¹ Ikare no oudo Abaka li i Isirail; doko ikare no oudo ateker ka Dan tie mono lobo me atera pi bedo iye; piento ikare nono oudo pwodi gin dedede likame ki udo lobo ikom jo me Isirail ² idwe ka Dan di ko cwano jo kany i diekal gi, i adul kame kitie ite, cuo kodongo di tek, yai ki Zorah kede ki Eshtaol, pi oot kebero lobo, kede pi timo ngic iye jogo di ko tuno imoru me Ephraim, iot ka Mikah kiko buto kuno ³ Kame do oudo gin kitie kede i ot ka Mikah, kiko ngeno dwan eponga nga Levi ca, kiko lokere donyo bute, kiko waco ne bee, ngai en ko keli kan? kede da, in itimo nyo ikan? doko nyo kame in itie kede kan? ⁴ en eko dwoko ne gi bee, Mikah otimo na kaman, kede amaka, eko panga, ango nan do atie Esasorodot mere ⁵ gin kiko waco ne bee, wan okwai bee, peny tam ka Rubanga, me wek ongei kame oot kame wan otie oot ni bino cobere kiber. ⁶ Esasorodot oko waco ne gi bee, ootunu kede mulem; oot kame itie nu iye no, tie inyim Rwot ⁷ jo kany gi di ko yai, kiko tuno i Laish, kiko neno jo kame tie kuno, kite kame kibedo kede atatai, kibedo bala jo me Sidon, ki palaro, kede mulem, likame tie angol kop moro ilobo nono, kame twero mino lewic mako gi ikop moro; bobo oudo kitie ka bor kede Sidon, doko likame tie cat moro kame kitie kede, kede dano moro. ⁸ gin kiko dwogo but imiegu gi i Zorah kede i Eshtaol; imiegu gi di ko penyo gi bee, un iyamunu nyo? ⁹ gin kiko dwoko bee, yaunu, me wek ootunu osurunu gi; piento wan oneno lobo, doko neni, eber twatal: un pwodi itienu bedo? kur iyalangonu oot kuno kede donyo pi tero lobo. ¹⁰ Kame itie nu oot, iyarunu tuno but jo ko papalo, doko ilobo kalac; piento Rubanga otieko mino gi icingu; kabedo kame gi korem likame tie iye ikom jame me piny. ¹¹ Jo me diakal ka Dan di ko yai ikuno kiko oot, ki yai ki Zorah kede i Eshtaol jo kol kanyape kame mako jame me ii. ¹² gin ki ko oot, kiko gero iemai gi i Kirjas - Jerim, i Juda; en komio kiko cako nying konono bee, Mahaneh - dan paka tuno na; neni etie cen ngei Kirjas - Jerim. ¹³ kiko beo kuno ki moru me Ephraim, kiko tuno iot ka Mikah. ¹⁴ Jo kany ko oot kebero lobo me Laish, di kiko waco ne imiegu gi bee, do un ingeunu be Ephod tie iot ni kede akodolong, kede cal atwaka, kede kame otimo kede cing? na do parunu gikame itie nu timo. ¹⁵ kiko lokere tetukuno, kiko tuno iot me Eponga me Levi ipaco ka Mikah, kiko mote ¹⁶ di jo tol kanyape kame oudo mako jame me ii; kame obado idwe ka Dan, oko cungo idog erute me donyo ipaco. ¹⁷ di ko kany koudo ooto pi kebero lobo oko oot, kiko donyo kuno, kiko kwanyo cal atwaka, kede Ephod, kede cal me akodolong, kede cal kame otimo kede cing; di Esasorodot oko cungo ii erute me donyo, kede jo tol kanyape kame mako jame me ii. ¹⁸ jo go di ko donyo iot ka Mikah, kiko kwanyo cal jwogi okude, kede Ephod, kede cal me Akodolong, kede cal atima me cing, Esasorodot oko openyo gi bee, itie nu timo nyo? ¹⁹ gin kiko dwoko ne bee, ling tii, um dogi kede cingi, di iko upere kede wa, iko doko Papa wa kede esasorodot; Tie gi kaber ne ni bedo esasorodot me iot me dano acel kenekene, ara bo bedo esasorodot amako ateker kede diakal i isirail? ²⁰ Cuny Esasorodot oko doko yom, eko kwanyo Ephod kede cal me akodolong, kede cal atwaka, eko oot ki diere me Jo. ²¹ aso kiko lokere kiko yai, kiko keto idwe atino kede leini, kede yec anyim. ²² di do gin kikato ka bor kede ot ka Mikah, jo kame ude gi kio kede me ka Mikah oko cokere karacel, kiko mako idwe ka Dan, iyongayo. ²³ di kiko ilelem but idwe ka Dan, di kiko loko nyim pi, di kiko waco ne Mikah bee, nyo kame tie loli, komio ibino kede egere me ekodet no. ²⁴ en eko dwoko bee, un ikwanyunu rubangan na, kame ango atimo, kede esasorodot da, ikounu yai; ango nan do adong kede nyo ace? nyo do ber in kame un iwacunu ne ango bee, nyo ka tie loli? ²⁵ idwe ka Dan oko waco ne bee, jur dwani med winyere idiere wa, me jur jo ko doko ger ringini ikomi, iko kei kwo ni, kwde kwo me jo turi. ²⁶ idwe ka Dan di ko oot, oot gi; di do Mikah oneno kede bee, jo nogo tek bwone, eko lokere eko dok ture. ²⁷ kiko tero jamini kame Mikah oudo otimo, kede esasorodot kame oudo etie kede, kiko tuno i Laish, but jo ko udo opapalo di opalaro; kiko neko gi kede pala me ii, kiko wango Bomba kede Mac. ²⁸ likame oudo tie ngat kame twero lako gi, piento oudo kitie kame bor kede Sidon, bobo ki li kede cat kede wil, kede ngata moro; doko oudo kitie inge osamai kame lor tetu Bethrehob, gin kiko gero Bomba, kiko bedo iye. ²⁹ kiko cako nging Bomba nono bee, Dan, bala nying Dan papa gi, kame oudo konywalo ne Isirail: do kame edoko kamano da, nying Bomba nono riki sek oudo Laish. ³⁰ Di idwe ka Dan oko keto cal atwaka; di Yonosani, wot ka Geresomu, wot ka Manase, en kede awobe mege kiko doko Esasorodotin, me jo me ateker ka Da, pala tuno iceng kame jo me piny odoko kede ipasoi. ³¹ Kiko keto cal atwaka ka Mikah, kame won otimo kare go dedede di oudo ot ka Rubange oudo tie i Shiloh