¹ Do icuo moro kame nyinge Anania kede Sapira dako mere, oko gida cato dul me gikame mako gi, ² Do eko kano dul me sente kame acato kede, di dako mere da gango tam nono; en eko kelo dul me sente nogo eko keto i cing joor. ³ Do Petero oko waco ne be, Anania, pinyo komio in iyei ne Sitani pongo cunyi ngalo Tipo Kacil, di iko kano dul me sente kame icato kede lobo? ⁴ Di pwodi oudo likame icate, mam en oudo ebedo meri? Doko akadi di oudo itieko cate da, mam sente mere da oudo pwodi tie itwero me cingi? Kara pinyo komio in icweo gi acal kamano icunyi? In likame ingalo dano, do ingalo Rubanga. ⁵ Kakame Anania owinyo kede kop go, eko poto piny, di en eko to; di lworo adwong oko mako jo owinyo gi noni. ⁶ Awobe oko yai di kiko bono kome di gin kiko teere iko yike. ⁷ Di eko tero kare me i sawan adek di dako mere oko bino, en oudo likame engeo gikotimere. ⁸ Ikano Petero oko waco ne be, “Waca kame wel me sente kame i catunu kede lobo gin ige?” En eko dwoko be ebo erume gi igonogo. ⁹ Di Petero oko waco ne be, “Benyo benyo komio wun iwinyerenu pi tamo Tipo ka Rwot? Neni, tien jo kotero cwari yiko igo tie cungo idog ekeko, nan gin kiyaro teri ida. ¹⁰ Eda eko poto piny kanono itien Petero di tipo mere oko yai, kakame awobe owok kede iyi ot iko ude di etieko to; di gin kiko tinge tere yike inget cware. ¹¹ Lworo atek oko mako kanisa dedede karacel kede jo atot oko winyo kop noni. ¹² v12 Giaura kede gi me twer atot oko donyo timere but jo di beo ibut joor: di gin dedede oudo kitie kede tam acel i Balisa ka Sulumani kame kogero wie. ¹³ Ikom jo ace, likame tie ngatamoro ace kalikame oko yei, do jo oko mino gi wor adwong. ¹⁴ Wel me jo kame yei oko meede ameda, cuo kede mon atot oko bino but Rwot. ¹⁵ Man oko mino jo oko donyo kelo jo tuwo pielo ilak yote, di kopielo gi i tandan kede gibuto, me wek kame Petero tie beo, amotoko tipo mere tun ikom mogo ikom gi. ¹⁶ Jo atot oko yai ki bomban koluko Yerusalem, di kikelo jo tuwo kede jo kame tipere areco oudo omako; di gin dedede kiko udo cango. ¹⁷ Di do ngatel me josaseredoti karacel kede jo dedede kame oudo tie kede, kame oudo tie jo me ekodet me Isadukayon oko cako yiko yik me timo ne gi raco, pien nyeko oudo omako gi. ¹⁸ Gin kiko mako joor di kiko rwako gi i otkol kame bin kotweo iye jo dedede. ¹⁹ Do malaika ka Rwot iwor nono oko yabo ikekoroson me otkol, di eko woto gi ooko, di eko waco ne gi be, ²⁰ Otunu icungo i tempulo di ikounu yamo ne jo kope dedede amako kuo noni. ²¹ Kakame gin kiko winyo kede kope go, gin kiko dilo odiko ot i tempulo di kiko pwony. Do ngatel me josaseredoti karacel kede jo kame en oudo etie kede oko bino di kiko lwongo kansulo karacel kede jotel adongo me jo me Isirael; di kiko cwano kop iotkol pi mino kokel gi. ²² Do kakame jo tic kame telo otkol obino kede, di eko udo be gin oudo ili i otkol, di do gin kiko dok dwoko kop, ²³ Di kiwaco be, wan otuno kuno oko udo be ikekoroson dedede me otkol ogoore kiber di jodar da tie cungo inget ikekoroson kanono, do kakame wan oyabo kede ikekoroson, likame oko udo dano moro i ot. ²⁴ Kakame ngatel adwong me josaseredoti kede ngadwong me isirikalen kame oudo daro tempulo, kede jodongo me josaseredoti owinyo kede kope go, teko gi oko tiek, kiko donyo parere pi gikame bino timere. ²⁵ Di do ngatamoro acel oko bino but gi eko waco ne gi be, “Jo kame wun oudo iketunu i otkol: gin ika kitie cungo itempulo di kitie pwonyo jo.” ²⁶ Di ngadwong me isirikalen kede jodongo ace oko ot di kiko kelo gi abongo gero, pien gin oudo kitie kede lworo be jo bino didipo gi kede kide. ²⁷ Kakame kikelo gi kede, kiko mino gi cungo inyim kansulo di do ngadwong me josaseredoti oko penyo gi, ²⁸ Di ewaco be, oudo wan likame ociko wu kitek be kur ipwonyunu jo i nying noni? Do neningo, wun nan itiekunu sarakino pwony wu noni i Yerusalem dedede; di imitunu be remo me icup ni dwog i wi wan.” ²⁹ Di Petero kede joor icegun oko dwoko di kiwaco be, “Wan miero imi wor but Rubanga do weko but dano. ³⁰ Pien Rubanga ka joakwari wan oyaruno Yesu ngat kame wun bin inekunu di ikounu liere ikom yat. ³¹ Rubanga otinge malo oko keto ibade tetu cam pi en bedo Ngapug, kede Ngalak, me wek emi winyo me iswilar but idwe me Isirael kede kelo ne gi isasir kidub gi. ³² Da wan obedo ijurak me kope nogi; karacel kede Tipo Kacil, kame Rubanga omio but jo kame wore. ³³ Kakame gin kiko winyo kede kope go, cuny gi oko mako lilo atek, omio kiko mito neko gi. ³⁴ Di ngat acel ikom gi kame oudo tie ngaparisayo, kame oudo tie ikansulo kanono, kame nyinge Gamaliel ngat osomo iswilia iruom amalo; ebedo ngat kame jo dedede oudo mio wor, oko yai cungo di eko ciko be ber kong ter joor nogi ooko pi kare moro acecek. ³⁵ Di en eko waco ne gi be, “Wun jo me Isirael, gwokerenu ikom gikame wun imitunu timo ne cuo gi. ³⁶ Pien i ceng me cen go, icuo kame olwongo be Teuda bin owokun di imere bala ngatamoro kame pire dwong, kame cuo mogo kame romo bala tol ongwon oko lube; do oko neko di jo kame oudo lube nogo dedede oko sasarun, kop gi nono ko jik atwal.” ³⁷ Ingei icuo no, doko kame nyinge Yuda me Galilaya oko wokun, ikare me maro jo: eda eko loko wi jo atot oko donyo lube, do mano da kop mege oko rwenyo atwal, akadi jo kame bin lube da oko sarakin. ³⁸ Aso, ango awaco ne wu be, wekunu jogi, wekunu gi imeede; pien ka tim gi ni obedo iik arabo tam ka dano, kare mere bino tuno di eko jik. ³⁹ Do ka ebedo iik ka Rubanga, wun likame ibinunu twero gengo gi; me wek kur ud be wun itienu yii kede Rubanga.” ⁴⁰ Dwan kame Gamaliel oyamo ni, kansulo oko yei kede. Kakame gin kilwongo kede joor, kiko mino kodao gi di kiko ciko gi be miero kur doko imeede yamo inying Yesu, di do kiko weko gi kioto. ⁴¹ Di do joor oko yai inyim kansulo di litie kede ilel pien komaro gi bala jo kame poore neno can pi nying Yesu. ⁴² Di do gin kiko donyo pwony i tempulo buli ceng kede ipaco acelacel, likame gin kiko weko pwonyo kede tuco nying Yesu Krisito.