¹ Baluwa ka Paulo, Silbano kede Temeseo, but kanisa kame tie Tesalonika, kame tie i Rubanga Papa kede i Rwot Yesu Krisito. Kisa bed but wu kede mulem kame wok kibut Rubanga Papa wa kede kibut Rwot Yesu Kristo. ² Wan nakanaka opwoyo Rubanga pi wun dedede, di oyamo nying wu ka otie ilega. ³ Di oyutuno wu pi tice wu me yei, kede lole wu me amara, kede ikanyakin i gen wu i Rwot wa Yesu Kristo, i nyim Rubanga kede Papa wa. ⁴ v4 Imiegu na me amara, di ingeunu kite kame Rubanga oyero wu kede. ⁵ Pien ejiri wan likame obino butu ikop kenekene, do ebino da kede twer, kede Tipo Kacil, kede gen adwong; bala kame wun ingeunu kede epone kame wan oudo otie bedo kede wu, pi kelo ne wu bero. ⁶ Wun ikounu doko jo kame lubo ekite wa, kede me ka Rwot, bala kame igamunu kede kop mere kede ilel kame yai kibut Tipo Kacil bed bala ibeunu ilito atot. ⁷ Man oko mino ikounu bedo anyut aber ne jo oyei dedede me Makedonia kede Akaya. ⁸ Pien itiekunu tuco kop ka Rwot likame kibut Mekadonia kede Akaya kenekene, do i kabedo dedede kame mako yei wu i Rubanga. ⁹ Pien gin ikom gi inyuto ne wa epone kame wan odonyo kede butu, kede epone kame wun ilokerenu kede but Rubanga yai iworo caljwogi pi tic ne Rubanga kame kuo kede me ateni; ¹⁰ Kede pi daro Wode bino i malo, ngat kame en eyaruno kikom jo oto, en Yesu ngat okelo ne wa alako ikom lilo kame tie bino.