I mounu nyo?," gin kiko dwoko ne be, "Rabi" (kame dwong mere be "nga pwony"), "in i bedo tuai?" ³⁹ En eko waco ne gi be, "Bianu inenunu." gin kiko ot neno kakame oudo en ebedo iye cenge no gin kiko bedo kede en pien esawa oudo iyapiyapi romo tomon. ⁴⁰ Ngat acel kikom jo are go kame bin owinyo yamo ka Yokana di eko lubo Yesu, oudo obedo Anderia omime Simoni Petero. ⁴¹ En egeo udo omimere Simoni, di eko waco ne be, "wan otieko udo Masia" (kame dwong mere be "Kristo") ⁴² En eko tere but Yesu. Yesu kakame onene kede en eko waco be in Simoni wot ka Yokana. Kobino lwongi be Kepa" (kame dwong mere be "Kidi") ⁴³ I ceng kame lubo Yesu oudo mito ot Galilaya, en eko udo Pilipo di en eko waco ne be," luba." ⁴⁴ Pilipo oudo obedo dano me Betesaida bomba kame Anderia kede Petero udo bedo iye. ⁴⁵ Pilipo oko udo Nasanairi di eko waco ne be, "wan oudo ngat kame bin Musa o wandiko kop i kome i tabu me iswil, kede kame inabin, da o wandiko kop i kome, en Yesu me Nasaret wot ka Yosefu." ⁴⁶ Nasanairi oko yamo ne be benyo, "Gimoro aber twero wok ki Nasaret?" do Pilipo oko dwoko ne be, "Bia i neni." ⁴⁷ Kakame Yesu oneno kede Nasanairi di tie bino bute, en eko waco ne be, "nenunu dano me Isiraeli kame lii kede raco more ikome!" ⁴⁸ Nasanairi oko yamo ne be, "in iko ngeno benyo?" Yesu oko dwoko ne be, "Di pwodi Pilipo li olwongi, di pwodi in itie idud yat epigi, ango oudo atieko neni." ⁴⁹ Nasanairi oko dwoko ne be, "Apwony, in ibedo wot ka Rubanga! in en abaka me Isiraeli" ⁵⁰ Yesu oko dwoko ne be, "benyo pi kite kame ango awaco ni kede be aneni di pwodi itie i dud yat epigi?" iyei be itwero neno jami adongo dongo kato magi. ⁵¹ En eko waco ne, "ateteni, ateteni awaco ni be, ibino neno malo di yabere, kede imalaikan ka Rubanga di tie ot malo kede di kitie bino piny ikom wot ka dano"