¹ Wan otie tuco ne wu gikame oudo tie cako ki agege, gikame wan owinyo, gikame wan oneno kede wang wa; wan kom onene doko omule kede cing wa, en Kop me kuo. ² Konyuto kuo noni di wan oko nene, nataman wan omio ijura i kome, di owaco ne wu kop i kom kuo kame bedo nakanaka kame oudo tie kede Papa di oko nyute but wan. ³ Gikame wan oneno kede kame owinyo wada otuco ne wu tetekeny ibedunu i nywak kede wa; doko i nywak noni, wan onywako karacel kede Papa kede Wode Yesu Kirisito. ⁴ Wan otie wandiko gi nogi tetekeny obedunu kede kilel kopong. ⁵ Kop kame wan owinyo kibute doko kame wan opwonyo wu iye en ine be, Rubanga en lero doko eli kede colo moro atwal. ⁶ Aso ka wan owacunu be wan onywakunu kede en, do di otienu i colo udo ongalunu, doko udo likame otienu timo gi me ateni. ⁷ Do ka wan otienu i lero bala kame en kikome etie kede i lero, udo otienu kede nywak wan kenwa kenwa, doko remo ka Yesu Wode lonyo wa ki dub wa dedede. ⁸ Ka wan owacunu be oliunu kede dub, udo wan ongalerenu kenwa, doko udo oliunu kede ateni. ⁹ Do ka wan otucunu dub wa, Rubanga ngat kame genere kede kame timo gi dedede kakare bino sasiro wa ki dub wa, di eko lonyo wa ki gi dedede kalikame opoore. ¹⁰ Ka wan owacunu be likame odubunu, udo omiunu Rubanga odoko nga angalo, doko udo likame otienu kede kop mere.