¹ Gabilu ai zol al huwo deif, bidun hakimu afkar. ² Wahid zol indu iman ashan bi akulu ai haja, lakin zol al deif bi akulu khudruwat. ³ Kede zol al bi akulu ai haja ma hagiru zol al ma bi akulu ai haja. lianu Allah rudu humon. ⁴ Inta munu al bi hukum kadam ta zol tani? huwo yau bi wogif gidam ta sidi bit, aw bi waga. Lakin bi amulu huwo ashan bi wogifu, lianu Rabuna bi agder amulu huwo ashan bi wogif. ⁵ Wahid zol bi idu wahid yom min zol tani, wa tani bi idu yom sawa, kede kulu zol kun negit fi fikra towo. ⁶ Zol al bi hafisu yom, de huwo bi hafisu le Rabuna, wa zol al bi akulu huwo bi akulu le Rabuna. Lianu huwo bi wodi shukuran le Rabuna. ⁷ Lianu mafi zol min nina al bi hai le nefsa towo, wa mafi zol al bi mutu le nefsa towo. ⁸ Lianu kan nina bi hai nina bi hai le Rabuna, wa kan nina bi mutu, nina bi mutu le Rabuna. Sala kan nina hai aw mutu, nina le Rabuna. ⁹ Be sabab de yau al Mesi mutu wa gum tani mara. ashan Huwo bi kun Rabuna ta nas al mutu wa kaman ta nas al haiin. ¹⁰ Lakin inta, leh bi hukum aku taki? wa inta leh bi hagiru aku taki? ashan nina kulu badin bi ja wogif gidam ta kursita hukum ta Rabuna. ¹¹ Ashan katibu gali "Ze ma ana hai, kulu rukuba bi dengir le ana, wa kulu lisan bi mejidu Allah. ¹² Ashan kida, ai wahid min nina bi wodi hisab towo le Rabuna, ¹³ Ashan kida kede nina ma hukumu baad ta nina ma baad. Lakin kede intum akudu karar gali mafi wahid kede gofulu sika le zol tani, aw wogif fi gidam ta aku towo. ¹⁴ Ana arufu wa ana mutakid gali mafi haja nijis fi Rabuna Yesuah, ile le huwo bes zol al bi aynu ai haja nijis, lianu le huwo nijis. ¹⁵ Lianu kan be kalam ta akil yau aku taki bi geni haznan wa indu dabara, de bi mana intum ma bi dowuru fi muhaba, mata demiru zol al Mesi mutu min ajil bito be kalam akil taki. ¹⁶ Fa mata kum rudu hajat al intumaynu kuwes ashan bi wonusu gali de katiya. ¹⁷ Lianu molokut ta Allah ma bes akil wa shirab, lakin huwo geni adil, salam farah fi Roho al kudus. ¹⁸ Lianu kulu zol al bi kadimu Mesi be teriga zede, huwo mogbul fi gidam ta Allah. wa nas bi rudu huwo. ¹⁹ Yala biga kede nina amulu hajat ta salam, wa hajat al bi abinu nina ma baad. ²⁰ Mata demiru shokol ta Allah ashan akil, hagiga kulu hajat nedif, lakin huwo bi kun katiya le zol al bi akulu wa bi gofulu sika. ²¹ Huwo bi kun kuwes kan inta ma akulu laham, wole inta ma ashrabu merisa, wole ai haja al bi gofulu sika le aku taki. ²² Iman al le inta de, kede kun beina inta wa Allah, baraka le zol al ma bi hukum nefsa towo ma hajat al huwo aynu gali kuwes. ²³ Le zol al indu shukuk kan akulu bi hakimu, lianu de ma iman, wa ai haja al ma min iman huwo katiya.