¹ Nami vango vange, lemuemii mu Tate Kulu. Kuami, okumuhonikea vali ovipuka embio nge katchimphomeefha. ovipuka embeo mavikemukuatefhako. ² Pukulukemii koyombuana; pukulukemii kovalongefhi ovani vanavi. ³ Pae otue tuvahiti vomoviumbo, tcho okutia otue omba tulikumbelea koMphepo ya Huku tulemuá ku Yesu Clistu, ya katuwomiike konhama. ⁴ Ngotchikuawo ami lumu nge mbaomiika konhama. Engu atuta okutia waomiika konhama, ami pae po nge ndjina vali tchi: ⁵ Mbahita moviumbo, metango lhepandu tatu, ndjiwombunga wokoichilaeli, owokomuhoko wa Bechamim, omumbeleu owoko avambeleveu; tchi tchipopia otchitumino, omufalicheu umu. ⁶ Nkhu mbelikako nokupilaula ovanthu va Huku. tchi tchapopia kotchivei tchouhunga wotchitumino, nkhu ndjimufuifhipo. ⁷ Ovipuka embinha nkhu vimunika okunga maviwamaakana kolukulu yange, ami mbevipakea kokuhachiliviya mokonda ya Clistu. ⁸ Pae pahe, avihe mbevitumba ngaimbi viawomba monkonda yokuiva Yesu Clistu Tate Kulu yange. Mokonda yae avihe mbeviyeka. Ami mbevitumba ngombumbi, opo ndjikae na Clistu. ⁹ ya ndjimunike Mue, hinavali ouhunga wange muni ombu maulu kotchitumino; pae putcho, ami ndjino ehunga endi likekolelo ku Clistu, ouhanga ombo, walua naku Huku okuifha kekolelo. ¹⁰ Pae otcho mbahanda kumuiva, okuiva oyonkhono zhokututila kuae okulikuatefhako Nae koyohali zhae. mbahanda lumu ndjile otchifhefha tchokutchua kuae, ¹¹ kekevelo lhokutia ndjitutile komba vatchua. ¹² Hukutia ami mbatambula ovipuka embio pamu nokuila omufuifhipo. Pae ami ndjituatuako opo ndjivafhe, pae putcho mbavafhua na Yesu Clistu. ¹³ Vango vange ami hitutu okutia mbeuhanga kaya, pae otchipuka tchimu otchi ndjininga: ndjizhimbako embi mbayeka kefhina ya pae ndjilikuatefhela lumu nokuninga tchi tchikomutue. ¹⁴ Ndjienda té ku mbahanda, opó ndjikatambule ofheto yange oyokeulu endji iku Huku mu Yesu Clistu. ¹⁵ Atuhe otue omba koMphepo tuapia tuno olho kututa ngatcho. Ya tutemee okulikalela kovipuka embeo, Huku nae mekemuvilikifhavio. ¹⁶ pae tutakamifhemii lumu putchi tuvafha. ¹⁷ Vango vange hopelemii tchi miningi. talemii popei ombenha vaenda ngatcheinha muamuna kotue. ¹⁸ Pae kunakaya ovange omba ami mbemuhela ya mipitululamu nomahozhi, omba veli ovita viekuluchu lha Clistu. ¹⁹ Mokonda huku yawo eyumu, ya oumbala ombo venawo owonthalalo, mokonda owo vatuta ovipuka viokohi. Efhikilo lhawo okutunguluka. ²⁰ Pae otue tuvekeulu, ku naotue matukevele omuyowoli, Tate Kulu Yesu Clistu. ²¹ É makaviukifha omalutuetu onga apundifhua aaile otchifhefha tcho lutulue olopombala, koyonkhono zhae ozhokuvinga ovipuka viatcho avihe.