¹ . Paulo ngaor ka Yesu Kristo di beo kii mit ka Rubanga, en karacel kede omin wa Temeseo. ² . But jo ka cil kede imiegu me agena ki Kristo kame bedo ikolosai. kisa bed buttu, kede anapakin kame yai ki but Rubanga papa wa kede Rwot Yesu Kristo. ³ . Wan omio pwoc but Rubanga papa ka Rwot wa Yesu Kristo, di olego didik pir wu. ⁴ . Geeno kakame wan owinyo kede yei wu ikom Kristo Yesu. kede amara kame un itieunu kede ikom jo kacil dedede. ⁵ . Pi gen kame koketo pir wu imalo. Kame wun bin iwinyunu sek kii kop me ateni me ejiri; ⁶ . Kame otuno butu bala kame etie kede iwi lobo dedede: di ekelo anyakini, bala kame etimo kede kamanono ii wuda, geeno iceng kame iwinyunu kede kop amake, di ikounu ngeeno kisa ka Rubanga ii ateni. ⁷ . Dokon da bala kame wun ipwonyunu kede kibut Epapuras ngatic wadwa me cuny wa, kame tie pir wu di dokon en ngatic ka Kristo. ⁸ . Kame otatamo ne wan amara wu kii cuny. ⁹ . Pi tien kop noni, wada dokon likame oko sokono lego pir wu geeno iceng kame wan owinyo kede kop noni , dokon di oparo be wun koto ipongunu kede ngec kamako mit mere kii rieko dedede kede niang kii cuny. ¹⁰ . Me wek iotunu oot ki becakina ne Rwot di iyomunu cunye iye epone dedede, di inyakunu kede tice kabeco dedede dokon di inyaiunu kii ngec me ngeeno Rubanga. ¹¹ . Di ko medo neu teko dedede, di lubere kede ter me deyo mere, kede diire me epone dedede kede ingirkin karacel kede ilel opong. ¹² . Wan omio pwoc but papa, ngat kame omio wa opoore me nywaako iner me jo ka cil kii lero. ¹³ . En kame elako wan ii twer me colo di eko kobo wa ii ajakanut ka wode me cunye. ¹⁴ . Kame wan oudo iye amaraun di beo kii remo mere, paka iton asasirikin me bal. ¹⁵ . Kame obedo cal ka Rubanga kame lika neeno, atin kao me buli gi acwea dedede. ¹⁶ . Pien kocweo gi dedede di beo kibuten, gi me malo, kede me piny, kaneeno kede kalikame neeno, arabo di gin kibedo komini, amotoko apugan arabon wegi akarinikin and twerini, gi dedede bin kocweo beo ki bute dokon da pire. ¹⁷ . Dokon en esipakin inyim gi deded, dokon beo ki buten gi dedede tie cungo. ¹⁸ . Dokon en kame ebedo wi kom, en kanisa: en en kame agege, kao kowokun ikom too; tetekeny wek igi dedede en etwer bedo kede akarinikin ka loo dedede. ¹⁹ . Pien papa oyei bedo ii en kii pong dedede. ²⁰ . Dido en etieko kee lo anapakin di beo kii remo mere ocwer imusalaba mere, pi rucokino gi dedede bute, di beo kibbute, ango awaco be, gi dedede, amotoko me lobo arabo ojame me imalo. ²¹ . Paka uda kame bin igitar unu tenge ibute di ikounu dooko jo kwor kii tam wu di beo kii tice ka reco, etieko rucakino bute nan. ²² . likomen me dano ikokome, di beo ki too mere, tetekeny wek en ekellu bute di icil unu abongo ibunan dokon di likame koronkino wu kii nyime: ²³ . Kame di imedenu i yei, di imokunu tam wu, di liki yangere nu, dokon di likame ko nyiko u tenge ki gen me ejiri, kame wun itiekunu wiinyo, dokon di ko tite ne buli gi acwea dedede kame tie ipiny me malo; kame ango Paulo en kame komia bedo ngatic mere. ²⁴ . Nan do ango alelo ki can kame atie neeno pir wu, di apongo kakame orem ikom can ka Kurisito ikoma pi kop me komen ikokome kame obedo kanisa. ²⁵ . Kame komio ango adoko nga tic mere, di lubere kede iner ka Rubanga kame en epoko nango pir wun, pi coobo kop ka Rubanga. ²⁶ . Paka iton mung kame bin kokano pi mwakini kede aturin, di nan oko miine yabere but jo ka cil meegen. ²⁷ . Kame Rubanga oudo mito be mii abar me deyo me mung noni ngere but abilere; kame obedo Kurisito kii wun, di etie gen me deyo. ²⁸ . Kame wan otito, di okwenyaro buli dano, di opwonyo buli dano kede rieko dedede tetekeny wek onyut buli dano di ecil odocon kii Kurisito Yesu. ²⁹ . Pi tien kop nono en ko mio ango da acaane tic, di aute kame lubere kede tic mere kame en etie tiimo kede teko adwong kii ya.