¹ Yesu tchi amana okupopia omalaka ongo ahe kovanthu, ahiti kokafalanau. ² Omundapi umu owomutumini engu nkhu ahamdua unene nae, nkkhu wakekama unene ukuhupa kokutchua. ³ Ya tchi atea Yesu mahepulua, omutumini atumu oyochiyau zhimu ozhokochundeu okukumba okutia É nkhu nge meya okuyovola omupika wae. ⁴ Owo tchivefhika ku Yesu avemukumbo okutuatuako: É unehunga lio okutia hinde nge mumuhakula, ⁵ mokonda uhanda otchilongo tchetu ya é eatutungeako otchilongo tchoko chilaeli. ⁶ Pae Yesu aende nawo tchinkhu ekukula nondjuwo, otumimini omapangae vemuhele okutia Tate kulu hochuka mokonda ami himunthu omuwa owktia nge muhiti mondjuwo yange. ⁷ Ya nami hitokale okupopia. Popiape ondaka omutalavai wange maka nawa. ⁸ Mokonda nami ndjina engu nge manthumine ya ndjino vatalavai omba vatea ovitumino viange ami ndjitia: enda ya é aende, pamu itia endjo ya é eya. ndjininga omutalavai wange okutia ninga tchi ya é etchiningi. ⁹ Yesu tchi atea tcho ahakuka unene ya apinguluke movanthu omba nkhu mavemutezha atia: ami mimuhele okutia nokoichilaele himuna engu eno ekolelo. ¹⁰ Ya pae ombenha nkhu vatumua Kue avatchuna kondjuwo omuvezhi avemuvafha akanawa. ¹¹ Tcho tchi tchapua Yesu ande kumu makutiwa Konaim, novalongua vae nkhu venae novanthu pé ovengi. ¹² Pae tchimefhiki potchilongo tcheinha awanaine notchivimbi onde ongunga ya ina nkhu omuhepe ya nkhu ovanthu ovengi venae. ¹³ Tate Kulu tchi emumuna aninga onkhenda nae ya atia: holili. Ya ¹⁴ pae Yesu eya ponthe yae avizha ketala endiku nkhu kuatchindua olutu ya ombenha nkhu vatchinda avakulama ya Yesu atia: Muzhanthu ami mikuhele kulam. ¹⁵ Omuzhiu engu nkhu atchua apinduka ya afhimbike okupopia pae emuandje ina. ¹⁶ Ya avehe avaka nowoma ya owo avapandula Huku okutia: Opolofeta onene yamunika pokati ketu Huku utakuata nawa. ¹⁷ Ondaka endjo aihanduka notchilongo tchatcho atchihe ya nakuimbi vielipalakana natcho. ¹⁸ Ovalongua vandjuau avapopi ovipuka viatcho embio Kue. ¹⁹ Pae Ndjuau aifhana ovalongua vavali evetumu vakapule Yesu okutia: Ove engu nkhu muya ine ngatukevele vali umu? ²⁰ Owo tchi vavafha Yesu avatia: Ndjuau Batichita wettutuma Kuovetukupule okutia: Ove nkhu muya ina matukevele vali umu? ²¹ Petango liatcho Yesu ahakula ovanthu ovengi omauvela omengi, omba vehulilua nkhu venoyomphepo oyongi, naomba nkhuvapewa omiho. ²² Yesu etavele okutia: Endeni ya kapopieni avihe embhi muamuna ya embhi muatea. ovanthu ovapotchui mavatambula omiho, ovilema maviende, ovavezhi vahakulua, oyomphepo mazhite, omba vatchua mavatutile omba vehulilua mavahelua ondaka ombua. ²³ Ovawa ombenha havamphatana mokonda yovipuka embinha ndjininga. ²⁴ Ovalongua va Ndjuau tchi vakapita Yesu afhimbike okuvehela otchitchi tchi muakamuine mehandja? otchiungu nkhu matchivizhua nomphepo? ²⁵ Otchitchi tchi muakamuine? ine muakamuine omuzhiu vawala nawa? ine muakamuine ovanthu vawala ovikutu ovipe omba vepopawa moyondjuwo oyombua. ²⁶ Otchitchi muakamuine? Opolofeta? In Ami mimuhele okutia ukeulu yopolofeta. ²⁷ Engu oinguinha tchei tchahonikua: Pae mitumu omulongua wange kotchipala tchoe engu makaviukifha ondjila komutuevoe. ²⁸ Ami mimuhele amuhe omba muyomukua nomukai kutupo engu eli onene ku Ndluau, pae engu eli omununu koumbala wa Huku omunene vali kue. ²⁹ Ovanthu avehe tchi vetchitea tcho hinde novatanthi velichimu avehe ovapopi okutia Huku wafuapo ya avambatichalua na Ndjuau. ³⁰ Ovafalicheu novalongefhi wotchitumino tchokochundeya ahamavatavele omphango ya Huku kuwo ya ahamavambatichalua. ³¹ Ongapi mikaheteka ovanthu womuhoko ombu, vafha komuhoko patchi? ³² Vaka ngoyondele omba vazhanea kokapalacha omba vakankhama pae avafhimbike okulifhana novakuwo okutia otue tuemuhikila oyongoma kamuzhanine, tuayimba oyondjongo zhopotchivi kamulilile. ³³ Ndjuau Batichita weyahamali ombolo hamanu omanu owalende ya onue muatia: engu unomaliapo. ³⁴ Kueya Ondeyomuzhiu engu mali nokunua ya onue mutia otchinkholua uneyumu evi epanga liovatanthi velichimu ya novaningivanavi. ³⁵ Pae ounongo umunikea moyondevae avehe. ³⁶ Pae omufalicheu umu akumbu ku Yesu akalie nae. ya Yesu ahiti mondjuwo yomufalicheu, ya akankhama komecha alie. ³⁷ Ya kotchilongo tchatcho tcheinha nkhukuno omukai umu omuningi wanavi. tchi atea okutia Yesu nkhu okundjuwo yomufalicheu, atchindi anhayae munkhu munomufhila. ³⁸ Ya pae omukai engu akankhama metambo lia Yesu, ponthe zhoyomphazhi zhae. afhimbike okutendefha oyomphazhi zha Yesu nomahozhi nokumupona noyohutchi zhae, okumupa oyombechinhu koyomphazhi nokuvavekako omufhila. ³⁹ Omufalicheu engu nkhu akonga Yesu tchi etchimuna tcho, poluaemuni atutu okutia: Omuzhiu engu nkhungaele omupolofeta, nge waiva otchituwo tchomukai engu memuvizha, okutia omuningi wanavi. ⁴⁰ Pae Yesu emuyakula okutia: Simau ami ndjina tchi mbahanda okukuhela ya Simau atia popia Molongefhi! ⁴¹ Yesu atia kuali ovanthu vavali venaku velevale. umu nkhuwalevala oyondenaliu omakuinhi omakuinhi atanu ya umu nkhuwalevala oyondenaliu omakuinhi atanu. ⁴² Pae owo tchinkhu onyombongo ozhokufheta onkhunga, omuhona engu evevele. Pokatikawo omuevelapo vali unnene oiwa? ⁴³ Simau emuyakula okutia: Mokututa kuange oinguinha nkhu alevalako vali unene. Yesu atia unehunga. ⁴⁴ Yesu aluke komukai ya moSimau atia: Mumunu omukai engu? Ami mbahita mondjuwo yoe ya kumphewo omande ndjilikohe koyomphazhi zhange, ya omukai engu watendefha oyomphazhi zhange nomahozhi ae ya apono noyohutchi zhae. ⁴⁵ Ove kumphele ombechinho, ya omukai ingu otcho nkhembekie puenu matuatua nokumpha ombechinho koyomphazhi zhange. ⁴⁶ Kunthilievo omulela momutuewange, ya mambaveke omufhila koyomphazhi zhange. ⁴⁷ pae mikuhele okutia koyopekalozhoe oyongi wavelua mokonda é untchanda unene. pae eguinha avelua okapiki ohanda okapiki. ⁴⁸ Ya pae atia oyopekalozhoe zhaevelua. ⁴⁹ Ombenha nkhu vakankhama komecha avafhimbike okulipopila poluawo. Oiwa engu hinde mavele oyopekalo? ⁵⁰ Pae Yesu momukai atia: Ekolelo lioe liekuhakula. Enda nombembua.