¹ Yesua nadi itnasar talamiz bitou sawa wa wodi le umon sulta fok arua al nijis, ashan bi turudu umon bara, wa ashan aliju kulu anua ta amrad wa kulu anua ta ayanat. ² Hasa asma ta talamiz al itnasar yau del. Al awel, Samaan (al bi nadi Butrus), wa Andraus wa aku bitou Yakub ibin Zebedayo, wa Yohana aku bitou; ³ Philipus, wa Bartolmeyos; Thoma, wa Matta al bi limu daraib; Yakub ibin Alpheyos, wa Thadeyos; ⁴ Samaan al Gayur, wa Yahuza al Iskarioti, al bi ja biyu Yesua. ⁵ Del al itnasar Yesua rasulu bara. Huwo wajihu umon wa gal, '' Matakum mashi le mahal al nas al ma yahudiyin aishin, wa mata dakalu fi ai medina ta Samariyin. ⁶ Amsu le Korufan al woduru ta bet bita Israiliyin, wa zema intum mashin, beshir wa gul, ⁷ 'Molokut ta samawat biga ja gerib.' ⁸ Aliju ayanin, goumu al meitin, tahiru nas al indu marad juzam, wa atrudu arua sherir. Intum ligo majani, wodi majani. ⁹ Mata shilu ai dahab, fida, nihas fi santa bitakum. ¹⁰ Mata shilu santa kan inta bi safir , wele Gemiz idafi, wele gizam, wele hasaya, zol al sakal bi istehik Akil. ¹¹ Fi ai medina wele beled al intum bi dakalu fogo, fetisu zol al bi istehik, wa ogot takum hinak lahadi intum bi tala. ¹² Zema intum bi dakalu fi bet, selimu umon. ¹³ Kan bet de bi istehik, Keli salam bitakum ja fog umon. Lakin kan ma bi istehik, keli salam bitakum raja le intum. ¹⁴ Le del al mabi rahibu intum wele bi asma le kalam bitakum, wa kan intum bi rahalu bara min bet dak wele medina, nofudu gubar al fi kurein bitakum. ¹⁵ Hagiga Ana bi kelim le intum, taab de bi kun besit kalis le ardi ta Sodoma wa Gomorah fi yom ta gediya min medina dak. ¹⁶ Shuf, Ana bi rasulu intum zema korufan fi nus merfeinat, ashan kida keli intum kun negitin ze debiba wa ze hamama al ma bi awugu. ¹⁷ Keli intum kun harisin min nas! Umon bi selimu intum le majalis, wa umon bi jeledu intum fi mahalat ta sallah. ¹⁸ Bad dak bi jibu intum gidam hukam wa muluk ashan ana, ze shuhuda le umon wa le nas al geir Yahudiyin. ¹⁹ Kan umon selimu intum, Mata fekir kef wele intum be wonusu sunu, kalam al intum bi gulu bi wodi le intum fi zaman dak. ²⁰ Fa intum yau mabi wonusu, lakin Roho bita Abu bitakum bi wonusu fi intum. ²¹ Aku bi selimu aku bito le mut, wa abu bi selimu jena bitou. Iyal bi gum did abuhat bitomon wa bi kun sabab le umon ashan ye mut. ²² Ai zol bi karahu intum ashan isim bitai. Lakin le kulu zol al bi ithamal le akir, zol dak bi kalisu. ²³ Izakan umon bi amulu le intum itahadad fi medina de, ajiri le medina tani, hagiga ana bi kelim le intum, Intum ma bi yemsi le mudun bita Israel gubal Ibin al insan bi ja ²⁴ Telmiz ma kebir min ustaz bitou, wele kadam fok seid bitou. ²⁵ Huwo kifaya le telmiz ashan bikun ze ustaz bitou, wa kadam ze seid bitou. Kan umon nadi sidi al bet Beelzebul, asma al umon bi nadi be ada bita bet bitou bikun batal kalis! ²⁶ Ashan kida mata kafu umon, mafi haja mokful al ma bi zahir, wa mafi haja dusu al ma bi arufu. ²⁷ kalam al Ana wori le inta fi duluma, wori be nahar, wa kalam al inta asma be sot tehet, wori be sot fok le nas ashan bi asma. ²⁸ Mata kafu del al bi katulu jisim lakin ma bi katulu roho. Lakin, kafu huwo al bi agder demiru roho wa jisim fi johanam. ²⁹ Itnin tiyur suhar ma bi isteru be shiling? Lisa mafi wahid min num waga tehet bidun ilim min Abu bitakum. ³⁰ Lakin hata shar bita ras bitak adad bitou arufu. ³¹ Mata kafu. inta mohim shiedid min tiyur ketir al suhar. ³² Ashan kida ai wahid al be sahidu ana gidam nas, Ana bi sahidu gidam Abui al fi samah. ³³ Lakin Zol al ankuru ana gidam nas, Ana kaman bi ankur huwo gidam bui al fi samah ³⁴ Mata fekir be-inu Ana ja ashan jibu salam le ard. Ana ma ja ashan jibu salam, lakin shef. ³⁵ Ana ja ashan kalik weled did abu bitou. wa bit did umu, wa mara did nesiba bitou al mara. ³⁶ Adu ta zol rajil bikun min nas bita bet bitou. ³⁷ Zol al bi hibu abu wele umu aktar min ana ma bi istehik ashan yekun telmiz bitai: wa zol al bi hibu weled wele bit bitou aktar min ana ma bi istehik ashan yekun telmiz bitai. ³⁸ Zol al ma bi arfa selib bitou wa ja wara bitai ma bi istehik ashan yekun bitai. ³⁹ Zol al ligo haya bitou bi woduru haya de. Lakin zol al bi woduru haya bitou ashan ana bi ligi haya al hagiga. ⁴⁰ Ai zol al rahibu intum rahibu ana, ai zol al rahibu ana kaman rahibu huwo al rasulu ana. ⁴¹ Ai zol al rahibu nebi leanu huwo nebi bi akudu makafa bita nebi, wa ai zol al rahibu rojul al saleh le-anu huwo rojul saleh bi akudu makafa ta rojul saleh. ⁴² Ai zol al wodi le wahid min suhar del, hata kan kubaya ta moya barid asham yasurub, le-anu huwo telmiz, hagiga Ana bi kelim le intum, Huwo be ai teriga ma bi agder fagit makafa bitou.''