¹ Do iceng me adek, nyom oudo tie Kana me Galilaya, do toto me Yesu da oudo tie kuno. ² Yesu karacel kede josiao mege da oudo olwongo i ebaga me nyom nono. ³ Do kakame bwini oko tiek kede, toto me Yesu di oko waco ne be. "Bwini do kara li negi." ⁴ Do Yesu oko dwoko ne be, "Dakoni nyo omio itie loka? pien esawa na pwodi likame otuno" ⁵ Do toto mere oko waco ne jotic be, "Wun timunu gi dedede kame en ebino waco ne wu timo." ⁶ Do kunono oudo tie agune kanyape kame kotimo kede engaro, di lubere kede itok me lunyere me Iyudayan, buli agulu acel acel oudo tero gillamis ot are tuno kede i ot adek me pi. ⁷ Yesu oko waco negi be, pongunu agune go kede pii" di gin kiko pongo gi kede pii tuno idog gi. ⁸ Di Yesu oko waco ne gi be, "twomunu ber mogodi ikonu tero ne ngadwong me ebaga me nyon." Gin kiko timo amanono. ⁹ Do kakame ngadwong me ebaga me nyom obilo kede pii kame koloko odoko bwini, en oudo likame engeo kakame okele kie (do jo tic kame oudo otwomo ne pii ngeo). Ngadwong me ebaga me nyom di oko kwanyo eteran ¹⁰ di eko waco ne be, "jo dedede ber poko bwini kame mit, do kame jo omate gin di iko mer. Ogeo poko negi ber bwini kame bot mere do in iko twero gwoko bwini kamit paka tuno naan." ¹¹ Man en agege me tangu kame Yesu otimo icana me Galilaya, di deyo mere oko neno, di jo siao mege oko bedo kede yei ikome. ¹² Do icen ngei man, Yesu oko oot Caperanaum, en karacel kede toto mere, kede imyegu mege, kede josiao mege ¹³ Do ebaga me kalamo me iyudayan oudo odoko iyapiyapi, do Yesu oko oot paka Yerusalem. ¹⁴ Di eko udo ii tempulo jo kame tie cato twonin, romini kede amam, kede jo kame seso sentes do oudo kitiye bedo ¹⁵ Do en eko cweno ebela me iyera eko riamo gin dedede oko me tempulo kede twonin, kede romini .Di eko kikiro sente akaya me joo oudo tie seso di erereto imesai gi. ¹⁶ Di eko waco ne joo oudo cato amam bee, "terunu gigi tenge pien kuri ilokunu ot apapana pi doko oot me caat." ¹⁷ Di josiao mege oko yutuno be oudo wandiko, "Nyeko kame atie kede pi odi tie ramo cunya." ¹⁸ Di iyudayan oko waco ne be, "Gianena nyo kame iyaro nyuto ne wan, pi neno akarinikin kame in itie kede itimo gigi." ¹⁹ Do Yeso oko dwoko negi di ewaco be, "Retunu tempulo ni, do ango ako bino gere bobo icengere adek." ²⁰ Do Iyudayan oko waco be, "Gero tempulo ni otieko newan mwakini otoongwon iwie kanykape, itemo be in itwero gere mala pi ceng adek kenekene?" ²¹ Do Yesu oudo tie yamo kop amako tempulo me kome. ²² Pi mano, ikare kame oyaruno en kede ikom jo oto, Josiao mege oko yutuno kop kame en oudo ewaco nogi, gin kiko yesi ikom iwandik acil kede kop kame Yesu opwonyo. ²³ Ikare kame Yesu oudo tie kede Yerusalem, i ebaga me Kalamo, iceng me ebaga, jo atot oko yei inyinge kakame gin ineno kede gianena kame en etimo. ²⁴ Do Yesu likame oko keto tam mere ikom gi pien oudo engeo gi dedede kede tam gi, ²⁵ Doko oudo likame emitere pi dano moro mino ijura ikom dano pien en oudo engeo gikame oudo tie icuny jo.