¹ Paulo, ngat obedo ngaor ka Yesu Kristo beo imit ka Rubanga, di lubere kede cikere me kuo kame tie i Yesu Kristo. ² But in Timoteo, woda kame amaro: kisa, mulem kede mwolo kame wok kibut Rubanga Papa kede Yesu Kristo ngat obedo Rwot wa. ³ Apwoyo Rubanga, ngat kame ango abedo tic ne cako kibut jo akwari na, kede cuny aber abongo sikao di ayutuno in nakanaka ilega na me iwor kede iceng ⁴ Do pi koko ni kede pige wangi omio ango atie kede mit atek me neni di a pong kede ilel. ⁵ Kame ayutuno yei atek kame oudo in itie kede bala kitekame daani Lois da yei mere tek kede i agege toto ni Yunia da mio ango angeo be yei nono pwodi tie ikomi. ⁶ Pimano ango ayutuno wu pi yangaro giamia ka Rubanga kame tie ikomi kame bin iudo ikare kame oketo kede cing ikomi. ⁷ Pien Rubanga likame omio wan cuny me lworo, do emio wa cuny me twer, me amara kede me adam katio. ⁸ Pimano kur imi lewic maki me mino ijura ikom Rwot wa kede ikom ango da kame abedo epasoit mere, do bed ngat kame nywako can keda pi kop me Ejiri, di lubere kede teko ka Rubanga. ⁹ En ngat ko lako wa di eko lwongo wa kede lwongo kacil kalikame pi tice wa, do pi mit mere me kisa kame en emio but wa di beo kibut Kristo Yesu di pwodi likame ecweo piny. ¹⁰ Nan do enyutere but wa di beo kibut ngat kolako wa en Yesu Kristo ngat ko loo to di eko kelo kuo kede lero kalikame tiek di beo i Ejiri. ¹¹ Rubanga oyera pi bedo ngatuc kop mere, bedo ngaor, kede ngapwony me ikampirin. ¹² Akadi di atie neno can pi kop noni. do lewic likame maka, pien angeo ngat kame ango ayei. Pien ango amoko be en etwero gwoka kede giamia kame emio icinga iceng no. ¹³ Mak itek kop kame iwinyo kibuta, yei kede amara kame tie i Kristo Yesu. ¹⁴ Gwok jamini abeco kame omi kede Tipo kacil kame bedo iyi kede i wada. ¹⁵ Pimano ngei be jo dedede kame tie i lobo Esia olokore tenge kibuta kame gin kibedo Pigelo kede Amogene. ¹⁶ Rwot mi winyo but jo me ot Onesiporo pien ekweo cunya doko lewic da likame make ikom can kame ango atie neno me irikoi. ¹⁷ Kakame etie kede i Roma ecane me mona di eko uda. ¹⁸ Rwot mie eud kisa ni iceng nono pien etimo na jamini abeco atot ikare kame atie kede i Epeso.