¹ Hasa taal takum sawa fi midan ta harib, ya biniya ta jesh! Gufulu anina be hush guwi! umon durubu gadi ta Israel ma asaya fi bangiri tuo. ² Lakin inta ya Bet laham Afrata, hata kan inta yao suker fi nus gebaiel ta Yahuza, bi tala min inta zol al bi hukumu Israel, al bidaya tuo min ayam ta zaman, min al abed wa lel abad. ³ Ashan kida Allah bi selimu umon, lahadi zaman de al fi waja ta weledu bi weledu jena, wa bagi akuwana tuo bi rija le shaab Israel. ⁴ Huwo bi gum wa bi ayinu ganamayat tuo be guwa ta Yahwah, fi shukul kebir ta guwa ta Yahwah Allah tuo. Umon bi fadulu, ashan huwo bi kun azim le nihaya ta wata. ⁵ Ashan de bikun salam - kan Ashuriin ja le beled ta nina, wa kan umon duru did mahalat ta muluk ta nina , yala anina bi kutu le umon saba ruaa wa tamaniya ruwasa. ⁶ Umon bi ayinu beled ta Ashur be sef, wa beled ta Nimrod fi abuwab tuo. Huwo bi angizu anina min Ashuriin, kan umon ja fi beled ta nina, kan umon duru fi hudud ta nina. ⁷ Bagi ta Yagub bi kun fi nus ta shaab tai, ze nada min Yahwah, ze moyo fi ras gesh, al ma bi intezir le insan, wa umon ma bi istena le iyal ta bahsar. ⁸ Bagi ta Yagub bikun fi nus umam, fi nus shaab ketirin, ze assed fi nus ta haiwanat ta gaba, ze jena ta assed fi nus ta kurfan. Kan huwo mururu fi nus tumon, huwo bi guofu umon wa turuju wa gata gata umon gita gita, wa mafi zol al bi angizu umon. ⁹ Iden takum bi arfau did adu takum, wa bi demiro umon. ¹⁰ ''Bi hasil fi yom dak de''- de elaan ta Yahwah- ''inu Ana bi demiro hasin taki min nus takum wa bi hadimu markibat taki. ¹¹ Ana bi demiro mudon ta beled taki wa bi jada kulu mudeon taki al guwiin. ¹² Ana bi demiro sihir al fi iden taki, wa inta ma bi kun indu shukul kujur tani mara. ¹³ Ana bi demiro timsal taki wa imdan taki ta hujar min nus taki. Inta tani ma bi abudu haja al amulu ma iden ta insan. ¹⁴ Ana bi agila hajat taki ta kujur min nus taki, wa Ana bi demiro mudon taki. ¹⁵ Ana bi integim min umam al ma asuma fi zalan wa gadab.''