¹ Baat ayam, min ma Yahwah wedi raha le shaab Israel min adu tumon kulu al kan hawli umon, wa Yashu biga ajus wa kebir fi umor, ² Yashu nadi Israel kulu wa shiuk tumon, wa mugedimin tumon, guda tumon, wa ruwasa tumon- wa huwo kelim le umon, ''Ana biga ajus wa kebir fi umor. ³ Itakum ayinu ayi haja la Yahwah amulu le shaab tanin min ajil takum, lanu de Yahwah Ilah takum yao shakila min ajil ta kum. ⁴ Ayinu takum! Ana selim le itakum bagi mahalad al der shilu ze miras le gabaiel takum, sawa ma mudon la Ana demiro umon kalas, min Urdon le nahar al azim fi garib. ⁵ Yahwah Ilah takum bi trudu umon bara. Umon bi lizu umon bara min itakum. Huwo bi katulu umon min beled tumon, wa itakum bi weriso ard tumon, ze ma Yahwah Ilah takum waadu itakum. ⁶ Kede itakum kun guwin, ashan itakum bi hafisu wa bi amulu kulu haja al muktub fi kitab ta ganoon ta Mosa, kede itakum ma lifu min fugu Yemin wele shamal, ⁷ ashan itakum ma bi lakbatu ma shaab tanin al hawili itakum wele itakum bi nadi isim ta rabunat tumon, wele bi halifu be umon, aw abudu umon, aw dengir le umon. ⁸ Lakin kede itakum lesegu fi Yahwah Iklah takum ze ma itakum amulu le yom ta aleela. ^{9 10 11} Lanu Yahwah drudu min gidam takum shaab ketir, wa gowi. Wa mafi zol al kan ageder wegif gidam takum lahadi yom ta aleela. Wahid zol min itakum bi sibu alf nafar bi jere, ashan Yahwah Ilah takum, yao bi shakila min ajil takum, ze huwo waadu itakum. Kede itakum kutu bala takum kues, ashan itakum bi hibu Yahwah Ilah takum. ¹² Lakin kan itakum rija lesegu ma bagi shaab al fadulu fi nus takum, aw itakum juwzu badun ma umon, kan itakum ja sawa ma umon aw umon ja sawa ma itakum, ¹³ kede itakum arufu kues inu Yahwah Ilah takum ma bi trudu shaab de min nus takum. Lakin umon bikun sharak wa fakh le itakum, ze sout fi dahar takum wa shuk fi iyon takum, lahadi itakum bi mutu min ard al kues al Yahwah Ilah takum wedi le itakum. ¹⁴ Aleela ana bi ruwa fi sika ta dunia kulu, wa itakum arufu be gulub wa nufus takum inu wele kelima wahid al fashal min kulu hajat al Yahwah Ilah takum waadu le itakum. Hajat de kulu hasil le itakum. wele wahid min umon waga. ¹⁵ Lakin ze ma ayi kelima al Yahwah waadu temimu, kaman Yahwah bi jibu le itakum kulu sher lahadi huwo bi demiro fi ard al kues al Yahwah Ilah takum wedi le itakum. ¹⁶ Huwo bi amulu kida kan itakum kasuru ahad ta Yahwah Ilah takum, al huwo weri le itakum kede hafiso. Kan itakum ruwa abudu rabunat tanin wa dengir le umon, yala zalan ta Yahwah bi ja fugu itakum, wa itakum bi mutu guwam fi ard al huwo wedi le itakum.''