¹ Wululu le ana! Ana biga ze samar ta sef, wa ze inab al nedifu kashab tuo; biga mafi inab al bi akulu, mafi awel intaj al awel al niya tai deru. ² Nas al umana wuduru min ard; mafi zol al adil fi nus nas. Umon kulu bi kemin le dufugu dom; ayi zol bi katitu le aku tuo be shabaka. ³ Idenat tumon kues kalis fi amulu sher: hakim bi asalu gurush, gadi jahis le rusjuwa, wa rajil aol guwi bi wunuso le tanin haj al huwo deru. Umon bi katitu sawa ze de. ⁴ Al kues fi nus tumon geni ze shok, al adil kalis huwo kaab futu shok al gufulu ma mahal. De yom al ta nas al bi ragibu intakum, fi yon ta igab takum. Hasa de zaman ta tushuwish. ⁵ Matukm kutu sikah fi jeran; wa ma kutu sikah fi ayi sabi. Kede inta kutu bala fi kalam al inta bi wunuso salakun le mara al bi num fi dus taki. ⁶ Lanu jena ma bi ihtaram abu tuo, wa biniya bi wegif did uma tuo, wa biniya did nesiba tuo. Adu ta insan de nas bet tuo. ⁷ Lakin le ana, ana bi ayinu le Yahwah. Ana bi istena Allah mukalis tai; Allah tai bi asuma ana. ⁸ Mata ataku fugu ana, ya adu tai. Kan ana waga ana bi gum. Kan ana geni fi duluma, Yahwah bi kun nor le ana. ⁹ Ashan ana amulu katiya did Yahwah, ana bi ithamal lahadi huwo bi ayinu mudu tai, wa wedi hukum le ana. Huwo bi jibu le nur, wa ana bi ayinu huwo bi angizu ana fi adala tuo. ¹⁰ Yala adu tai bi ayinu, wa fadia bi kati de al bi wunuso le ana, ''Wenu Yahwah Allah taki? Uyon tai bi ayinu huwo; bi dusu huwo tihit ze samula al waga fi sika. ¹¹ Yom ta abinu hiat taki bi ja; fi yom dak bi wasiyo hudud le bait. ¹² Fi yom dak shaab taki bi ja le inta, min Ashur wa mudon al fi Masir, min Masir le Nahar, min Bahar le Bahar, wa min jebel le jebel.. ¹³ Lakin ard bi karabu be sabab ta nas al bi geni fugu, ashan netija ta amaiel tumon. ¹⁴ Ayinu nas taki be asaya taki, bahaim ta miras taki. Umon bi geni barau fi gaba, fi nus ta zeriba.Kede umon kulu gesh fi Bashan wa Jilaad ze ayamat ta zaman. ¹⁵ Ze fi ayamat al intakum tala bara min Masir, Ana bi weri le umon ajaib. ¹⁶ Umam tanin bi ayinu wa fadiya bi gubudu umon be guwa timon de kulu. Umon bi kutu idenat tumon fi kashmat tumon; adanat tumon bi kun atersh. ¹⁷ Umon bi alasu turab ze debiba, ze hajat al bi duru be batna. Umon bi tala bara min biut tumon al kubar be kuof; umon bi tala be kuof le Yahwah, Yahwah Allah tanina, wa umon bi kun kaifin be kalam taki. ¹⁸ Munu yao Allah ze Inta al bi masa katiya, wa be affi zunub le bagi ta miras? Huwo ma bi sibu zlan tuo lel abad, ashan huwo bi tala murtah be amulu rahama. ¹⁹ Inta be hin le anina tani mara; inta bi dusu katiyat tanin tihit kura taki. Inta bi jada katiyat ta nina kulu fi bahar. ²⁰ Inta bi wedi hagiga le Yagub wa amana le Abrahim, ze ma inta halifu le abuhat ta nina fi ayamat al zaman.