¹ . Kakame gin ki tie yamo kede jo, jo saserodotin kede ngadulong me tempulo kede isadukayon di ko bino but gi. ² . Oudo gin ki ger be jogi tie pwonyo jo ikom iyarun ka Yesu ikom jo koto. ³ . Gin kiko bungo gi di oko keto gi lot kol tuno iceng kalubo pien piny oudo bin otuno otieno. ⁴ . Do jo atot kame bin owinyo kop oko yei di wel me jo koyei oko mede tuno tutumia kany. ⁵ . Ceng ka lubo jo pug gi, jo adongo kede jopwony me iswil. ⁶ . Dido Annas ko bedo ngatel jo saserodot kede kayapa kede Yokana, kede Alekesanda kede jo atot kame bin wok kiekeko me ngatel jo saserodot oko cokere karacel Iyerusalem. ⁷ . kakame otieko keto gi kede inyim jo di oko penyo gi be twero mene amoto aying mene kame un itimunu iye gigi? ⁸ . Kikame Petero oko pong kede cuny kacil di eko waco ne gi be un jo kame pugo jo kede jo dongo me Israel. ⁹ . Tin kotie penyo wan pi tic aber kotimere ikom dano kongwalo upone kame eriere kede. ¹⁰ . Wek tetekeny engeere but un dedede kede but jo me Isirael dedede be inying Yesu Kiristo me Nasaret Ngat kame un igurunu en kame Rubanga oyaruno ikom jo koto pi nyingen nono en omio icuo ni ango inyimu kan di kome yot. ¹¹ . Man en kidi kame bin jo gedo odagi en kame odoko kidi adwong me esonda. ¹² . Pimano alako liame tie but dano ace pien liame tie nying moro ace ilobo kan kikom jo ame wan opore lakere kede. ¹³ . Kakame gin kineno kede nwang cuny Petero gini kede Yokana kede kiko niang be kibedo jo aliosanio, doko kibedo jo ajoa, gin kiko bedo kede ur doko kiko niang ikom gi be oudo bin kibedo kede Yesu. ¹⁴ . Di gin bin kineno icuo kame ocango di tie cungo idiere gi liatie kop moro ame kiko twero yamo iye ¹⁵ . Do gin kiko culano Petero kede Yokana oko me kansulo di gin kiko donyo poro kop kengi kengi. ¹⁶ . Di kiwaco be nyo kame wan oporenu tuno ne cuo gi? pien lateteni tangu kame kitimo otieco neno kakaler but jo dedede kame bedo YUrusalem ame wan li oromunu dagi. ¹⁷ . Do pi gengo kop ni sarakin idiere me jo owowonunu gi wek kur doko kimed yamo nying ni but dano moro. ¹⁸ . Di oko lwongo gi oko ciko gi di owaco negi be liame kipoore yamo amoto pwony inying Yesu akadi acel. ¹⁹ . Do Petero kede Yokana oko dwoko di waco negi be un en kame iyerunu ka eber me winyo un kalamo winyo Rubanga. ²⁰ . Pien wan li otwero weko yamo giame oneno kede ame owinyo. ²¹ . Kakame otieko wowono gi kede oko weko gi kioto pien likame tie gimoro arac ame oudo ikom gi me wek ket can ikomgi pien bin kitie iworo jo, doko jo dedede bin tie mino Rubanga deyo pi kotimere. ²² . Pien icuo kame mwaka me dongo mere kalamo ot ongwon en kame bin tangu me cango ni oneno ikome. ²³ . Di bin oweko gi kioto gin kiko ot but jo wot gi di gin kiko tatamo ne gi kop ame isaserodot kede jo adongo da owaco negi. ²⁴ . Kakame gin kiwinyo kede kop ni gin kiko tingo dwan gi malo karacel but Rubanga di kiwalo be Rwot in en Rubanga kocweo malo, kede piny, kede nam kede jamini dedede kame tie igi. ²⁵ . in en kame riki iwaco idog epasoit ni Daudi be pinyo komio atekerin ger, doko di jo paro gimogo kame kony gi li? ²⁶ . Abakai me wi lobo otieno cungo di jo pug oko cokere karacel ikom Rwot kede ikom Kirisito mere. ²⁷ . Pien iateni Erode gin kede pontio pilato kede jo alikame ngeo Rubanga kede jo me Isirael bin ocokere karacel ikom wodi kacil Yesu kame bin in iwiro. ²⁸ . Man pi mino gikame cungi kede tam ni oyiko sek timere. ²⁹ . Nataman do Rwot nen iwowon gi di iko mino ipasoi ni yamo kopni kede nwang cuny. ³⁰ . Pien cungi me cango di gianena kede giaura ko timere inying atinikacil Yesu. ³¹ . Kakame gin kilego kede, kabedo kame bin kicokere iye karacel nono di ko yangere di gin dedede kiko pong kede cuny kacil di kiko yamo kop ka Rubanga kede nwang cuny. ³² . Di ekodet me jo atot kikom jokoyei oko bedo kede cuny acel kede tam acel di liame dano moro kikom gi waco be gi ame etil kede obedo mere kene do oudo gin kinywako jame gi karacel. ³³ . Di twer ka malo oko mino jo siao obedo imujarak me iyarun ka Rwot Yesu di kisa ka malo tie ikom dedede. ³⁴ . Oudo likame tie dano moro kikom gi kame gimoro rem ne. Pien jo atot kame bin tie kede lobere kede ude ocato gi di kiko kelo sente go iwel kame ocato kede. ³⁵ . Di kiko keto sente go dedede inyim josiao di oko popoko gi di lubere kede mit me dano acel acel. ³⁶ . Di do Yosepu kame bin jo siao ocako ne be Baranaba kame dwong mere be ngacu cuny jo ngalebi koyai ilobo me Sipuro. ³⁷ . Eda bin eko cato lobo mere di eko kelo sente mere eko keto icing josiao.