¹ Yesua dakal fi murkab, gata bahar, wa ja le medina bitou. ² Nas jabu le huwo zol moshulul naim fi feris. Huwo shafu iman bitomon, Yesua kelimu le zol al moshulul de, ''Ibni, keli inta kun farhan. Afi katiya bitaki.'' ³ Ulama tanin wonusu fi nefsa bitomon, ''Zol de bi mesil.'' ⁴ Yesua arufu al fi fikra bitomon wa gal, ''Le intum bi fekir kalam sherir fi gulub bitakum? ⁵ Kalam yatu al sahil ashan bi gulu, 'Katiya bitakum afi.' wele bi kelimu, 'Gum fok wa douru'? ⁶ Ashan intum bi arufu be-inu Ibin al insan indu sulta fi ard ashan bi afi katiya, ... ''huwo bi gul le zol moshul, ''Gum fok, shilu feris bitak, wa amshi bet.'' ⁷ Bad dak zol de gam fok wa masha le bet bitou. ⁸ Zaman Jamahir shafu zede, umon istagrab wa bada sabihu Allah, al wodi sikil sulta de le nas. ⁹ Zema Yesua masha be hinak, huwo shafu zol ismu Mateyo, al kan gaid fi keima ta limu daraib. Huwo kelimu le huwo, ''Taal warai.'' Huwo gam fok wa masha warau. ¹⁰ Zema Yesua gaad tehet fi jua wa bi akul, nas ta daraib kutar wa nas katiyin ja wa akulu ma Yesua wa talamiz bitou. ¹¹ Zaman pharisiyn shafu, Umon kelimu le talamiz bitou, '' Le mualim bitakum bi akulu ma nas ta daraib wa nas al katiyin? ¹² Zaman Yesua asuma kalam de, huwo gal, ''Nas al kwesin fi jisim ma muhtajin le dictor, ile del al ayanin. ¹³ Amshu wa fekiru kalam de gasit sunu, 'indi niya le rahma wa ma zebiha.' Fa Ana ja ma ashan bi nadi nas al kwesin ashan ye tub, lakin al katiyin. ¹⁴ Bad dak talamiz ta Yohana ja le huwo wa gal, ''Le nina wa pharisiyn kulu zaman bi sum, lakin talamiz bitak ma bi sum?'' ¹⁵ Yesua kelim le umon, ''Hal keli nas al ja shahidu iris yekun haznanin wa aris lisa gaid ma umon? Lakin yom bija al aris bi shilu min umon, wa bad dak umon bi sum. ¹⁶ Ma zol bi kutu gita ta gumas jedid fi jalabia al gedim, gita de bi sheretu bara min jalabia de, wa mahal al sheretu de bikun batal kalis. ¹⁷ Wele nas bi kutu kumur jedid fi buksa gedim. umon kan kutu, buksa de bi faga, kumur de bi kubu, wa buksa de karabu. Lakin, keli umon kutu kumur jedid fi buksa jedid, wa kulu itnin bikun kwes.'' ¹⁸ Zaman Yesua bi kelim kalam del le umon, wahid min muozif ja wa dengir gidamu. Huwo gal, ''Biniya bitai gabul suya mat, lakin taal wa kutu iden bitak le hiya, wa hiya bi ish.'' ¹⁹ Bad dak Yesua gam wa masha warau, wa talamiz bitou masha warau. ²⁰ Mara al kan indu nezif le fetra ta itnasar sena, ja be wara ta Yesua wa lemesu gumaz bitou. ²¹ Fa hiya gal le nefsu, ''kan ana bes lemesu gumaz bitou, Ana biligo ilaj.'' ²² Lakin Yesua galab wa shaf hiya, wa gal, ''Ya bit, shid helak; iman bitak aliju inta.'' Wa mara de ligo ilaj fi nefsu sah. ^{23 24} Zaman Yesua ja fi bet ta muozif de, Huwo shafu muazifin wa jamahir bi kore shedid. Huwo gal, '' Amshu beid, Biniya de ma mutu, lakin hiya naim.'' Lakin umon ataku le huwo be hagara. ²⁵ Zaman jamahir de mashu beid, huwo dakalu fi oda wa shalu hiya be yedu, wa biniya de gam fok. ²⁶ Kabar an kalam de waza fi kulu akalim. ²⁷ Zema Yesua masha min hinak, itnin rujal amiyanin masha warau. Umon bi kore be shot fok wa gal. ''Arhamna,, Ibin Daud!'' ²⁸ Zaman Yesua ja fi dakil al bet, Rujal amiyanin del ja le huwo. Yesua kelim le umon, ''Hal intum amin be-inu ana bi amul kalam de?'' Umon kelimu le huwo, ''Nam, Rabi'.' ²⁹ Bad dak Yesua lemesu uyun bitomon wa gal, ''Keli kalam de hasil le intum hasab iman bitakum,'' ³⁰ wa uyun bitomon fata. Bad dak Yesua amiru umon wa gal, ''kede mafi zol arufu kalam de.'' ³¹ Lakin rujal al itnin del masha wa wazau kabar de le kulu akalim ³² Zema itnin rujal del masha, zol tamtam moskun be roh sherir jabu le Yesua. ³³ Zaman roh sherir de talau bara, Zol al tamtam de bada wonusu. Jamahir del bada istagrab wa gal. ''kalam de ma shafu gabul kida fi Israel!'' ³⁴ Lakin al pharisyin del galu, ''Be sulta ta arua sherir, huwo turudu al arua sherir.'' ³⁵ Yesua masha fi kulu mudun wa bilad. huwo istemir derisu fi mahalat ta salawat, bi besiru injil ta molokut, wa aliju kulu sikil ta ayanat wa kulu shikil ta amrad. ³⁶ Zaman huwo shafu jamahir, huwo indu hinia le umon, le-anu umon indum mashakil wa niah bitomon gofulu. Umon biga ze korufan al ma indum zol al bi shufu wara umon. ³⁷ Huwo kelimu le talamiz bitou, ''Al hasat ketir, lakin nas ta sokol besitin. ³⁸ Ashan kida seli le Rabuna ta hasat, ashan huwo bi rasulu nas ta sokol le hasat bitou.''