¹ Ashan kida hasa mafi deinuna le nas al humon fi al Mesi Yesuah. ² Ashan namus ta Roho ta haya fi al Mesi Yesuah kalas hariru intum min namus ta katiya wa mutu. ³ Lianu haja al kan namus ma bi agder amulu huwo kan deif be wasat jisim, Allah amulu, huwo rasulu Jena Towo fi sura ta jisim ta katiya ashan bi kun zebiha ta katiya, wa Huwo hukumu katiya fi jisim. ⁴ Huwo amulu de ashan hajat al namus deiru bi timu fi nina. nas al bi douru be hasab jisim, lakin hasab al Roho. ⁵ Nas al bi ish hasab al jisim humon bi kutu bala fi hajat ta jisim, lakin nas al bi ish hasab Roho humon bi kutu bala fi hajat ta Roho. ⁶ Lianu fekira al bi ihtam ma jisim bi mutu, lakin fekira al bi ihtam ma Roho huwo haya wa salam. ⁷ Lianu al fekira al bi ihtam ma jisim huwo adu ta Allah, huwo ma tehet namus ta Allah, wa kaman huwo ma bi agder amulu. ⁸ Nas al humon fi jisim ma bi agder kutu Allah farhan. ⁹ Lakin inu mafi jisim intum fi roho, de kan Roho ta Allah bi hai fi intum, lakin kan zol ma indu Roho ta al Mesi, huwo ma tabi le huwo. ¹⁰ Kan al mesi fi intum de bi mana al Roho meit be katiya, lakin al Roho hai ashan shokol adil. ¹¹ Iza kan Roho towo al goumu Yesuah min mutu bi hai fi intum, huwo al goumu al Mesi min mutubi wodi haya kaman fi jisim takum al mutu be wasat Roho towo, al bi hai fi intum. ¹² Ashan kida ya akuwana ninaindu duyun, lakin ma ta jisim ashan intum bi geni hasa jisim. ¹³ Lianu kan intum bi hai hasab jisim, intum bi mutu, lakin kan be Roho de bi mana intum kutu amail ta jisim ashan bi mutu, wa intum bi hai. ¹⁴ Wa nas al bi douru be Roho ta Allah, humon yau iyal ta Allah. ¹⁵ Intum ma istelimu Roho al bi kutu intum abid, ashan intum bi hai fi kafu tani mara, lakin intum istelimu Roho ta tebeni, al nina bi kore "Abba" Abuna." ¹⁶ Roho de be nefsa towo bi wori le arwah tanin gali nina awlad ta Allah. ¹⁷ Kan nina iyal ta Allah de bi mana kaman nina worisa, worisa ta Allah. wa nina bi worisu sawa ma al Mesi, kan sei nina ligo taab ma Huwo, ashan kaman bi mejidu nina ma Huwo. ¹⁸ Fa ana bi hasibu taab ta zaman ta hasa de ma bi agder aburu ma mejid al bi ja zahiru le nina. ¹⁹ Ashan hajat al kaliga deiru, bi istena ilan ta zuhur ta iyal ta Allah. ²⁰ Ashan kaliga kan tehet al batal ma ashan irada towo, lakin ashan huwo al kutu huwo tehet fi raja ta kaliga. ²¹ Ashan kaliga zatu bi tala min abudiya ta fasad, wa de bi jibu le huriya ta mejid ta iyal ta Allah. ²² Ashan nina arufu gali kaliga kulu bi wori wa bi amulu fi waja lahadi hasa. ²³ Ma bes de barau lakin nina al indu simar al awel ta Roho, lahadi nina karabu fi nefsa ta nina, nina bi istena tebeni ta nina, tahrir ta jisim ta nina. ²⁴ Ashan raja kalisu nina, hasa raja al zahir de, de ma raja lianu kef zol bi kutu raja fi haja al huwo bi aynu? ²⁵ Lakin kan nina indu raja fi haja al nina ma bi aynunina bi istena be sobur. ²⁶ Be nefsa teriga, roho bi saudu dofat ta nina, ashan nina ma bi arufu kef nina bi seli, lakin al Roho bi hin le nina ma tazamur al ma bi agder ashrau. ²⁷ Zol al huwo bi fetisu gulub bi arufu fekira ta Roho, ashan huwo al bi hin bidal ta kedisin hasab irada ta Allah. ²⁸ Nina arufu gali Allah bi amulu hajat kulu le kuwes ta nas al bi hibu Huwo, le nas al nadi humon hasab hadaf Towo. ²⁹ Ashan le nas al gidam, Huwo kaman amulu humon ashan bi fi sura ta Jena Towo. Ashan Huwo bi kun bikir fi nus ta akuwana kutar. ³⁰ Wa le nas al gidam wa nas al kaman Huwo nadi, le nas al Huwo nadi, nas al Huwo kutu adil, nas al Huwo betiru, le nas al Huwo kaman mejidu. ³¹ Yala nina biga bi kelimu shunu an hajat del? kan Allah fi ma nina, munu tani bi kun did nina? ³² Zol al huwo ma aba jena Towo, lakin wodi Huwo ashan nina kulu, wa kef Huwo ma bi wodi le nina kulu hajat be majani. ³³ De munu yau bi ishteki did nas al Allah yau ikhtaru? ³⁴ Allah yau bi al bi kutu nas adil wa Huwo yau al wahid bi hukumu? Yesuah al Mesi Huwo al wahid al mutu akter min kida, Huwo al gam, Huwo yau al fi yemin ta Allah, wa Huwo al kaman bi hin ashan nina. ³⁵ Shunu yau bi ferigu nina min muhaba ta al Mesi? Sei de taab? waja, azab? wole jian, zuruf ta shokol ariyan? wole hajat al batal, wole seif? ³⁶ Bes ze ma katibu, gali nina ashan kalam Taki nina bi mutu kulu yom, bi hasibu nina ze koruf al bi ruwa dabahu. ³⁷ Ashan kulu hajat del, nina lisa aktar min muntasirin be wasat ta zol al bi hibu nina. ³⁸ Ana arufu gali wole mutu wole haya, wole malaikat, wole reisat, wole hajat ta hasa wole hajat al bi ja, mafi guwa ³⁹ kan fok wole tehet, wole hajat al kalagu, bi agder ashan bi ferigu nina min muhaba ta Allah, al huwo fi al Mesi Yesuah Rabuna ta nina.