¹ Oko timere kaman ikare go, di oudo Abaka li i isirail tie oudo nga Levi moro oko dak inget moru me Ephraim kame okelo dako ebedo kede abongo nyomo, i Betelekem - Juda. ² dako mere kame li konyomo nono, oko timo ne tim me malaya, eko yai kibute eko dok turgi paco ka Papa mere, i Betelekem - Juda, eko tieko dwe acel lung kuno. ³ Cware di ko yai, oko oot wape, pi poro kop me awotin gi kede, kede pi dwoke, eupere kede epasoit mere, kere apundan are; dako nono oko tere i ot ka Papa mere; do kame Papa me nyako onene kede, eko ilel pi riamakin kede ⁴ di do ore, Papa me nyako, oko game; eko bedo kede ceng adek: kiko cam, kiko mat, eko buto kuno. ⁵ oko bedo kaman iceng me ongwon mere, di gin ki dilo yai sek, di en eyai pi dok: Papa me nyako oko waco ne ore bee, kwei ber cunyi kede kwon kame odolo, icen mere do iko yai. ⁶ Kiko bedo piny, kiko cam, kiko mat gin dedede karacel; piento Papa me nyako owaco ne icuo nono bee, akwai bee, napakin, iko buto iwor ni dedede, me cunyi bed di ilakara. ⁷ Kame icuo ni oyai kede pi oot, ore diko dine: pi mano en bobo eko buto kuno. ⁸ en eko dilo yai odiko sek i ceng me kany mere, pi oot; Papa me nyako di ko waco ne bee, akwai bee, kwi ber cunyi: kiko bedo paka otieno, kiko cam gin dedede. ⁹ Kame do icuo ni oyai kede pi oot, en, kede dako mere kame likame enyomo nono, kede epasoit mere, di ore Papa me nyako, oko waco ne bee, neni, piny oyuto, but kan, me cunyi kwei, diki odiko sek iko dilo yai oot, iko do dok paco. ¹⁰ icuo nono likame oko yei buto kuno iwor no, do en eko yai eko oot, eko tuno i Jebus (kame en Jerusalem) oudo tie kede apundan are kame ongapo ne gi gi me oot itien gi, dako mere kame likame enyomo oudo tie kede ¹¹ Kame do oudo gin kitie kede, i Jebus, piny do oudo otieko yuto; epasoit di ko waco ne nya dwong mere bee, akwai bee, bia oparao i Bomba ni me Jebusiti ni, obut iye. ¹² Nya dwong mere oko dwoko ne bee, wan likame omito beo kano i Bomba me jo ka pat, jo go likame obedo jo me isirail, wan omito kato akata i Gibeah. ¹³ en eko waco ne epasoit mere bee, bia, anonoko kabedo acel ikom kabedo go, oko buto iye iwor, ooti i Gibeah ara bo i Ramah ¹⁴ kiko kato kede oot gi; ceng oko donyo ne gi di pwodi kitie i Gibeah, me jo ka Benjamin. ¹⁵ Kiko parao kuno, pi donyo iye, kede pi buto i Gibeah, do kame en edonyo kede kuno, eko bedo piny i yongayo me dier Bomba; piento likame tie dano moro ko tero gi i ode pi buto. ¹⁶ Do, neni, adwong moro otii, owok ika tic ipoto mere otieno, kame tie dano me moru me Ephraim; eda edak adaka i Gibeah, do jo piny me kanono obedo jo ka Benjamin. ¹⁷ Kame etingo kede wange, eko neno kame kabeo li ne, di etie iyonga yo me dier Bomba; adwong nono di ko waco bee, in itie oot twai? do in iwok kitwai? ¹⁸ en eko dwoko ne bee, wan otie beo i Betelekem - Juda di ooto inget moru me Ephraim; ango atie dano me kuno; ango abeo i Betelekem - Juda, do ango na atie oot i ot ka Rwot, do likame tie dano moro kogama i ot ¹⁹ do kom wan otie kede arienge kede cam are dedede me apundan wa; wan otie kede mugati kede vini na kede me apasoit ni da tie, kede me eponga kame tie kede epasoit ni da; likame tie gi korem ne wan ²⁰ Adwong otii di ko waco bee, mulem bed buti; i epone moro dedede, wek do jame dedede korem bed but ango; kenekene kur do i but iyongayo. ²¹ Aso en eko tere i ode, eko mino apundan mege cam; kiko lwoko tiengi, kiko cam kede mat. ²² Nan do kame gin kitie yomo kede cuny gi, neni, cuo me Bomba, awobe mogo kame wigi reco, oko luko ot rimaro, kiko jujuto ekeko, kiko waco ne won oot, adwong otii nono bee, kel ne wan dano ko donyo iodi no wan omito ngene. ²³ Di icuo nono, won ot, oko donyo oko but gi, di ko waco ne gi bee, imieguna, li, akwao u be li, kur itimunu gi ka rac; di inenunu bee, dano ni odonyo i oda kur itimunu mingo acal kamano ²⁴ Neni, nyara tie kan, aponga, kede dako mere kame li enyomo; jo go ango amito kelo oko butu, ibutunu kede gi, itimunu kede gi gikame imitunu timo kede gi; do but icuo ni, kur itim ne nu gi ki sil ²⁵ Cuo gi likame oko winyo kop mere; icuo ni di ko kwanyo dako mere kame likame enyomo, eko mino but gi; gin kiko ngene, kiko timo anywar ikome iwor no dedede paka odiko; kame do piny owalar kede do, kiko weke weke do eoto. ²⁶ dako ni dido oko dwogo di piny owalar, eko poto piny idog ekeko me ot ka dano ca, kame adwong mere tie iye, paka piny doko ler. ²⁷ di adwong mere oko yai malo odiko, eko yabo ekeko me ot, pi yai do oot oot mere; do, neni, dako mere kame likame enyomo opoto piny i dog ekeko me ot, di cinge oriere i dog ekeko ²⁸ eko waco ne dako bee, yai malo, omede kede oot. Do ngat adwoko kop li, icuo di ko tinge ingei apunda, icuo di ko yai malo, eko oot kame ebedo iye. ²⁹ kame etuno kede iode, eko kwanyo pala, eko mako dako mere kame li enyomo nono, eko popoko en, kiton cogo mege, i adulion tomon i wie area, eko cwano gi i adulion dedede me isirail. ³⁰ oko bedo kamano bee, jo dedede kame oneno waco bee, likame tie lem gi kotimere ara ko neno geno riki sek i kare kame idwe me isirail owok kede i misiri, paka tuno tin, oparunu kop ni kelunu tam iye, yam gikame itamo iye.